រាជធានីភ្នំពេញ ៖ ជាការពិត ការលួចដំឡើងកាត់តរថយន្តយ៉ាងអនាធិបតេយ្យ នឹងបណ្តាលឲ្យអ្នកទិញយកទៅប្រើប្រាស់អាចប្រឈមនឹងគ្រោះថ្នាក់ជាយថាហេតុបាន ជាក់ស្តែងស៊េរីទំនើបម៉ាកឡិចស៊ីសមួយគ្រឿង បើកលឿនបានរេចង្កូតទៅបុករះតូបលក់កាហ្វេ រួចបន្តទៅបុកបង្គោលភ្លើង និងបង្គោលថ្មរបងផ្ទះពលរដ្ឋមួយដើមទៀត បណ្តាលឲ្យដាច់រថយន្តជាបំណែកៗ…
រាជធានីភ្នំពេញ ៖ ជាការពិត ការលួចដំឡើងកាត់តរថយន្តយ៉ាងអនាធិបតេយ្យ នឹងបណ្តាលឲ្យអ្នកទិញយកទៅប្រើប្រាស់អាចប្រឈមនឹងគ្រោះថ្នាក់ជាយថាហេតុបាន ជាក់ស្តែងស៊េរីទំនើបម៉ាកឡិចស៊ីសមួយគ្រឿង បើកលឿនបានរេចង្កូតទៅបុករះតូបលក់កាហ្វេ រួចបន្តទៅបុកបង្គោលភ្លើង និងបង្គោលថ្មរបងផ្ទះពលរដ្ឋមួយដើមទៀត បណ្តាលឲ្យដាច់រថយន្តជាបំណែកៗ និងអ្នកបើកបរកៀបជាប់ក្នុងរថយន្តស្លា.ប់ភ្លាមៗនៅនឹងកន្លែង ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង០២និង៣០នាទីទៀបភ្លឺ ឈានចូលថ្ងៃទី៣ ខែសីហា ឆ្នាំ២០២១នេះ ស្ថិតនៅផ្លូវសហព័ន្ធរុស្ស៊ី ចំណុចទល់មុខព្រលានយន្តហោះអន្តរជាតិភ្នំពេញ ភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
សពជនរងគ្រោះមានឈ្មោះ សុន សុភាព ភេទប្រុស អាយុ២៧ឆ្នាំ មានប្រពន្ធកំពុងពពោះមានកូនក្នុងផ្ទៃ មានទីលំនៅក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
ប្រភពព័ត៌មានពីបុរសសន្តិសុខម្នាក់ បានប្រាប់ឲ្យដឹងថា នៅមុនពេលកើតហេតុ គាត់បានឃើញបុរសម្នាក់ បានបើករថយន្តម៉ាក LEXUS NX200t មួយគ្រឿង ពណ៌ស ពាក់ស្លាកលេខ ភ្នំពេញ 2AU-1056 បើកបរតាមបណ្តោយផ្លូវ សហព័ន្ធរុស្ស៊ី ក្នុងទិសដៅពីកើតទៅលិច ក្នុងល្បឿនយ៉ាងលឿន មកដល់ចំណុចកើតហេតុខាងលើ បានរេចង្កូតទៅបុករះតូបលក់កាហ្វេ រួចបន្តទៅបុកបង្គោលភ្លើង និងបង្គោលថ្ម របងផ្ទះពលរដ្ឋមួយដើមទៀត បណ្តាលឲ្យរថយន្តដាច់ជា២កំណាត់ សល់តែគ្រោងឆ្អឹង ចំណែកឯម្ចាស់រថយន្ត បានគៀបជាប់នៅក្នុងរថយន្តស្លាប់ភ្លាមៗ បង្កការភ្ញាក់ផ្អើលដល់ប្រជាពលរដ្ឋរស់នៅជិត ខាងរាយការណ៍ប្រាប់សមត្ថកិច្ចមូលដ្ឋាន ចុះទៅពិនិត្យមើលផងដែរ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែង រួចក៏បានទំនាក់ទំនងទៅផ្នែកជំនាញចរាចរណ៍ នៃស្នងការដ្ឋាននគរបាលរាជធានីភ្នំពេញ ឲ្យចុះមកធ្វើការវាស់វែង និងស្ទូចយករថយន្ត យកទៅរក្សាទុកបណ្ដោះអាសន្ន រង់ចាំដោះស្រាយនៅពេលក្រោយ ។ ចំណែកឯសពជនរងគ្រោះ ក្រោយធ្វើកំណត់ហេតុរួច សមត្ថកិច្ចប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី ។
ពាក់ព័ន្ធនឹងករណីគ្រោះថ្នាក់ចរាចរណ៍ខាងលើនេះ មានប្រជាពលរដ្ឋខ្មែរជាច្រើននាក់ បានបញ្ចេញមតិនៅលើបណ្ដាញសង្គមហ្វេសប៊ុកប្រហាក់ប្រហែលគ្នាថា រថយន្តខាងលើសង្ស័យជារថយន្តកាត់ត ដែលយានដ្ឋានមួយចំនួន លួចលាក់ដំឡើងកាត់តខុសបច្ចេកទេស ហើយនាំយកមកលក់បន្តអោយអតិថិជន ។
ផេកហ្វេសប៊ុកមួយ លើកឡើងថា «គួរប្រុងប្រយត្ន័ អោយបានខ្ពស់ថែមទៀត ចំពោះរថយន្តកាត់តទាំងអស់គ្នា បូករួមទាំងការដំឡើងស៊េរីកាត់តច្រើនកន្លែងហួសបច្ចេកទេសរថយន្តជ្រុលពេក ពេលបើកល្បឿនលឿនខ្លាំង រឺបុកប៉ះខ្លាំង ទើបបានឃើញលទ្ធផលទៅជាយ៉ាងណា ? អាយុជីវិត គឺសំខាន់ជាងអ្វីៗទាំងអស់» ។
គណនីហ្វេសប៊ុកមួយទៀត បានបង្ហោះសារថា «សូមអ្នករកស៊ីទិញលក់រថយន្ត កុំព្រោះតែលុយចំណេញ មិនគិតពីជីវិតអ្នកប្រើប្រាស់អី គ្នារកលុយទំរាំបានទិញរថយន្តមួយគ្រឿង ជំពាក់គេផង សន្សំផង ។ រថយន្តទំនើប ពោង ៨ គ្រាប់ បុកដាច់ ២កំណាត់ ហើយ គ្មានផ្ទុះពោង១សោះ ជីវិតគ្មានលក់តាមផ្សារទេ» ។
ជុំវិញការលើករបស់មតិប្រជាពលរដ្ឋនេះ មិនទាន់ដឹងថា ពិតជារថយន្តកាត់ត មែន ឫយ៉ាងណានោះទេ រង់ចាំមន្ត្រីជំនាញ ពិនិត្យទើបដឹងការពិត ។ កន្លងមក មន្ត្រីមានសមត្ថកិច្ច ធ្លាប់បានបង្ក្រាបជាបន្តបន្ទាប់ ទីតាំងកាត់ត រថយន្តខុសច្បាប់ នៅជាយក្រុងភ្នំពេញ ផងដែរ ៕
ចែករំលែកព័តមាននេះ