បុរសម្នាក់បានបើកបររថយន្តបែនកង់៦មួយគ្រឿង ដោយដឹកដីយកទៅចាក់នៅដីឡូតិ៍មួយកន្លែង លុះក្រោយពេលបែនបំបះទ្រុងចាក់រួច ក៏បានចុចបែរទម្លាក់ទ្រុងចុះវិញ ប៉ុន្តែគាំងទម្លាក់អត់ចុះវិញសោះ។ ខណៈនោះបុរសរូបនេះក៏
រាជធានីភ្នំពេញ ៖ បុរសម្នាក់បានបើកបររថយន្តបែនកង់៦មួយគ្រឿង ដោយដឹកដីយកទៅចាក់នៅដីឡូតិ៍មួយកន្លែង លុះក្រោយពេលបែនបំបះទ្រុងចាក់រួច ក៏បានចុចបែរទម្លាក់ទ្រុងចុះវិញ ប៉ុន្តែគាំងទម្លាក់អត់ចុះវិញសោះ។ ខណៈនោះបុរសរូបនេះក៏ចុះពីក្នុងកាប៊ីនរថយន្ត រួចយកដែកទៅគោះបូមសម្រាប់ដូយទ្រុងឡើងចុះ ព្រោះសង្ស័យថា បូមនោះគាំង ក៏ស្រាប់តែទ្រុងរថយន្តនោះធ្លាក់សង្កត់លើបុរសរូបនេះ បណ្ដាលស្លា.ប់បាត់បង់ជីវិតយ៉ាងអាណោចអធ័មតែម្ដង។ ឧប្បត្តិហេតុនេះ បានកើតឡើងកាលពីវេលាម៉ោង១២និង៥០នាទីរសៀល ថ្ងៃទី៣ ខែសីហា ឆ្នាំ២០២១ នៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
បុរសរងគ្រោះខាងលើមានឈ្មោះ ប៊ុន កុល អាយុ៣៩ឆ្នាំ មានស្រុកកំណើតនៅភូមិកំពុងឩស ឃុំផ្សារឆ្នាំ ក្រុងកំពង់ឆ្នាំង ខេត្តកំពង់ឆ្នាំង ហើយបច្ចុប្បន្នស្នាក់នៅក្នុងសង្កាត់ស្ទឹងមានជ័យ ខណ្ឌមានជ័យ ។
បើតាមអ្នកឃើញហេតុការណ៍បាននិយាយថា នៅមុនពេលកើតហេតុ បុរសរងគ្រោះបានបើកបររថយន្តម៉ាកនីស្សាន់ឌីសែល ប្រភេទបែនកង់៦មួយគ្រឿង ដឹកដីយកទៅចាក់នៅដីឡូតិ៍មួយកន្លែងត្រង់ចំណុចកើតហេតុខាងលើ។ លុះពេលទៅដល់ ក៏បានបែរដូយទ្រុងឡើងដើម្បីចាក់ដីចេញ ក្រោយពីចាក់ដីអស់ ជនរងគ្រោះក៏ទម្លាក់ទ្រុងចុះក្រោមវិញក្នុងបំណងបើកចេញ តែទម្លាក់អត់ចុះសោះ។
ប្រភពដដែលបានបន្តថា ខណៈនោះបុរសរងគ្រោះក៏បានចុះពីលើកាប៊ីនរថយន្ត រួចយកដែកទៅគោះបូមសម្រាប់ដូយទ្រុងឲ្យឡើងនោះ ដើម្បីទម្លាក់ឲ្យចុះក្រោមវិញសន្សឹមៗ ហើយខណៈពេលកំពុងតែគោះឮសូរផូងៗ ស្រាប់តែទ្រុងរថយន្តនោះធ្លាក់យ៉ាងគំហុកសង្កត់លើបុរសរងគ្រោះជាប់រើពុំរួចឡើយ។
ប្រភពដដែលបន្តទៀតថា ពិតជាគួរឲ្យអាសូរខ្លាំងណាស់ ពេលនោះបុរសរងគ្រោះពុំទាន់ស្លា.ប់ភ្លាមៗឡើយ ហើយក៏បានខំប្រឹងស្រែកឲ្យអ្នកជិតខាងជួយ ហើយអ្នកនៅជិតនោះបាននាំគ្នាចូលទៅជួយ រហូតកន្លះម៉ោងក្រោយមកទើបជួយគាស់យកជនរងគ្រោះចេញបាន ប៉ុន្តែបុរសរូបនេះបានស្លា.ប់បាត់ទៅហើយ។
ប្រភពដដែលខាងលើបានបន្តទៀតថា ក្រោយពេលជួយគាស់យកជនរងគ្រោះចេញបានហើយ អ្នកភូមិក៏បានលើកសាកស.ពជនរងគ្រោះដាក់នៅលើគ្រែក្បែរនោះ រួចក៏បានរាយការណ៍ជូននគរបាលប៉ុស្តិ៍ចោមចៅទី១ ចុះទៅកាន់កន្លែងកើតហេតុ ដើម្បីទាក់ទងក្រុមគ្រួសារនាំយកសាកស.ពទៅធ្វើបុណ្យតាមប្រពៃណី៕
ចែករំលែកព័តមាននេះ