អ្នកដឹកនាំរឿង និងចម្រៀងជើងចាស់លោក ហ៊ុយ ពុធ ទទួលមរណភាពហើយ
- ភ្នំពេញ
អ្នកដឹកនាំរឿង និងចម្រៀងជើងចាស់ក្នុងផលិតកម្មហង្សមាស លោក ហ៊ុយ ពុធ បានទទួលមរណភាពហើយកាលពីយប់ថ្ងៃទី២ ខែសីហា ឆ្នាំ២០២១ ក្នុងជន្មាយុ៨២ឆ្នាំ ដោយសារ
រាជធានីភ្នំពេញ ៖ អ្នកដឹកនាំរឿង និងចម្រៀងជើងចាស់ក្នុងផលិតកម្មហង្សមាស លោក ហ៊ុយ ពុធ បានទទួលមរណភាពហើយកាលពីយប់ថ្ងៃទី២ ខែសីហា ឆ្នាំ២០២១ ក្នុងជន្មាយុ៨២ឆ្នាំ ដោយសាររោគាពាធ និងភាពចាស់ជរា។ ដំណឹងមរណភាពរបស់លោក ហ៊ុយ ពុធ ត្រូវបានផ្សព្វផ្សាយពេញបណ្តាញសង្គមហ្វេសប៊ុក ត្បិតលោកគឺជាអ្នកដឹកភាពយន្ត និងចម្រៀងកាយវិកានៅក្នុងផលិតកម្មហង្សមាស ដែលមានស្នាដៃជាច្រើន។
កូនស្រីរបស់លោក គឺនាង ហ៊ុយ បូរ៉ាមី បានបង្ហោះសារតាមគណនេយ្យហ្វេសប៊ុករបស់ខ្លួនថា ដំណឹងមរណភាព យើងខ្ញុំទាំងអស់គ្នាត្រូវជាប្រពន្ធ កូន កូនប្រសារ ចៅ ចៅទួត និងបងប្អូនញាតិមិត្តទាំងអស់មានទុក្ខជាទម្ងន់ដោយសារឧបាសក ហ៊ុយ ពុធ ដែលត្រូវជាប្តី បីតា ជីតា ជីតាទួត បានទទួលមរណភាពនៅវេលាម៉ោង២០និង១៥នាទី នៅថ្ងៃទី២ ខែសីហា ឆ្នាំ២០២១ នៅក្នុងជន្មាយុ៨២ឆ្នាំ ដោយសាររោគាពាធ (ហើយការធ្វើតេស្តកូវីដ១៩ គឺអវិជ្ជមាន និងបញ្ជាក់ពីឃុំ-សង្កាត់)»។
កូនស្រីខាងលើបង្ហោះទៀតថា «ស.ពឧបាសក ហ៊ុយ ពុធ បានតម្តល់ និងធ្វើបុណ្យទក្ខិណានុប្បទានតាមប្រពៃណីព្រះពុទ្ធសាសនានៅផ្ទះលេខ 93B ផ្លូវលំ ភូមិព្រះពន្លា សង្កាត់ ព្រែកប្រា ខណ្ឌច្បាអំពៅ។ ដំណឹងនេះ ចាត់ទុកជាការគោរពអញ្ចើញដល់ ឯកឧត្តម លោកជំទាវ លោក លោកស្រី ញាតិមិត្តជិតឆ្ងាយនៃស.ព មេត្តាអញ្ជើញចូលរួមក្នុងពិធីនេះ ពីនាងខ្ញុំ ស៊ីវ នាង ត្រូវជាប្រពន្ធ និង ហ៊ុយ ម៉ូនីតា, ហ៊ុយ ពីឡុត, ហ៊ុយ បូរ៉ាមី និង សុខ សេរីរតនៈ, ជួន សុធា ត្រូវជាកូន និង កូនប្រសារ»។
ដំណឹងមរណភាពរបស់លោក ហ៊ុយ ពុធ នាពេលនេះបានក្លាយជាដំណឹងដ៏សោកស្តាយបំផុតសម្រាប់វិស័យសិល្បៈខ្មែរ ត្បិតលោកគឺជាធនធានមួយដ៏ល្អដែលមានស្នាដៃ និងបម្រើសិល្បៈស្ទើរពេញមួយជីវិត។ អ្នកសិល្បៈដែលធ្លាប់ទទួលការបណ្តុះបណ្តាល និងសម្តែងក្រោមការដឹកនាំរបស់លោក ហ៊ុយ ពុធ បានសម្តែងការសោកស្តាយនូវមរណភាពរបស់លោកយ៉ាងខ្លាំង។
គួរបញ្ជាក់ថា លោក ហ៊ុយ ពុធ គឺជាអ្នកដែលស្ថិតនៅក្នុងក្រុមផលិតចម្រៀងខារ៉ាអូខេ និងខ្សែភាពយន្តក្នុងផលិតកម្មហង្សមាសនាដើមឆ្នាំ១៩៩០។ នៅឆ្នាំ១៩៩៤ រូបលោក និងលោក កែ សុជាតិ បានបង្ហាត់បង្ហាញអ្នកនាង អម្ពរ ទេវី, លោក ទេព រិនដារ៉ូ, លោក ខៃ ប្រសិទ្ធ និងអ្នកនាង សុខ ស្រីមុំ ព្រមទាំងតារាមួយចំនួនទៀតអោយចេះសម្តែងតួសម្រាប់ថតជាខារ៉ាអូខេ។
លោក ហ៊ុយ ពុធ បានចេះជំនាញដឹកនាំភាពយន្ត និងសរសេរ សេនារីយោល ពីគ្រូជនជាតិបារាំងមួយរូបតាំងពីសម័យសង្គមរាស្ត្រនិយម ខណៈពេលលោកក៏ធ្លាប់ចូលរួមថតភាពយន្តថ្វាយព្រះមហាក្សត្រនរោត្តម សីហនុ ផងដែរ។ នៅក្នុងសម័យ លន់ ណុល លោក ហ៊ុយ ពុធ ក៏ធ្លាប់ធ្វើការជាមួយនឹងលោក ម៉ៅ អាយុទ្ធ នៅវិទ្យុជាតិវត្តភ្នំ។ ក្រោយឆ្នាំ១៩៧៩ លោកក៏បានចូលបម្រើនៅនាយកដ្ឋានភាពយន្ត ហើយក៏ចាប់ផ្តើមផលិតកុនខ្មែរ។
នៅឆ្នាំ១៩៩០ លោកក៏បានបង្កើតក្រុមផលិតភាពយន្តដោយខ្លួនឯង ដោយកុនដំបូងដែលលោកបានផលិតនោះ គឺរឿង «ស្នេហ៍រហែក» «ជ្រេកវិញ្ញាណ» ឬ «ជីវិតអ្នកចម្រៀង» ដែលសម្តែងដោយលោក សំ វិជ្ជា និងអ្នកនាង អម្ពរ ទេវី។ ក្រោយមកលោកក៏បានចូលរួមដឹកនាំផលិតបទចម្រៀងខារ៉ាអូខេអោយផលិតកម្មហង្សមាសជាច្រើនបទ មុនលោកធ្លាក់ខ្លួនឈឺ និងចាស់ជរា។ បច្ចុប្បន្នលោក ហ៊ុយ ពុធ ក៏មានប្រុសម្នាក់ជាអ្នកកាន់កាមេរ៉ាមេន និងកូនស្រីពៅម្នាក់ទៀតជាអ្នកដឹកនាំសម្តែង ដែលអាចស្នងតំណែងពីលោកផងដែរ៕
ចែករំលែកព័តមាននេះ