រាជធានីភ្នំពេញ ៖ ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាដល់កម្លាំងនគរបាលរាជធានីភ្នំពេញ ត្រូវបង្កើនចាត់វិធានការ ការអនុវត្តបម្រាមគោចរ…
រាជធានីភ្នំពេញ ៖ ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាដល់កម្លាំងនគរបាលរាជធានីភ្នំពេញ ត្រូវបង្កើនចាត់វិធានការ ការអនុវត្តបម្រាមគោចរ នៅក្នុងភូមិសាស្ត្ររាជធានីភ្នំពេញ ឲ្យបានតឹងរឹងថែមទៀត ចំពោះអ្នកល្មើសបម្រាមគោចរ ដើម្បីទប់ស្កាត់ និងកាត់ផ្តាច់ការឆ្លងរាលដាល នៃវីរុសកូវីដបំប្លែងថ្មី ប្រភេទ delta ។
លោកឧត្តមសេនីយ៍ឯក ស ថេត ថ្លែងឲ្យចាត់វិធានឲ្យម៉ឺងម៉ាត់បន្ថែមទៀតនេះ ធ្វើឡើងនៅក្នុងកិច្ចប្រជុំតាមរយៈវីដេអូ ZOOM ជាមួយលោក លោកស្រីស្នងការរង លោក លោកស្រីនាយការិយាល័យជំនាញទាំង ៣៣ និងលោកអធិការ នៃអធិការដ្ឋាននគរបាលខណ្ឌទាំង ១៤ ចំណុះស្នងការដ្ឋាននគរបាលរាជធានីភ្នំពេញ និងបានណែនាំដល់កងកម្លាំង នៅពេលដែលចុះអនុវត្តបម្រាមគោចរ ត្រូវប្រុងប្រយ័ត្នខ្ពស់ពីសុវត្ថិភាពផ្ទាល់ខ្លួនផងដែរ កុំឲ្យឆ្លងវីរុសកូវីដបំប្លែងថ្មីនេះ ពីព្រោះវីរុស delta បង្កគ្រោះថ្នាក់ធ្ងន់ធ្ងរដល់អាយុជីវិត ជាងវីរុសកូវីដ-១៩ធម្មតា ។
គួរជម្រាបថា សាលារាជធានីភ្នំពេញ បានដាក់ចេញបម្រាមគោចរ (ពីម៉ោង៩យប់ ដល់៣ទៀបភ្លឺ) សម្រាប់រយៈពេល ១៤ថ្ងៃ គិតចាប់ពីថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ។ គិតត្រឹមតែរយៈពេល ៣យប់ របាយការណ៍របស់ស្នងការដ្ឋាននគរបាលរាជធានីភ្នំពេញ បានបញ្ជាក់ថា អាជ្ញាធរមានសមត្ថកិច្ចរបស់រាជធានីភ្នំពេញ ឃាត់បានយានយន្តល្មើសបម្រាមគោចរ សរុបចំនួន ៨៩២គ្រឿង ក្នុងនោះរថយន្ត ២៥៤គ្រឿង និងម៉ូតូ ៦៣៨គ្រឿង ។
សូមបញ្ជាក់ថា ក្រសួងសុខាភិបាលកម្ពុជា បានចេញសេចក្តីប្រកាស រកឃើញវីរុសកូវីដ១៩ បំប្លែងថ្មី (Delta) ចំនួន១០៩ករណី បន្ថែមទៀត នៅចន្លោះថ្ងៃទី៣១ ខែកក្កដា និងថ្ងៃទី០១ ខែសីហា ឆ្នាំ២០២១ ៕
ចែករំលែកព័តមាននេះ