ខេត្តស្វាយរៀង៖ នៅថ្ងៃទី២ ខែសីហា ឆ្នាំ២០២១ នេះ រដ្ឋបាលខេត្តស្វាយរៀង បានប្រកាសនូវអត្តសញ្ញាណអ្នកវិជ្ជមានកូវីដ១៩ថ្មី ចំនួន ២៥នាក់ (ស្ត្រី…
ខេត្តស្វាយរៀង៖ នៅថ្ងៃទី២ ខែសីហា ឆ្នាំ២០២១ នេះ រដ្ឋបាលខេត្តស្វាយរៀង បានប្រកាសនូវអត្តសញ្ញាណអ្នកវិជ្ជមានកូវីដ១៩ថ្មី ចំនួន ២៥នាក់ (ស្ត្រី ៩នាក់)។ ក្នុងនោះ មានបុគ្គលិកកាស៊ីណូ ៣នាក់ អ្នកប៉ះពាល់ផ្ទាល់ជាមួយអ្នកជំងឺកូវីដ ៩នាក់ លើអ្នកសង្ស័យ ៩នាក់ និងករណីពលករធ្វើចំណាកស្រុក ត្រឡប់មកពីប្រទេសថៃ ម្នាក់។
អ្នកវិជ្ជមានកូវីដ១៩ ចំនួន ២៥នាក់នេះ ត្រូវបានបញ្ជូនទៅសម្រាកព្យាបាល នៅមន្ទីរពេទ្យស្រុកស្វាយជ្រំ ចំនួន ១២នាក់ បញ្ជូនទៅមន្ទីរពេទ្យបង្អែកសាមគ្គីរំដួល ៥នាក់ និងបញ្ជូនទៅមជ្ឈមណ្ឌលព្យាបាលកូវីដ១៩ ក្រុងបាវិត ចំនួន ៥នាក់។
រដ្ឋបាលខេត្តស្វាយរៀង បានប្រកាសពីករណីស្លាប់អ្នកជំងឺកូវីដ១៩ ចំនួន ៣នាក់ថ្មីទៀត រួមមាន៖ ១-ស្ត្រី ឈ្មោះ សំ សាម៉ុន អាយុ ៧១ឆ្នាំ នៅភូមិឃោសាង សង្កាត់ស្វាយតឿ ក្រុងស្វាយរៀង បានស្លាប់ នៅគេហដ្ឋាន នៅថ្ងៃ១សីហា ហើយក្រុមការងារធ្វើកោសលវិច្ច័យ យកសំណាកធ្វើតេស្តរហ័សរកឃើញវិជ្ជមានកូវីដ១៩។ ២-បុរស ឈ្មោះ ចាន់ មួន អាយុ ៨៦ឆ្នាំ រស់នៅភូមិតាសក់ ឃុំកំពង់អំពិល ស្រុករំដួល ស្លាប់នៅគេហដ្ឋាន នៅថ្ងៃទី៣១ ខែកក្កដា ឆ្នាំ២០២១ ធ្វើតេស្តឃើញវិជ្ជមានកូវីដ១៩។ ៣-បុរស ឈ្មោះ ហែម រ៉ែម អាយុ ៥០ឆ្នាំ រស់នៅភូមិស្វាយ ឃុំសំឡី ស្រុកកំពង់រោទិ៍ បានស្លាប់នៅគេហដ្ឋាន នៅថ្ងៃទី៣១ ខែកក្កដា ឆ្នាំ២០២១ ក្រុមការងារយកសំណាក ធ្វើតេស្ត រកឃើញវិជ្ជមានកូវី១៩។
គិតត្រឹមថ្ងៃទី១ ខែសីហា ឆ្នាំ២០២១ ខេត្តស្វាយរៀង មានអ្នកវិជ្ជមានកូវីដ១៩ សរុប ៤៩០៥នាក់ (ស្រី ២៧១២នាក់) ជាសះស្បើយសរុប ៤២៥៥នាក់ (ស្រី ២៣៧៥នាក់) និងកំពុងសម្រាកព្យាបាល ចំនួន ៥៤នាក់ (ស្រី ២៧៣នាក់)។ ករណីស្លាប់ កើនឡើង ១០០នាក់ (ស្រី ៦២នាក់)។
រដ្ឋបាលខេត្តស្វាយរៀង ក៏បានប្រកាសអំពាវនាវដល់បងប្អូនប្រជាពលរដ្ឋ កម្មករកម្មការិនី ដែលពាក់ព័ន្ធជាមួយអ្នកជំងឺកូវីដ-១៩ សូមប្រុងប្រយ័ត្ន ដើម្បីទប់ស្កាត់ការឆ្លងរីករាលដាលកូវីដ១៩ ទៅសហគមន៍។ អ្នកពាក់ព័ន្ធជាមួយអ្នកជំងឺកូវីដ-១៩ ខាងលើ សូមធ្វើចត្តាឡីស័កតាមដានសុខភាព អនុវត្តតាមវិធានការណែនាំរបស់ក្រសួងសុខាភិបាល និងវិធានការ ៣ការពារ ៣កុំ របស់សម្ដេចតេជោ ហ៊ុន សែន។
ប្រសិនបើមានរោគសញ្ញា ដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬសង្ស័យ សូមមេត្តាប្រញាប់ ទៅធ្វើតេស្តរកមេរោគ #កូវីដ១៩(#COVID-19) ដែលមានទីតាំងនៅជិតផ្ទះ ឬផ្ដល់ព័ត៌មានទៅអាជ្ញាធរមូលដ្ឋាន ឬទៅយកវត្ថុវិភាគសំណាកនៅប៉ុស្ដិ៍យកសំណាក ដែលនៅជិតផ្ទះ ឬទំនាក់ទំនងមកក្រុមការងារស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ-១៩ ខេត្ត តាមលេខទូរសព្ទ 044 712 522 ឬ 097 503 4567 ដើម្បីមានវិធានការបន្ត។
សម្រាប់អ្នក ដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួន រយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងទាំងនោះ៕ វ៉ាន់ ប៊ុនធឿន
ចែករំលែកព័តមាននេះ