រាជធានីភ្នំពេញ ៖ សំណើសុំព្រះមហាក្សត្រលើកលែងទោសដល់អ្នកទោសជនជាតិថៃ២នាក់ដែលបាននិងកំពុងជាប់ពន្ធនាគារព្រៃសនោះបានបញ្ជូនមកដល់ខុទ្ទកាល័យរដ្ឋមន្ត្រីក្រសួងយុត្តិធម៌ហើយ កាលពីថ្ងៃពុធម្សិលមិញ ឥឡូវកំពុងស្ថិតក្នុងសមត្ថកិច្ចនាយកដ្ឋានព្រហ្មទណ្ឌក្រសួងយុត្តិធម៌ ដើម្បីពិនិត្យលើទិដ្ឋភាពច្បាប់ដាក់ជូនលោករដ្ឋមន្ត្រីក្រសួងយុត្តិធម៌ពិនិត្យសម្រេច ។ នេះបើយោងតាមលោកសំ ប្រជាមានិត នាយកខុទ្ទកាល័យក្រសួងយុត្តិធម៌ ដែលបានប្រាប់កោះសន្តិភាពតាមទូរស័ព្ទនៅរសៀលថ្ងៃទី២៤ មីនា នេះ ។
គួរបញ្ជាក់ថា អ្នកទោសជនជាតិថៃឈ្មោះវីរ៉ា ស៊ុមខ្វាមឃីត និងស្ត្រីជំនួយការរបស់លោកម្នាក់ទៀត គឺលោកស្រីរ៉ាទ្រី ត្រូវបានសាលាដំបូងរាជធានីភ្នំពេញ ផ្តន្ទាទោសកាលពីថ្ងៃទី១ កុម្ភៈ ពីបទឆ្លងដែនខុសច្បាប់ចូលក្នុងទីលានយោធាក្នុងបំណងទុច្ចរិត និងបទចារកម្ម ។ អ្នកទោសទាំង២នាក់នេះ មិនបានសម្រេចចិត្តប្តឹងឧទ្ធរណ៍ជំទាស់ទៅនឹងសាលក្រមសាលាដំបូងរាជធានីភ្នំពេញនោះទេ ហើយបានសរសេរលិខិតស្នើសុំព្រះរាជទានទោសពីព្រះករុណាសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា តាមរយៈរាជរដ្ឋាភិបាលកម្ពុជា ។ បើតាមលោកសំ ប្រជាមានិត នាយកខុទ្ទកាល័យក្រសួងយុត្តិធម៌ បានឱ្យដឹងថា នៅពេលសំណើសុំលើកលែងទោសបានមកដល់ក្រសួងយុត្តិធម៌ គឺរដ្ឋមន្ត្រីក្រសួងយុត្តិធម៌គ្រាន់តែពិនិត្យលើទិដ្ឋភាពច្បាប់ ហើយរាយការណ៍ជូនសម្តេចតេជោនាយករដ្ឋមន្ត្រីហ៊ុន សែន តែប៉ុណ្ណោះ ។
គួរបញ្ជាក់ថា សំណើសុំព្រះមហាក្សត្រកម្ពុជាលើកលែងទោសនោះបានទៅដល់ក្រសួងការបរទេសកាលពីល្ងាចថ្ងៃទី១៦ មីនា ដោយមានអមជាមួយនូវកំណត់ទូតរបស់ស្ថានទូតថៃប្រចាំកម្ពុជាផងដែរ ។ បើតាមអ្នកនាំ ពាក្យក្រសួងការបរទេសកម្ពុជា លោកកុយ គួង ធ្លាប់បានមានប្រសាសន៍ថា អ្នកទោសទាំង២នាក់នេះ មានសិទ្ធិក្នុងការស្នើសុំព្រះរាជទានទោសពីព្រះមហាក្សត្រ ប៉ុន្តែកម្ពុជានឹងពិចារណាករណីនេះស្របតាមច្បាប់របស់កម្ពុជាដែរ ។ សម្តេចនាយករដ្ឋមន្ត្រីហ៊ុន សែន ធ្លាប់បានមានប្រសាសន៍ថា អ្នកទោសទាំង២នាក់នេះត្រូវអនុវត្តទោសឱ្យបាន២ភាគ៣សិន មុននឹងមានការពិចារណាអំពីការលើកលែងទើសនោះ ៕
ចែករំលែកព័តមាននេះ