រាជធានីភ្នំពេញ ៖ កម្លាំងល្បាតគណៈបញ្ជាការឯកភាពរដ្ឋបាលខណ្ឌសែនសុខ នៅព្រឹកថ្ងៃទី០២ ខែសីហា ឆ្នាំ២០២១ បានធ្វើការល្បាតតាមផ្លូវ ក្នុងភូមិសាស្ត្រសង្កាត់ទាំង៦ បានណែនាំអាជីវករលក់ដូរ ត្រូវលក់វេចខ្ចប់…
រាជធានីភ្នំពេញ ៖ កម្លាំងល្បាតគណៈបញ្ជាការឯកភាពរដ្ឋបាលខណ្ឌសែនសុខ នៅព្រឹកថ្ងៃទី០២ ខែសីហា ឆ្នាំ២០២១ បានធ្វើការល្បាតតាមផ្លូវ ក្នុងភូមិសាស្ត្រសង្កាត់ទាំង៦ បានណែនាំអាជីវករលក់ដូរ ត្រូវលក់វេចខ្ចប់ ហាមរៀបតុ ទទួលភ្ញៀវ ។
ក្នុងនោះ កម្លាំងគណៈបញ្ជាការឯកភាពរដ្ឋបាលខណ្ឌសែនសុខ ក៏បានដកហូតតុ កៅអី នៅទីតាំងលក់ដូរមួយចំនួន ដែលមិនអនុវត្តតាមសេចក្តីសម្រេចលេខ២៤៩/២១ សសរ របស់រដ្ឋបាលរាជធានីភ្នំពេញ មករក្សាទុកនៅសាលាខណ្ឌ ផងដែរ ។
រដ្ឋបាលរាជធានីភ្នំពេញ បានសេចក្ដីសម្រេច ស្ដីពីការដាក់ចេញនូវវិធានការរដ្ឋបាល នៅក្នុងភូមិសាស្ត្ររាជធានីភ្នំពេញ សម្រាប់រយៈពេល ១៤ថ្ងៃ គិតចាប់ពីម៉ោង ២៣:៥៩នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ ។
ប្រការ៥ មានចំណុចមួយចែងថា – គ្រប់ទីផ្សារ ភោជនីយដ្ឋាន អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មដ្ឋានផ្នែកអាហារ-ភេសជ្ជៈគ្រប់ប្រភេទ អាចដំណើរការជាប្រក្រតី ប៉ុន្តែត្រូវប្រកបអាជីវកម្មរបស់ខ្លួនត្រឹមជាលក្ខណៈវេចខ្ចប់ប៉ុណ្ណោះ ដោយមិនត្រូវអនុញ្ញាតឲ្យអតិថិជនចូលមកទទួលទាន នៅក្នុងបរិវេណអាជីវកម្មដ្ឋានរបស់ខ្លួនឡើយ ៕
ចែករំលែកព័តមាននេះ