អាជ្ញាធរសម្រេចបិទរោងចក្រផលិតទឹកកកយីហោ «សេះហោះ» ក្រោយពេលក្រុមគ្រូពេទ្យចុះយកសំណាក់ធ្វើតេស្តរហ័សទៅលើមនុស្សជិត១០០នាក់ ជាលទ្ធផលរកឃើញមានវិជ្ជមានកូវីដ១៩ ចំនួន
ខេត្តបន្ទាយមានជ័យ ៖ អាជ្ញាធរសម្រេចបិទរោងចក្រផលិតទឹកកកយីហោ «សេះហោះ» ក្រោយពេលក្រុមគ្រូពេទ្យចុះយកសំណាក់ធ្វើតេស្តរហ័សទៅលើមនុស្សជិត១០០នាក់ ជាលទ្ធផលរកឃើញមានវិជ្ជមានកូវីដ១៩ ចំនួន១០នាក់ នៅថ្ងៃទី០១ ខែសីហា ឆ្នាំ២០២១ ស្ថិតភូមិមួយ សង្កាត់ព្រះពន្លា ក្រុងសិរីសោភ័ណ។
លោក ហ៊ឹល រ៉ាយ៉ា អភិបាលក្រុងសិរីសោភ័ណ បានប្រាប់ឱ្យដឹងថា សូមអំពាវនាវដល់អ្នកពាក់ព័ន្ធជាមួយនឹងរោងចក្រទឹកកកសេះហោះ ក្រុងសិរីសោភ័ណខាងលើនេះ ត្រូវចូលខ្លួនយកសំណាកជាប្រញាប់ ព្រោះថា ពេលនេះអាជ្ញាធរបានរកឃើញអ្នកចែកចាយទឹកកក និងអ្នកបម្រើការក្នុងរោងចក្រនេះ មានវិជ្ជមានកូវីដ១៩ ចំនួន១០នាក់ហើយ។
លោកបានបញ្ជាក់ថា អ្នកដែលដឹកទឹកកក និងចែកចាយទឹកកករបស់រោងចក្រទឹកកកសេះហោះដែលរកឃើញវិជ្ជមានកូវីដ១៩នេះ បានធ្វើសកម្មភាពចែកចាយទឹកកកគ្រប់ស្រុក-ក្រុង នៅក្នុងខេត្តបន្ទាយមានជ័យ ហើយចែកចាយឆ្លងខេត្តទៀតផង នេះជាការព្រួយបារម្ភក្នុងការឆ្លងរាលដាលក្នុងសហគមន៍ ដូច្នេះសុំអោយបងប្អូនដែលពាក់ព័ន្ធត្រូវចូលខ្លួនយកសំណាកជាប្រញាប់ ដើម្បីកុំអោយរីករាលកាន់តែធ្ងន់ធ្ងរឡើង។
លោក ហ៊ឹល រ៉ាយ៉ា បានបញ្ជាក់ថា ចំពោះអ្នករកឃើញមានវិជ្ជមានកូវីដ១៩ ចំនួន១០នាក់ខាងលើនេះ ត្រូវបានក្រុមគ្រូពេទ្យដឹកយកទៅព្យាបាលហើយ ចំណែកអ្នកអវិជ្ជមានកូវីដ១៩ ត្រូវបានយកទៅធ្វើចត្តាឡីស័ករយៈពេល១៤ថ្ងៃសិន ដើម្បីការពារទប់ស្កាត់ការរីករាលដាលកូវីដ១៩ ក្នុងសហគមន៍ ។ រីឯអ្នកដែលដឹងខ្លួនថា បានពាក់ព័ន្ធជាមួយអ្នកវិជ្ជមានកូវីដ១៩ ឬរោងចក្រខាងលើ ត្រូវចូលខ្លួនមកយកសំណាក ដើម្បីការពារខ្លួនអ្នក និងគ្រួសារអ្នក ឬក្នុងសង្គមជាដើម៕
ចែករំលែកព័តមាននេះ