រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសមានវ័យ៤០ឆ្នាំម្នាក់បានបាត់ប្រពន្ធវ័យក្មេងពីផ្ទះមិនឃើញ ហើយមានគេប្រាប់ថា បានឃើញយុវជនម្នាក់ដឹកប្រពន្ធគាត់ចូលក្នុងផ្ទះសំណាក់យីហោ «ចំប៉ីមាស» ធ្វើឱ្យបុរសរូបនេះកើតចិត្តប្រចណ្ឌ ក៏យកដំបងដែកទីបប្រវែងជាង១ម៉ែត្រ មកស្ទាក់ចាំវាយយុវជននោះនៅមុខផ្ទះសំណាក់ តែមិនសម្រេច បែរជាត្រូវគេព្រួតវាយតបវិញ បណ្តាលឲ្យរបួសបែកក្បាល ផ្អើលដល់សមត្ថកិច្ចចុះឃាត់ខ្លួនទាំង២នាក់ ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង១២អធ្រាត្រ ថ្ងៃទី១ ខែសីហា ឆ្នាំ២០២១ នៅតាមបណ្ដោយផ្លូវកែវចិន្តា ចំណុចផ្ទះសំណាក់យីហោ «ចំប៉ីមាស» ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
បើតាមបុរសដែលរងរបួសបែកក្បាលខាងលើនេះមានឈ្មោះ ហាង សុវណ្ណរ៉ាត់ អាយុ៤០ឆ្នាំ ហើយមានប្រពន្ធឈ្មោះ សឿន ស្រីនុច អាយុ២៥ឆ្នាំ បានប្រាប់ឲ្យដឹងថា មុនពេលកើតហេតុ គឺរូបគាត់បានបាត់ប្រន្ធវ័យក្មេងពីផ្ទះដោយទាក់ទងមិនបាន និងមានគេមកប្រាប់គាត់ថា មានបុរសម្នាក់ជិះម៉ូតូមកឌុបប្រន្ធគាត់ រួចល្បួងទៅដេកនៅផ្ទះសំណាក់យីហោ «ចំប៉ីមាស»។
បុរសរងរបួសបែកក្បាលខាងលើបន្តថា លឺដូច្នោះ រូបគាត់ក៏មានចិត្តប្រចណ្ឌខឹងបានទាញដំបងដែកប្រវែងជាង១ម៉ែត្រដើរពីអាងទឹកជិតកំពង់ដរស្វាយជ្រុំ ដើម្បីមករង់ចាំនៅផ្ទះសំណាក់ខាងលើតែម្តង។ លុះពេលឃើញបុរសម្នាក់ជិះម៉ូតូសំដៅចូលមកផ្ទះសំណាក់នោះតែម្នាក់ ដោយមានភិនភាគដូចគេប្រាប់ ក៏កើតចិត្តប្រកាន់ខឹងរួចក៏ទាញដំបងវាយសំដៅទៅបុរសរូបនោះពេញទំហឹង តែបុរសជិះម៉ូតូអោនផុត ក៏បន្ថែមល្បឿនចូលផ្ទះសំណាក់ស្រែកអោយគេជួយ ហើយរូបគាត់ក៏ត្រូវបុគ្គលិកផ្ទះសំណាក់ចេញមកព្រួតវាយតបវិញ បណ្តាលឲ្យរបួសបែកក្បាលតែម្តង។
ចំណែកបុរសដែលរងជាប់ចោទថាល្បួងប្រពន្ធគេមកដេកផ្ទះសំណាក់នោះ បានប្រាប់ឲ្យដឹងថា មុនពេលកើតហេតុ គឺរូបគាត់បានជិះម៉ូតូតែម្នាក់ឯងពីមុខក្រុមហ៊ុន វិរៈប៊ុនថាំ មកលេងមិត្តភក្តិនៅផ្ទះសំណាក់កើតហេតុខាងលើ ព្រោះជាកន្លែងគាត់ធ្វើការពីមុន។ ហើយគាត់មិនដែលស្គាល់បុរសចំណាស់នោះទេ ។
បុរសរងការចោទបានបន្តថា ខណៈពេលជិះម៉ូតូមកដល់មុខផ្ទះសំណាក់ខាងលើនោះ ស្រាប់តែបុរសចំណាស់រូបនេះបានទាញដំបងទីបដែកវាយសំដៅមករករូបគាត់ពេញទំហឹង ទាំងដែលគាត់កំពុងតែជិះម៉ូតូ តែសំណាងល្អគាត់អោនគេចផុត ក៏បន្ថែមល្បឿនម៉ូតូជិះចូលផ្ទះសំណាក់ស្រែកអោយគេជួយតែម្តង ដោយស្មានតែបុរសចំណាស់ខាងលើនេះ ជាចោរវាយប្លន់ម៉ូតូ ក៏នាំគ្នាព្រួតវាយតបវិញ បណ្តាលឲ្យបុរសវ័យចំណាស់រូបនោះរបួសបែកក្បាលបន្តិចតែម្តងទៅ ។
បន្ទាប់ពីមានការចោទប្រកាន់គ្នាទៅវិញទៅមក ភាគីទាំងពីរត្រូវបានសមត្ថកិច្ចឃាត់ខ្លួននាំទៅសម្របសម្រួលដោះស្រាយគ្នានៅប៉ុស្តិ៍នគរបាលសង្កាត់ជ្រោយចង្វារ ដើម្បីបញ្ចប់រឿងហើយ ៕
ចែករំលែកព័តមាននេះ