ភ្នំពេញ៖ នៅថ្ងៃទី១ ខែសីហានេះ ជាថ្ងៃដំបូងនៃយុទ្ធនាការចាក់វ៉ាក់សាំងបង្ការជំងឺកូវីដ១៩ ដល់កុមារ និងយុវវ័យ អាយុចាប់ពី ១២ឆ្នាំ ដល់អាយុក្រោម ១៨ឆ្នាំ។…
ភ្នំពេញ៖ នៅថ្ងៃទី១ ខែសីហានេះ ជាថ្ងៃដំបូងនៃយុទ្ធនាការចាក់វ៉ាក់សាំងបង្ការជំងឺកូវីដ១៩ ដល់កុមារ និងយុវវ័យ អាយុចាប់ពី ១២ឆ្នាំ ដល់អាយុក្រោម ១៨ឆ្នាំ។ ក្រសួងសុខាភិបាល បានប្រកាសថា នៅថ្ងៃទី១សីហានេះ កុមារអាយុចាប់ពី ១២ឆ្នាំ ដល់អាយុក្រោម ១៨ឆ្នាំ ចាក់វ៉ាក់សាំង ស៊ីណូវ៉ាក់ បាន ៣៦៨៣០នាក់ ស្មើនឹង ១,៨៧% នៃចំនួនកុមារ និងយុវវ័យ ដែលត្រូវចាក់វ៉ាក់សាំង ទូទាំងប្រទេស ១ ៩៦៦ ៩៣១នាក់។ នេះបើតាមរបាយការណ៍របស់អនុគណៈកម្មការតាមដាន និងវាយតម្លៃ នៃគណៈកម្មការចំពោះកិច្ចចាក់វ៉ាក់សាំង កូវីដ១៩ ក្នុងក្របខណ្ឌទូទាំងប្រទេស។
សូមរម្លឹកថា យុទ្ធនាការចាក់វ៉ាក់សាំងដល់កុមារ និងយុវវ័យ អាយុចាប់ពី ១២ឆ្នាំ ដល់អាយុក្រោម ១៨ឆ្នាំ នៅថ្ងៃទី១ ខែសីហានេះ ចាប់ផ្តើមដំបូង នៅរាជធានីភ្នំពេញ ខេត្តកណ្តាល ខេត្តព្រះសីហនុ និងខេត្តកោះកុង។
របាយការណ៍ប្រចាំថ្ងៃដដែល បង្ហាញថា គិតចាប់ពីថ្ងៃទី១០ ខែកុម្ភៈ ដល់ថ្ងៃទី១ ខែសីហា ឆ្នាំ២០២១ នៅទូទាំងប្រទេស ចាក់វ៉ាក់សាំងបង្ការជំងឺកូវីដ១៩ សរុបបានចំនួន ៧ ៣៨៥ ០១៣នាក់ ស្មើនឹង ៧៣,១៨% នៃចំនួនអ្នកចាក់វ៉ាក់សាំង ក្នុងគោលដៅ ១០លាននាក់។
របាយការណ៍របស់ក្រសួងសុខាភិបាល បង្ហាញថា ក្នុងចំណោមអ្នកចាក់វ៉ាក់សាំង ៧ ៣៨៥ ០១៣នាក់ គឺបានចាក់វ៉ាក់សាំង ៤ប្រភេទ រួមមាន៖ ១-Sinopharm ចំនួន ២ ៦៩៩ ៨០៤នាក់ ២-AstraZeneca ( Covishield ) ១៦៥ ៦០៨នាក់ ៣-AstraZeneca ( ជប៉ុន ) ចាក់បាន ១០៣ ៤០៦នាក់ និង ៤-Sinovac ( សម្រាប់អ្នកមានអាយុចាប់ពី ១៨ឆ្នាំឡើង ) ចំនួន ៤ ៣៧៩ ៣៦៥នាក់៕
ចែករំលែកព័តមាននេះ