ភ្នំពេញ៖ តាមគម្រោង វ៉ាក់សាំងជំនួយអាមេរិក Johnson & Johnson ដែលនៅសល់ ក្នុងចំណោមជាង ១លានដូស នឹងដឹកជញ្ជូនតាមយន្តហោះពិសេស…
ភ្នំពេញ៖ តាមគម្រោង វ៉ាក់សាំងជំនួយអាមេរិក Johnson & Johnson ដែលនៅសល់ ក្នុងចំណោមជាង ១លានដូស នឹងដឹកជញ្ជូនតាមយន្តហោះពិសេស មកដល់កម្ពុជា នៅម៉ោងជាង ១២កណ្តាលអាធ្រាត្រ ថ្ងៃទី១ ឈានចូលថ្ងៃទី២ ខែសីហានេះ។ នេះបើតាមមន្ត្រីស្ថានទូតអាមេរិក ប្រចាំកម្ពុជា។
កាលពីព្រឹកថ្ងៃទី៣០ ខែកក្កដា ឆ្នាំ២០២១ វ៉ាក់សាំងប្រឆាំងកូវីដ១៩ Johnson & Johnson ចំនួន ៤៥០៥០០ ដូស ត្រូវបានអាមេរិក ដឹកជញ្ជូនមកដល់ភ្នំពេញ។ វ៉ាក់សាំង ៤៥០ ៥០០ដូស ស្ថិតក្នុងចំណោម ១ ០៦០ ១០០ដូស ដែលជាការបរិច្ចាគពីប្រជាជនអាមេរិក ជូនចំពោះប្រជាជនកម្ពុជា។
ស្ថានទូតអាមេរិក បានប្រកាសថា ក្នុងការរួមចំណែកមួយនេះ សហរដ្ឋអាមេរិកបញ្ជាក់ជាថ្មី នូវការប្តេជ្ញាចិត្តជាយូរអង្វែងរបស់ខ្លួន ចំពោះសុខភាពសាធារណៈ នៃប្រជាជនកម្ពុជា ដែលស្តែងឲ្យឃើញច្បាស់បំផុត នៅក្នុងអំឡុងពេលនៃវិបត្តិកូវីដ១៩ នេះ។ វ៉ាក់សាំងទាំងនេះ ដែលនឹងការពារប្រជាជនកម្ពុជា ចំនួនជាងមួយលាននាក់នោះ គឺជាផ្នែកមួយនៃការសន្យារបស់លោកប្រធានាធិបតី Biden ក្នុងការធ្វើការចែកចាយវ៉ាក់សាំងចំនួន ៨០ លានដូស នៅក្នុងសាកលលោក។
វ៉ាក់សាំង Johnson & Johnson នេះ ត្រូវផ្តល់ដល់ប្រជាជនកម្ពុជា តាមរយៈយន្តការកូវ៉ាក់(COVAX) និងក្រោមភាពជាដៃគូជាមួយអង្គការយូនីសេហ្វ (UNICEF) និងអង្គការសុខភាពពិភពលោក (WHO) ។
លោកឯកអគ្គរដ្ឋទូតរបស់សហរដ្ឋអាមេរិក W. Patrick Murphy បានមានប្រសាសន៍ថា ៖ «វិធីការពារដ៏ល្អ បំផុតប្រឆាំងនឹងជំងឺកូវីដ១៩ គឺការចាក់វ៉ាក់សាំងដែលមានប្រសិទ្ធភាព និងប្រកបដោយគុណភាពខ្ពស់។ យើងមានមោទកភាពក្នុងការជួយប្រជាជនកម្ពុជាឲ្យមានសុខភាពល្អ និងមានសេដ្ឋកិច្ចល្អទៅអនាគតតាម រយៈជំនួយវ៉ាក់សាំងទាំងនេះ»។
សហរដ្ឋអាមេរិក បានសន្យាផ្តល់ជំនួយចំនួន ៤ ពាន់លានដុល្លារដល់យន្តការកូវ៉ាក់ ដែលធ្វើឲ្យសហរដ្ឋអាមេរិក គឺជាប្រទេសផ្តល់វិភាគទានធំជាងគេតែមួយគត់ ដល់ការឆ្លើយតបជាអន្តរជាតិចំពោះជំងឺកូវីដ១៩។ នៅប្រទេសកម្ពុជា សហរដ្ឋអាមេរិកបានផ្តល់ជំនួយជាង ១១ លានដុល្លារទាក់ទងនឹងការឆ្លើយតបជំងឺកូវីដ ១៩ ចាប់តាំងពីជំងឺរាតត្បាតនេះបានផ្ទុះឡើងជាលើកដំបូង។ តាមរយៈទីភ្នាក់ងារជំនួយអាមេរិក (USAID) ជំនួយគាំទ្ររបស់សហរដ្ឋអាមេរិក បានទៅដល់ប្រជាជនកម្ពុជាចំនួនជាង ១០ លាននាក់ ដោយក្នុងនោះ មានសម្ភារៈឯកសារចូលរួមលើកកម្ពស់ការយល់ដឹងលើហានិភ័យ ដែលត្រូវបានផ្សព្វផ្សាយតាមទូរទស្សន៍ បណ្តាញសង្គម វិទ្យុ សារតាមទូរស័ព្ទ និងផ្ទាំងប៉ាណូនានា។ ការជួយទាំងនេះ ថែមទាំងបានជួយលើកកម្ពស់សមត្ថភាពនៃមន្ទីរពិសោធន៍ ពង្រឹងជំនាញរបស់គ្រូពេទ្យ និងជួយកាត់បន្ថយផលប៉ះពាល់ដែលបង្កដោយជំងឺរាតត្បាតមកលើសេដ្ឋកិច្ច។
ទីភ្នាក់ងារសហរដ្ឋអាមេរិកដទៃទៀតនៅប្រទេសកម្ពុជា រួមមានមជ្ឈមណ្ឌលប្រយុទ្ធជំងឺឆ្លងសហរដ្ឋអាមេរិក វិទ្យាស្ថានជាតិសុខភាព កងទ័ពជើងទឹក និងក្រសួងការបរទេសសហរដ្ឋអាមេរិក បានផ្តល់នូវជំនួយជា លក្ខណៈបច្ចេកទេសសំខាន់ៗ ក្នុង ពេលនៃជំងឺរាតត្បាតនេះ ដោយធ្វើការគាំទ្រដល់ការងារអង្កេត តាមដានរកអ្នកពាក់ព័ន្ធ បង្កើនសមត្ថភាព និងការស្រាវជ្រាវរកប្រភព ដើម្បីទប់ស្កាត់ការរីករាលដាលជំងឺកូវីដ១៩។ ការខិតខំទាំងនេះ បំពេញបន្ថែមលើការងារជួយសង្គ្រោះជីវិតអស់រយៈពេលរាប់ទសវត្សរ៍មក និងភាពជាអ្នកដឹកនាំរបស់សហរដ្ឋអាមេរិក ក្នុងការដោះស្រាយវិបត្តិសុខភាពជាសាកល។
ចាប់តាំងពីឆ្នាំ ១៩៩២ មក សហរដ្ឋអាមេរិក បានផ្តល់ជំនួយជាង ៣៧៧ លានដុល្លារនៅកម្ពុជា ដើម្បីជួយលើការងារមរណភាពមាតានិងទារក ជំងឺគ្រុនចាញ់ របេង ជំងឺអេដស៍ និង ភាពក្រិន ការលើកកម្ពស់អនាម័យ និងអាហារូបត្ថម្ភ ព្រមទាំងពង្រឹងនូវសមត្ថភាពកម្ពុជា ក្នុងការផ្តល់ហិរញ្ញវត្ថុ និងគ្រប់គ្រងលើផ្នែកភស្តុភារ និងព័ត៌មានសម្រាប់ប្រព័ន្ធសុខាភិបាលរបស់ខ្លួន។
ក្នុងពិធីបើកយុទ្ធនាការចាក់វ៉ាក់សាំងដល់កុមារ និងយុវវ័យ ចាប់ពីអាយុ ១២ឆ្នាំ ដល់ក្រោមអាយុ ១៨ឆ្នាំ នាព្រឹកថ្ងៃទី១ ខែសីហា ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន បានប្រកាសថា វ៉ាក់សាំង Johnson & Johnson ដែលជាជំនួយរបស់អាម៉េរិកនេះ នឹងត្រូវប្រើប្រាស់ សម្រាប់ចាក់ជូនជនជាតិដើមភាគតិច នៅកម្ពុជា។ វ៉ាក់សាំងអាមេរិកនេះ ម្នាក់ ចាក់តែ ១ដូសប៉ុណ្ណោះ៕
ចែករំលែកព័តមាននេះ