ខេត្តសៀមរាប៖ លោកវណ្ណ សារៈ ធ្លាប់ជាអ្នកមើលការខុសត្រូវ នៅភោជនីយដ្នានមួយកន្លែង នៅលើទឹកដីអង្គរ។ លោកធ្លាប់ទទួលបានប្រាក់ខែ ៧០០ ដុល្លារអាមេរិក ក្នុងមួយខែ ប៉ុន្តែនៅពេលផ្ទុះជំងឺកូវីដ១៩ លោកបានបាត់ការងារ ដោយសារកន្លែងធ្វើការបានកាត់បន្ថយបុគ្គលិក នៅពេលអាជីវកម្មម្តងបើកម្តងបិទ ហើយពុំសូវមានភ្ញៀវទៀតនោះ។
នៅពេលបាត់ការងារ ដែលលោកបានបម្រើការ ជាច្រើនឆ្នាំនៅដើមឆ្នាំ២០២១នេះ លោកបានងាកទៅចាប់អាជីពចាស់ ដែលលោកធ្លាប់រៀនចេះពីមុន នោះធ្វើជាងជួសជុលអេឡិចត្រូនិក ប៉ុន្តែផ្តើមរបរថ្មីលើជំនាញចាស់នេះ មិនកាក់កបសោះ។
លោកសារៈ បានរៀបរាប់ឱ្យដឹងថា៖ «ខ្ញុំបានផ្តើមមុខរបរជួសជុលឧបករណ៍អេទ្បិចត្រូនិក ដែលជាចំណេះចាស់របស់ខ្ញុំ តែដំបូងៗនេះចំណូលមិនទៀងទាត់ទេ ខែខ្លះរកចំណូលបាន ៣០០ដុល្លារអាមេរិក ពេលខ្លះក៏មិនបានដោយសារកក្តាជាច្រើន ដូចជាខ្វះដើមទុនទិញសម្ភារៈមកលក់ ឱ្យស្របតម្រូវការនិងម្យ៉ាងទៀត ទីតាំង ដែលលោកបើកអាជីវកម្មនេះ មិនល្អទៀត មិនស្ថិតនៅទីប្រជុំជន។ ដូច្នេះបើប្រៀបធៀបពេលបម្រើការងារនៅភោជនីយដ្ឋាន និងជាងជួសជុលឧបករណ៍អេទ្បិចត្រូនិច គឺខុសគ្នាជាងពាក់កណ្តាលឯណោះ ធ្វើឱ្យប៉ះពាល់ជាខ្លាំងដល់ជីវភាពរស់ នៅប្រចាំថ្ងៃខ្លាំងណាស់ នៅពេលនេះ»។
មន្ត្រីជាន់ខ្ពស់ក្រសួងទេសចរណ៍ធ្លាប់បានលើកឡើងថា យ៉ាងហោចណាស់ សណ្ឋាគារ ផ្ទះសំណាក់ និងភោជនីយដ្ឋានជាង ៩០ភាគរយ នៅកម្ពុជា បានផ្អាកដំណើរការក្នុងរយៈពេល នៃការរាតត្បាតជំងឺកូវីដ១៩នេះ។ បុគ្គលិក កម្មករ នៅក្នុងវិស័យសេវាកម្មទេសចរណ៍ នៅក្នុងមានអ្នកបម្រើការងារនៅសណ្ឋាគារ ភោជនីយដ្ឋាន សេវាកម្ម ឬទីភ្នាក់ងារទេសចរណ៍ប្រមាណជាង ៥ ម៉ឺននាក់ ក៏បាត់បង់ការងារ ដែលនៅក្នុងនោះទំនងបានរាប់បញ្ចូលលោក វណ្ណ សារៈ ដែលហើយ។
លោក វណ្ណៈ មានអាយុ ៤០ ឆ្នាំ និងមានកូនតូចៗបីនាក់នៅក្នុងបន្ទុក។ លោកបានជួលផ្ទះគេ ក្នុងតម្លៃ ១៥០ ដុល្លាររស់នៅនិងប្រកបរបរជាជាងអេឡិចត្រូនិកនេះ។ លោកមានស្រុកកំណើតនៅស្រុកពូក ខេត្តសៀមរាប។ លោកបានបន្តថា៖ «តាំងពីបាត់បង់ការងារ ដែលមានចំណូលគួរសមមកយើង បានចាយវាយត្បិតត្បៀត ទាំងលើចំណីអាហារនិងការស្លៀកពាក់។ របរថ្មីរបស់ខ្ញុំគ្រាន់ដោះទាល់ប៉ុណ្ណោះ បានហូបមួយគ្រាៗប៉ុណ្ណោះ ពីព្រោះយើងនៅខ្វះខាតច្រើន។ ខ្ញុំមិនហ៊ានពង្រីករបរនេះក្នុងកាលៈទេសៈ ដែលពលរដ្ឋជាទូទៅនៅសៀមរាននេះ មានការលំបាកនោះទេ។ អ្នកសៀមរាបបច្ចុប្បន្នលំបាកណាស់គ្រប់គ្នា ដូច្នេះយើងមិនអាចពង្រីកអ្វីដែលធំៗភ្លាមបានឡើយ»។
លោក វណ្ណៈ សារៈ និយាយបណ្តើរ ជួសជុលទូរទស្សន៍ដែលខូចមូយគ្រឿងបណ្តើរថា នៅពីមុខគ្រឿងបន្លាស់ទូរទស្សន៍ ម៉ាញ៉េចាស់ៗ បុរសដែលមានសម្បុរសរូបនេះ បានបញ្ជាក់ថា ផ្តើមអាជីពថ្មីនេះ លោកពុំទាន់មានម៉ូយច្រើនឡើយ។ ទោះបីជាងអេឡិកត្រូនិកជារបរមួយល្អ ប៉ុន្តែលោកស្រឡាញ់ខាងវិស័យទេសចរណ៍ជាង។ លោកសង្ឃឹមថា នៅពេលសៀមរាបទទួលភ្ញៀវទេសចរឡើងវិញ លោកនឹងវិលទៅប្រកបសេវាកម្ម ក្នុងវិស័យមាសប៉ៃតងកម្ពុជា វិញជាមិនខាន៕
ចែករំលែកព័តមាននេះ