សម្តេចតេជោប្រកាសដំណក់ប្រេងដំបូងនៅកម្ពុជាប្រហែលបរាជ័យ តែជោគជ័យរ៉ែមាស
- ភ្នំពេញ
រាជធានីភ្នំពេញ ៖ សម្តេចតេជោហ៊ុន សែននាយករដ្ឋមន្ត្រីបានប្រកាសឱ្យដឹងថា ដំណក់ប្រេងដំបូងរបស់កម្ពុជាដែលរំពឹងថានឹង
រាជធានីភ្នំពេញ ៖ សម្តេចតេជោហ៊ុន សែននាយករដ្ឋមន្ត្រីបានប្រកាសឱ្យដឹងថា ដំណក់ប្រេងដំបូងរបស់កម្ពុជាដែលរំពឹងថានឹងបានចំណូលជួយសេដ្ឋកិច្ចជាតិកាលពេលកន្លងមកនេះប្រហែលជាបរាជ័យហើយ។ តែយ៉ាងណាមិញកម្ពុជាហាក់ជោគជ័យទៅលើរឿងរ៉ែមាស ដោយសម្តេចបានពោលថា កម្ពុជាចំរ៉ាញ់មាស ១៣៧គីឡូ ក្នុង១ខែ ។
«ចំនួន ១៣៧គីឡូ ១ខែ មាសដែលកម្ពុជាចំរ៉ាញ់បាន នេះគេហៅថា មាសមិនទាន់បាន ១០០% ទេ តែទំហំបានមកពីមាសនេះ អាចរកចំណូលចូលជាតិបាន»។ នេះជាការគូសបញ្ជាក់របស់សម្តេចតេជោ ជាព្រឹកថ្ងៃទី ១ ខែសីហា ក្នុងពិធីបើកយុទ្ធនាការចាប់ផ្តើមចាក់វ៉ាក់សាំងប្រឆាំងជំងឺកូវីដ១៩ដល់កុមារចាប់ពីអាយុ១២ឆ្នាំដល់១៧ ឆ្នាំ នៅវិមានសន្តិភាព ដែលយុទ្ធនាការនេះគឺមានទាំងចៅៗរបស់សម្តេចតេជោ និងចៅៗរបស់ឥសរ្សជនកំពូលៗបានមកចូលរួមទទួលការចាក់វ៉ាក់សាំងនេះ ។
សម្តេចតេជោ បានប្រកាសអំពីប្រេងយ៉ាងដូច្នេះថា «ឥឡូវសុំនិយាយបន្តិចរឿងនេះ ថ្ងៃទី ២៩ខែធ្នូ ឆ្នាំ២០២០ ដែលយើងប្រកាសដំណក់ប្រេងលើកដំបូងរបស់កម្ពុជាប្រហែលជាបរាជ័យហើយ គ្រោងថាក្នុងមួយថ្ងៃបាន៥ពាន់៧០០បារ៉ែល ទីបំផុតមួយថ្ងៃបានតែ១ពាន់បារ៉ែល ។ ឥឡូវ ក្រុមហ៊ុននេះក្ស័យធន វាបូកថែមទាំងយកកប៉ាល់ដែលយើងបូមដាក់ រត់ចេញបាត់ទៅ»។ សម្តេចបន្តថាការរត់ចេញបាត់របស់កប៉ាល់នេះភាគីកម្ពុជាទប់ស្កាត់មិនទាន់ដោយគេបានចូលដល់ទឹកដីថៃ ហើយគេមានមេធាវីរបស់គេដោយបានជួលកប៉ាល់មកទុក ហើយពេលនេះបានយកប្រេងដែលបូមហើយយកទៅបាត់អស់។
សម្តេចបញ្ជាក់ថា៖«បាត់អស់ហើយអាប្រេងនឹង ប៉ុន្តែដោយប្លុកប្រេងនៅច្រើន យើងកំពុងតែបន្តខិតខំដើម្បីបន្តរុករកនិងធ្វើអាជីវកម្ម »។ សម្តេចក៏បានលើកឡើងឡើងថាទោះបីជាបាត់បង់អាជីវកម្មប្រេងក្តី ប៉ុនែ្តកម្ពុជាសំណាងបានអាជីវកម្មមាសមកវិញ ដោយត្រឹមរយៈពេលមួយខែ មាសចំរាញ់បានរហូតដល់១៣៧គីឡូ (មាស៩០ភាគរយ) ក្នុងនោះចំនួននេះមាសមួយដុំ ២០គីឡូ ១៥គីឡូ …។
សូមរម្លឹកថា សម្តេចនាយករដ្ឋមន្ត្រី ហ៊ុន សែន បានប្រកាសដាក់ឱ្យដំណើរការ ការដ្ឋានអាជីវកម្មនិងរោងចក្រចម្រាញ់ «រ៉ែមាស» ជាលក្ខណៈឧស្សាហកម្មលើកដំបូងរប ស់កម្ពុជា នៅតំបន់អូខ្វោវ ស្រុកកែវសីមា ខេត្តមណ្ឌលគិរី ចាប់ពីថ្ងៃទី២១មិថុនា ឆ្នាំ២០២១តទៅ។ រោងចក្រចម្រាញ់រ៉ែមាសដំបូងនៅកម្ពុជា អាចផលិតមាសសុទ្ធបា នប្រមាណ៣តោនក្នុង១ឆ្នាំ។ ដំណើរការនៃរោងចក្រចម្រាញ់រ៉ែមាសនេះ នឹងអនុវត្តឡើងដោយ ក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីតធីត Renaissance Minerals (Cambodia) Limited របស់ប្រទេសអូស្ត្រាលី ក្រោយចំណាយពេលរុករកធនធានធម្មជាតិនេះ អស់រយៈពេលប្រមាណ១៤ឆ្នាំមក។ Renaissance Minerals ជាក្រុមហ៊ុនទីមួយ ដែលបានចាប់ផ្តើមធ្វើអាជីវកម្មរ៉ែមាសនៅកម្ពុជា ជាលក្ខណៈឧស្សាហកម្មតាមស្តង់ដារអន្តរជាតិ ដោយបានផលិតចេញនៅថ្ងៃទី១០មិថុនានេះ ជាមាសដុំពាក់កណ្តាលសម្រេចដែលបានអត្រាមាស៩០ភាគរយ(Gold Dore Bars) ៕
ចែករំលែកព័តមាននេះ