មនុស្សមួយក្រុមមានប្រុស-ស្រីប្រមាណ៥ទៅ៦នាក់ បានជួបជុំផឹកស៊ីល្មើសនឹងបំរាមរបស់រដ្ឋបាលខេត្ត ត្រូវបានអាជ្ញាធរក្រុងចុះទៅធ្វើការអប់រំណែនាំអោយបញ្ឈប់ ដោយមិនអោយមានការជួបជុំ ដើម្បី
ខេត្តកំពង់ស្ពឺ ៖ បើតាមសេចក្តីរាយការណ៍បានឱ្យដឹងថា មនុស្សមួយក្រុមមានប្រុស-ស្រីប្រមាណ៥ទៅ៦នាក់ បានជួបជុំផឹកស៊ីល្មើសនឹងបំរាមរបស់រដ្ឋបាលខេត្ត ត្រូវបានអាជ្ញាធរក្រុងចុះទៅធ្វើការអប់រំណែនាំអោយបញ្ឈប់ ដោយមិនអោយមានការជួបជុំ ដើម្បីចៀសវាងការឆ្លងរាលដាលនៃជំងឺកូវីដ។
ក្រោយការណែនាំ អាជ្ញាធរមិនបានឃាត់មនុស្សទាំងនោះឡើយ ប៉ុន្តែនៅពេលដែលអាជ្ញាធរកំពុងតែណែនាំនោះ ស្រាប់តែក្រុមមនុស្សទាំងនោះបានថតរូបសមត្ថកិច្ច ថែមទាំងប្រើប្រាស់ពាក្យសំដីជេរប្រមាថមើលងាយមកលើសមត្ថកិច្ចទៀតផង ទោះបីជារងការប្រមាថពីសំណាក់ជនទាំងនោះក្តី ក៏សមត្ថកិច្ចគ្រាន់តែដកហូតសំភារៈមករក្សាទុកនៅសាលាក្រុងច្បារមន ដើម្បីចាត់ការតាមនីតិវិធីរដ្ឋបាលតែប៉ុណ្ណោះ។
ការចុះមកណែនាំនេះ គឺធ្វើឡើងកាលពីវរលាម៉ោង២យប់ ថ្ងៃទី៣១ ខែកក្កដា ឆ្នាំ២០២១ នៅចំណុចខាងកើតផ្សារនាគព័ន្ឋកំពង់ស្ពឺ ស្ថិតក្នុងភូមិពាណិជ្ជកម្ម សង្កាត់រកាធំក្រុងច្បារមន។ ហើយអាជ្ញាធរសុំមិនបបញ្ចេញអត្តសញ្ញាណក្រុមជនអ្នកជួបជុំផឹកស៊ីទាំងនោះឡើយ។
យោងតាមការបញ្ជាក់ពីលោកអភិបាលក្រុងច្បារមន បានអោយដឹងថា កាលពីវេលាម៉ោងខាងលើលោកបានទទួលសេចក្តីរាយការណ៍ថា មានមនុស្សមួយក្រុមបានជួបជុំផឹកស៊ីបង្កការរំខានដល់អ្នកជិតខាង។ ក្រោយទទួលសេចក្តីរាយការណ៍រួចមក លោកក៏បានដឹកនាំកម្លាំងគណៈបញ្ជាការឯកភាពក្រុង ចុះទៅធ្វើការណែនាំអោយបញ្ឈប់ការជួបជុំផឹកស៊ីនេះ ជាពិសេសលោកបានណែនាំអំពីការបង្ការចៀសវាងជំងឺកូវីដ១៩ និងក្រុមមនុស្សទាំងនោះទៀតផង។
លោកបានបន្តថា បន្ទាប់ពីលោកចុះទៅអប់រំណែនាំដល់ក្រុមមនុស្សទាំងនោះ ស្រាប់តែក្រុមមនុស្សទាំងនោះបានឡូឡារឹតតែខ្លាំង ហើយធ្វើការជេរប្រមាថមកលើកងកម្លាំងរបស់លោកផងដែរ ។ បើទោះជាបែបនេះក្តី លោកមិនបានតបតអ្វីទេ គ្រាន់តែធ្វើការអប់រំណែនាំឱ្យបែកគ្នាឈប់ឱ្យមានការជួបជុំផឹកស៊ី តែក្រុមមនុស្សទាំងនោះមិនត្រឹមតែមិនស្ដាប់ និងអនុវត្តតាមនោះទេ ថែមទាំងយកទូរស័ព្ទថតមកលើកម្លាំងរបស់លោក ក្នុងគោលបំណងមិនល្អណាមួយ ទោះបីជារងការជេរប្រមាថ និងថតរូបពីសំណាក់ជនទាំងនោះក្តី ក៏ក្នុងនាមជាថ្នាក់ដឹកនាំមិនបានតបតឡើយ គឺបានសុំត្រឹមឱ្យបំបែកគ្នាផឹកស៊ី ហើយដកហូតយកសម្ភារៈដូចជា តុ កៅអី និងធុងទឹកកក យកមករក្សាទុកនៅសាលាក្រុងច្បារមនតែប៉ុណ្ណោះ។
លោកអភិបាលបានបន្តថា ក្នុងនាមអាជ្ញាធរ លោកបានបញ្ជាក់ជូនផងដែរថា បើចង់បានរបស់ទាំងនោះទៅវិញ អាចមកយកទៅ តែត្រូវមានកិច្ចសន្យាមិនឱ្យលើកក្រោយទៀតទេ។ ហើយក្នុងនាមអាជ្ញាធរ លោកសូមសំណូមពរដល់បងប្អូនប្រជាពលរដ្ឋ សូមរក្សាគម្លាតសុវត្ថិភាព ចៀសវាងការឆ្លងរាលដាលនៃជំងឺកូវីដ១៩ ជាពិសេសត្រូវអនុវត្តតាមបំរាមគោចរដែលរដ្ឋបាលខេត្តដាក់ចេញត្រឹមម៉ោង៩យប់តទៅ៕
ចែករំលែកព័តមាននេះ