រាជធានីភ្នំពេញ ៖ ក្រសួងសុខាភិបាលបានប្រកាសឱ្យដឹងនៅមុននេះបន្តិចថា នៅថ្ងៃទី៣១ ខែកក្កដា ឆ្នាំ២០២១ នេះ រកឃើញករណីអ្នកឆ្លងថ្មីចំនួន៦៧១នាក់ ដែលក្នុងនោះ២៦៥នាក់ ជាករណីនាំចូលពីក្រៅប្រទេស ខណៈចំនួនអ្នកជំងឺទទួលបានការព្យាបាលជាសះស្បើយមានចំនួន៧៥៨ នាក់ និងស្លា.ប់ថ្មីចំនួន២៣នាក់ ។ ដូច្នេះបើយោងតាមប្រកាសរបស់ក្រសួងសុខាភិបាលចេញផ្សាយប្រចាំថ្ងៃបានឱ្យដឹងថា គិតពីថ្ងៃទី ១ ដល់ថ្ងៃទី ៣១ ខែកក្កដា កម្ពុជាមានតួលេខអ្នកឆ្លងកូវីដ-១៩ សរុបចំនួន ២៦,៥៣០ នាក់ ដែលក្នុងនោះករណីនាំចូលពីក្រៅប្រទេសដែលភាគច្រើនជាពលករខ្មែរវិលត្រឡប់ពីប្រទេសថៃ ចូលកម្ពុជាវិញមានចំនួន ៨,១២២ នាក់ ។
ជាមួយគ្នានោះផងដែរ តូលេខអ្នកជំងឺទទួលមរណភាពពេញមួយខែកក្កដា គឺមានដល់ទៅ ៧៩២នាក់ ឬស្មើប្រមាណ ៥៥% នៃតួលេខអ្នកស្លាប់សរុបទូទាំងប្រទេស ។ ខណៈអ្នកជំងឺទទួលបានការព្យាបាលជាសះស្បើយពីសំណាក់គ្រូពេទ្យ ក៏មានចំនួនច្រើនគួរឱ្យកត់សម្គាល់ គឺ ២៥,៩៩៦ នាក់ ។
សូមបញ្ជាក់ថា ប្រទេសកម្ពុជាបានរកឃើញករណីជំងឺកូវីដ-១៩ដំបូងបំផុតនៅថ្ងៃទី ២៧ មករា ២០២០ ។ គិតមកដល់ពេលបច្ចុប្បន្ននេះ កម្ពុជាមានអ្នកឆ្លងកូវីដ-១៩ ទូទាំងប្រទេសសរុបឡើងដល់ ៧៧,៩១៤ នាក់ ក្នុងនោះ១០, ៨០២ នាក់ ជាករណីនាំចូល។ អ្នកជាសះស្បើយមាន៧០,៧៥៤ នាក់ និងស្លា.ប់សរុប ១,៤២០នាក់៕
ចែករំលែកព័តមាននេះ