កីឡាករ ប៉ែន សុគង់ ខំអស់ពីសមត្ថភាព តែត្រឹមខកចិត្តនៅអូឡាំពិក
រាជធានីភ្នំពេញ ៖ មានការបញ្ជាក់រួចមកហើយពីមន្ត្រីថ្នាក់ដឹកនាំថា វត្តមានរបស់កីឡាករកម្ពុជា នឹងមិនសង្ឃឹមសម្រាប់ការ
រាជធានីភ្នំពេញ ៖ មានការបញ្ជាក់រួចមកហើយពីមន្ត្រីថ្នាក់ដឹកនាំថា វត្តមានរបស់កីឡាករកម្ពុជា នឹងមិនសង្ឃឹមសម្រាប់ការដណ្ដើមបានមេដាយនោះទេ ដោយសារតែកីឡាករអូឡាំពិកប្រជុំសុទ្ធតែកីឡាករល្បីៗពាសពេញពិភពលោក។ ប៉ុន្តែអ្វីដែលមានភាពជឿជាក់ គឺនឹងធ្វើអោយបានល្អនូវកំណត់ត្រាចាស់ ឬ អោយបានដូចដើម។ ផ្ទុយពីការតាំងចិត្ត ការប្រកួតរបស់កីឡាករកម្ពុជា ប៉ែន សុគង់ នៅអូឡាំពិកកាលពីព្រឹកថ្ងៃ៣១ កក្កដា មុននេះ បែរជារត់ល្បឿនចាញ់កំណត់ត្រាចាស់របស់ខ្លួនទៅទៀត។
យោងតាមលទ្ធផល លោកសម្រេចក្នុងការរត់ចម្ងាយ បានថិរវេលា១១.០២វិនាទីក្នុងការប្រកួតលើវិញ្ញាសារត់ល្បឿនចម្ងាយ១០០ម៉ែត្រនាព្រឹត្តិការណ៍កីឡាអូឡាំពិកក្រុងតូក្យូ អូឡាំពិក ខណៈដែលកំណត់ត្រាចាស់របស់លោក គឺ ១០.៨៧វិនាទី នាព្រឹត្តិការណ៍កីឡាស៊ីហ្គេម កាលពីឆ្នាំ២០១៩ នៅហ្វីលីពីន។ លទ្ធផលដែលបានបង្ហាញ បានធ្វើអោយលោកខកចិត្តយ៉ាងខ្លាំង ហើយក៏ធ្វើអោយជំនឿចិត្តរបស់លោក វ៉ាត់ ចំរើន ដែលជាអ្នកដឹកនាំបរាជ័យផងដែរ ដែលត្រូវបានហ្វេនហ្វេនមួយចំនួន ចាត់ទុកថាគឺជាលទ្ធផលមិនបានល្អ។ យ៉ាងណាមិញ គេនៅតែមានការកោតសរសើរចំពោះ ប៉ែន សុគង់ ដែលប្រឹងអស់ពីសមត្ថភាពហើយ តែនៅតែបរាជ័យ សូម្បីគម្រោងរត់អោយបានល្អជាងនូវកំណត់ត្រាចាស់។ ការបរាជ័យមួយនេះ បានធ្វើអោយឱកាសឡើងវគ្គបន្តដើម្បីទៅដណ្ដើមមេដាយរបស់កីឡាកររត់ប្រណាំងកម្ពុជា មិនអាចទៅរួច។ ហើយលទ្ធផលរបស់លោកនៅអូឡាំពិកនេះ ដ្បិតថាជាលទ្ធផលដើរថយក្រោយ តែក៏បង្ហាញពីការប្រឹងអស់ពីសមត្ថភាពរបស់លោកផងដែរ។
គួរបញ្ជាក់ផងដែរថា បើធៀបត្រឹមតែកីឡាកររត់ប្រណាំងរបស់កីឡាករកម្ពុជា ដែលកម្ពុជាធ្លាប់បានបញ្ជូនទៅអូឡាំពិកដូចគ្នា គឺ ប៉ែន សុគង់ ស្ថិតក្នុងចំណុចកណ្ដាល ដ្បិត កាលពីឆ្នាំ១៩៧២ នាព្រឹត្តិការណ៍នៅអាល្លឺម៉ង់ខាងលិច កីឡាករ ម៉ៅ សំផុន សម្រេចបានក្នុងថិរវេលា ១០.៩៥វិនាទី។ នៅឆ្នាំ២០០៤ នាក្រុងអាតែន ប្រទេសក្រិក កីឡាករ ភោគ សុភ័ក្ត្រ សម្រេចបានក្នុងថិរវេលា ១១.៥៦វិនាទី សម្រាប់វិញ្ញាសារដូចគ្នា។
ផ្អែកតាមលទ្ធផលដែលទើបបញ្ចប់ ក្នុងការប្រកួតអូឡាំពិកក្រុងតូក្យូមុននេះ កីឡាករ ប៉ែន សុគង់ បញ្ចប់ចំណាត់ថ្នាក់របស់ខ្លួន ក្នុងលំដាប់លេខ៦ក្នុងចំណោមអត្តពលិក៩នាក់។ មានតែកីឡាករ មកពីប្រទេស ស៊ីមបាវ៉េ Makusha Ngoni, កីឡាករតូហ្គោ Dabla Fabrice និងកីឡាករនីហ្គារ៉ាហ្គោ Romero Yeykell Eliuth ដែលអាចឈានទៅវគ្គបន្ត។
បច្ចុប្បន្នកីឡាករហ្សាម៉ៃអ៊ីក Ulsan Bolt គឺជាម្ចាស់កំណត់ត្រាលើវិញ្ញាសារត់ល្បឿនចម្ងាយ១០០ម៉ែត្រ គឺ ៩.៦៣វិនាទីក្នុងព្រឹត្តិការណ៍អូឡាំពិក និងជាម្ចាស់កំណត់ត្រាពិភពលោកក្នុងថិរវេលា៩.៥៨វិនាទីផងដែរ៕
ចែករំលែកព័តមាននេះ