រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សហភាពអឺរ៉ុបប្រចាំនៅកម្ពុជា កាលពីព្រឹកថ្ងៃទី១១ មីនា ២០១១ ដែលកោះសន្តិភាពទទួលបានឱ្យដឹងថា ដើម្បីអបអរសាទរទិវានារីអន្តរជាតិ ខួបលើកទី១០០ ប្រតិភូសហភាពអឺរ៉ុបប្រចាំនៅប្រទេសកម្ពុជា បានសហការជាមួយអង្គការមិត្តសំឡាញ់កាលពីថ្ងៃទី១១ មីនា ២០១១ បានរៀបចំពិធីប្រកួតគំនូរកុមារមានលក្ខណៈអន្តរជាតិសម្រាប់ឆ្នាំ២០១១ ស្តីពីសមភាពយែនឌ័រ នៅវិទ្យាល័យព្រះស៊ីសុវត្ថិ រាជធានីភ្នំពេញ ។
លោករ៉ាហ្វាអែល ដូចាវ ម៉ូរ៉េណូ ភារធារីសហភាពអឺរ៉ុបប្រចាំនៅកម្ពុជា និងលោកពិត ចំណាន រដ្ឋលេខាធិការក្រសួងអប់រំ យុវជន និងកីឡា បានអញ្ជើញចូលរួមជាអធិបតីក្នុងពិធីនេះ។ មានតំណាងសាលាបឋមសិក្សាប្រមាណ៦០ នៅរាជធានីភ្នំពេញ និងសិស្សានុសិស្សប្រមាណ៦០នាក់នៅរាជធានីភ្នំពេញ និងសិស្សានុសិស្សជាង១០០នាក់ មកពីវិទ្យាល័យព្រះស៊ីសុវត្ថិចូលរួម ។
លោករ៉ាហ្វាអែល ដូចាវ ម៉ូរ៉េណូ បានថ្លែងថា លោកសប្បាយរីករាយណាស់ ដោយបានឃើញមានថ្នាក់ដឹកនាំក្រសួងអប់រំ និងសិស្សានុសិស្សជាច្រើនបានចូលរួមក្នុងពិធីប្រកួតគំនូរកុមារអន្តរជាតិស្តីពីសមភាពយែនឌ័រ សម្រាប់ឆ្នាំ២០១១ នេះ ដើម្បីអបអរសាទរខួបទី១០០ នៃទិវានារីអន្តរជាតិ ។ លោកបន្តថា «សិទ្ធិនារីគឺជាសិទ្ធិមនុស្ស ដូច្នេះសហភាពអឺរ៉ុបត្រូវតែមានការប្តេជ្ញាចិត្តយូរអង្វែង ដើម្បីលើកកម្ពស់» ។ ក្នុងន័យនេះ សហភាពអឺរ៉ុបបានប្រឹងប្រែងយ៉ាងខ្លាំងដាក់បញ្ចូលអាទិភាព និងសេចក្តីត្រូវការចាំបាច់នានាសម្រាប់ស្ត្រី និងបុរស នៅក្នុងគ្រប់គោលនយោបាយសំខាន់ៗ និងសហការអភិវឌ្ឍក្រៅតំបន់របស់ខ្លួន ៕
ចែករំលែកព័តមាននេះ