ខេត្តកណ្តាល ៖ អគ្គីភ័យមួយបានឆាបឆេះសាលាធម្មសភានៅវត្តពោធិព្រឹក្សស្ថិតក្នុងភូមិលេខ៥ ឃុំស្វាយលំ ស្រុកស្អាង កាលពីវេលាម៉ោង១២និង១៥នាទីថ្ងៃត្រង់ ថ្ងៃទី៣១ មីនា ២០១១ បណ្តាលឱ្យឆេះពិតាន និងដំបូលស្ទើរទាំងស្រុង ផ្អើលព្រះសង្ឃ និងតាអាចារ្យរត់រកទឹក និងទាក់ទងហៅឡានទឹក។ មូលហេតុដែលនាំឱ្យកើតអគ្គីភ័យនេះត្រូវបានគេអះអាងជាជំហានដំបូងថា បណ្តាលមកពីឆ្លងចរន្តអគ្គិសនី នៅឯបន្ទប់មួយខាងត្បូងបល្ល័ង្កព្រះ ។
សាលាធម្មសភាដែលឆេះនេះមានទំហំ១៧ម៉ែត្រគុណនឹង២០ម៉ែត្រ ធ្វើអំពីសសរបេតុង ប្រក់ក្បឿង ។ បន្ទាប់ពីកើតហេតុ ប្រមាណ៣០នាទី រថយន្តពន្លត់អគ្គីភ័យរបស់ស្នងការដ្ឋាននគរបាលខេត្តកណ្តាល២គ្រឿងបានទៅបាញ់ទឹកពន្លត់ ប៉ុន្តែភ្លើងបានឆាបឆេះស្ទើរទាំងស្រុងទៅហើយ ។ សាក្សីបានឱ្យដឹងថា បន្ទាប់ពីព្រះសង្ឃឆាន់រួចរាល់ (ព្រះសង្ឃឆាន់នៅលើសាលាធម្មសភា) ហើយបាននិមន្តចេញប្រហែលមួយម៉ោង គេឃើញផ្សែងហុយចេញពីបន្ទប់មួយនៅចំហៀងខាងត្បូងបល្ល័ង្កព្រះ រួចឆេះជាអណ្តាតភ្លើងយ៉ាងឆាប់រហ័ស រាលដាលដល់ពិតានខាងលើ និងបាក់ដំបូលធ្លាក់ៗមកក្រោម ៕
ចែករំលែកព័តមាននេះ