កាលពីពាក់កណ្តាលខែធ្នូ ២០១៥ ក្មេងប្រុសអាយុ១៥ឆ្នាំម្នាក់ នៅក្រុងស៊ុយរិក ប្រទេសស្វ៊ីស ត្រូវប៉ូលិសទាក់ទងឱ្យទៅទទួលប្រាក់១០០០ហ្វ្រង់ស្វ៊ីស ឬប្រហែល១៦០០ដុល្លារ ដែលរូបគេរើសបានកាលពី៥ឆ្នាំមុន ក្រោយពីគ្មាននរណាម្នាក់អះអាងថា ជាម្ចាស់ ។
«រ៉យទ័រ» ផ្សាយថា ពេលកុមារនោះមានអាយុ១០ឆ្នាំ រើសបានលុយតាមដងផ្លូវ ប៉ុន្តែបច្ចុប្បន្នគេមានអាយុ១៥ឆ្នាំហើយ ។ លោកថូមា៉ស់ វីនកេលមា៉ន នាយកផ្នែកសន្តិសុខសាធារណៈនៅក្រុងស៊ុយរិក បញ្ជាក់ប្រាប់សារព័ត៌មានថា «គេចិត្តល្អ កុមារមានអាយុ១៥ឆ្នាំ រមែងដឹងថា តើគេត្រូវការធ្វើអ្វីខ្លះទៅលើទឹកប្រាក់១៦០០ដុល្លារនេះ?» ។
តាមច្បាប់របស់ស្វ៊ីស ទ្រព្យសម្បត្តិដែលបុគ្គលណាម្នាក់ជ្រុះបាត់នៅទីសាធារណៈ នឹងក្លាយជាវត្ថុរបស់អ្នកដែលរើសបាន ប្រសិនបើគ្មាននរណាម្នាក់អះអាងថា ជាម្ចាស់ក្នុងរយៈពេល៥ឆ្នាំ ប៉ុន្តែប្រសិនបើទ្រព្យមានតម្លៃ ដែលប្រទះឃើញនៅលើរថភ្លើង ឬនៅលើត្រាំវ៉ៃ នឹងក្លាយជាទ្រព្យរបស់អ្នកបម្រើការលើរថភ្លើង ៕
ចែករំលែកព័តមាននេះ