ប្រសិនបើយើងនិយាយអំពីរថយន្តដែលមានតម្លៃថ្លៃជាងគេក្នុងលោក នោះប្រហែលជាមានមនុស្សមិនតិចទេ ដែលស្គាល់ម៉ាករថយន្តទាំងនោះ ។ ហើយចង់បញ្ជាក់ដែរថា យើងគ្រប់គ្នាពិតជាអាចស្រមៃថាមានវា និងស្រឡាញ់វាដោយសារតែសម្រស់របស់វា ។ ក្រុមហ៊ុនជាច្រើន ដែលផលិតរថយន្តថ្លៃបំផុតក្នុងលោក ខ្លះផលិតចេញត្រឹមតែមួយ ឬពីរ ឬ ១០ គ្រឿងប៉ុណ្ណោះ មានដូចជាម៉ាក ៖ Bugatti, Ferrari, Rolls-Royce ។ល។ ហើយរថយន្តទាំងនេះប្រហែលជារថយន្តលំដាប់ថ្នាក់អភិជន និងសេដ្ឋីៗ ដែលមានលុយចាយរាប់លានចាយមិនអស់គរចោល ។ តោះ ! មកមើលប្រភេទរថយន្តថ្លៃបំផុតលើលោក ៖
លំដាប់ថ្នាក់ថ្លៃជាងគេ ទី ១ ៖ Rolls-Royce Boat Tail បច្ចុប្បន្នឡាននេះមានតម្លៃ 28 លានដុល្លារ ។ ក្រុមហ៊ុនផលិតឡានម៉ាក Rolls-Royce បានត្រឡប់មកវិញជាមួយនឹងការច្នៃម៉ូដដ៏អស្ចារ្យ និងប្រណីតតាមបែបស្តង់ដារ និងមានរាងដូចកន្ទុយទូក ។ Boat Tail ត្រូវបានស្នងដំណែងពី Sweptail ក្នុងឆ្នាំ 2017 ហើយត្រូវបានគេដឹងថា លក់ក្នុងតំលៃ 12.8 លានដុល្លារ ។ Boat Tail មានរចនាសន្ទះពីរនៅខាងក្រោយ ដែលមានតែមួយគត់ នៅខាងក្នុងមានការរចនាតាមបែបលក្ខណៈប្រពៃណី ដែលល្អឥតខ្ចោះ នៅខាងក្រោយរថយន្ត អ្នកអាចបើកបន្ទះទាំងពីរដែលក្នុងនោះមាន ទូរទឹកកក ស្រាសំប៉ាញ និងឆ័ត្រ នៅពេលអ្នកអង្គុយលម្ហែក្រោមពន្លឺព្រះអាទិត្យ ។ ទោះបីជា Rolls-Royce មិនបានប្រកាសពីតម្លៃជាផ្លូវការ របស់រថយន្តនេះក៏ដោយ ក៏មានពាក្យចចាមអារាមថា Boat Tail តម្លៃថ្មី ២៨ លានដុល្លារ ។
លំដាប់ថ្នាក់ថ្លៃជាងគេ ទី ២ ៖ Bugatti La Voiture Noire មានតម្លៃ 18.7 លានដុល្លារ នេះបន្ទាប់ពីគិតលើការបង់ពន្ធរួចហើយ ឡានម៉ាកនេះតែងតែថ្លៃបំផុតក្នុងលំដាប់ពិភពលោក ។ វាត្រូវបានផលិតឡើងត្រឹមតែ ៦ គ្រឿងប៉ុណ្ណោះ ដែលជាប្រភេទរថយន្តផ្ទាល់ខ្លួន (Type 57 SC Atlantic)។
លំដាប់ថ្នាក់ថ្លៃជាងគេ ទី ៣៖ Bugatti Centodieci តម្លៃ 9 លានដុល្លារ វាបានបង្ហាញខ្លួនជាលើកដំបូងនៅ Pebble Beach នៃសប្តាហ៍រថយន្ត កាលពីឆ្នាំមុន ដោយបានបង្ហាញនូវម៉ូឌែលដ៏កម្រ និងថ្លៃបំផុតមួយនេះដល់ពិភពលោក ។ វាជារថយន្តដែលផលិតដោយមានការកំណត់ចំនួន (Limited Edition) ដែលមានត្រឹមតែ ១០ គ្រឿងប៉ុណ្ណោះ ។ រថយន្តនេះផងដែរ គឺជាការត្រលប់ទៅរកការតរំឭកដល់រថយន្តម៉ាក Bugatti EB110 ។ ក្នុងពេលជាមួយគ្នានេះ រថយន្តផលិតឡើងក្នុងគោលបំណងអបអរសាទរខួប ១១០ ឆ្នាំ របស់ Bugatti ៕ ប្រភព ៖ motor1
ចែករំលែកព័តមាននេះ