ខេត្តបន្ទាយមានជ័យ ៖ បុរសម្នាក់បានរងរបួសធ្ងន់ ឯជនដៃដល់ព្យាយាមរត់គេចខ្លួន តែត្រូវបានកម្លាំងនគរបាលស្ទាក់ចាប់បាន បន្ទាប់ពីកើតមានអំពើហិង្សាដោយចេតនា ស្ថិតនៅចំណុចគោកស្វាយចម្ងាយប្រហែល២.០០០ម៉ែត្រ ខាងកើតភូមិខ្វាវលិច ឃុំស្វាយចេក ស្រុកស្វាយចេក…
ខេត្តបន្ទាយមានជ័យ ៖ បុរសម្នាក់បានរងរបួសធ្ងន់ ឯជនដៃដល់ព្យាយាមរត់គេចខ្លួន តែត្រូវបានកម្លាំងនគរបាលស្ទាក់ចាប់បាន បន្ទាប់ពីកើតមានអំពើហិង្សាដោយចេតនា ស្ថិតនៅចំណុចគោកស្វាយចម្ងាយប្រហែល២.០០០ម៉ែត្រ ខាងកើតភូមិខ្វាវលិច ឃុំស្វាយចេក ស្រុកស្វាយចេក ខេត្តបន្ទាយមានជ័យ ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេកបានឲ្យដឹងថា៖ ដំបូងមនុស្សមួយក្រុមមានចំនួន០៥នាក់មាន៖១/-ឈ្មោះ ច្រឹក ឆវន្ត អាយុ២២ឆ្នាំ, ២/-ឈ្មោះ វុធ រ៉ាវីន ប្រុស អាយុ២៩ឆ្នាំ, ៣/-ឈ្មោះ ហួ ម៉ាប់ ប្រុសអាយុប្រហែល៣១ឆ្នាំ, ៤/-ឈ្មោះច្រឹក ឆវ៉ាត់ប្រុសអាយុ២៥ ឆ្នាំទាំង០៤នាក់ មានទីលំនៅបែកចានចាស់ ឃុំស្វាយចេក , ៥/-ឈ្មោះ ងោល ប្រុស អាយុប្រហែល៣០ឆ្នាំនៅភូមិតាអុងលិចឃុំស្វាយចេក ។
លោកអធិការបានបញ្ជាក់ថា៖ មុនពេលកើតហេតុពួកគេទាំង០៥នាក់ បាននាំគ្នាទៅជីកគាស់ដើមធ្នង់នៅចំណុចគោកស្វាយចម្ងាយប្រហែល២.០០០ម៉ែត្រ ខាងកើតភូមិខ្វាវលិច ឃុំស្វាយចេក នៅពេលកំពុងតែជីកគាស់គល់ធ្នង់នោះ ឈ្មោះ ងោល ជាជនរងគ្រោះ បានរអ៊ូរដាក់ឈ្មោះច្រឹក ឆវ៉ាត់ ថាមិនសូវជួយជីក ពេលដែលបានលុយមិនត្រូវយកស្មើគេ ដែលជាអ្នកខំជីកនោះទេ ។
ដោយឮដូច្នោះ ឈ្មោះច្រឹក ឆវ៉ាត់ ជាជនដៃខឹងក៏បានវាយទៅលើឈ្មោះង៉ោល ដែលកំពុងជីកគាស់គល់ធ្នង់ ដោយពុំដឹងខ្លួនចំនួន០២ដងចបកាប់ត្រូវចំក្បាល បណ្តាលឲ្យបែកហូរឈាមជោកខ្លួន។ ក្រោយពេលធ្វើសកម្មភាពរួច ជនដៃដល់បានរត់គេចខ្លួន ។
បន្ទាប់ពីទទួលបានព័ត៌មានភ្លាម កម្លាំងនគរបាលស្រុស្វាយចេក បានចេញអន្តរាគមន៍ចាប់ឃាត់ខ្លួនជនដៃដល់បានបញ្ជូនទៅអធិការដ្ឋាននគរបាលស្រុកស្វាយចេក ដើម្បីកសាងសំណុំរឿងបញ្ជូនទៅស្នងការដ្ឋាននរបាលខេត្ត ចាត់ការបន្តតាមនិតិវិធីច្បាប់ ចំណែកជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្ត មិត្តភាពកម្ពុជា-ជប៉ុន នៅស្រុកមង្លបូរី ៕
ចែករំលែកព័តមាននេះ