រាជធានីភ្នំពេញ ៖ កម្លាំងគណៈបញ្ជារការឯកភាពខណ្ឌមានជ័យ បានចុះត្រួតពិនិត្យ និងណែនាំ ភោជនីយដ្ឋានមួយកន្លែង ដែលលួចបើកបន្ទប់ខារ៉ាអូខេ ផ្គើននឹងសេចក្ដីសំរេចរបស់រដ្ឋបាលរាជធានីភ្នំពេញ ក្នុងការចូលរួមទប់ស្កាត់ នៃការឆ្លងរាលដាលនៃជំងឺកូវីដ១៩ កាលពីវេលាម៉ោង៩យប់ ថ្ងៃទី២៩ ខែកក្កដា ឆ្នាំ២០២១ នៅក្នុងទីតាំងយីហោ «អាហារដ្ឋាន សម្រស់បុប្ផា ២៧១» ដែលស្ថិតនៅតាមបណ្ដោយផ្លូវលេខ២៧១ សង្កាត់ចាក់អង្រែលើ ខណ្ឌមានជ័យ ។
ម្ចាស់ទីតាំងមានឈ្មោះ សូឈុន សុវណ្ណធីតា ភេទស្រី អាយុ២៨ឆ្នាំ ស្នាក់នៅក្នុងហាង ស្ថិតក្នុងសង្កាត់ចាក់អង្រែលើ ខណ្ឌមានជ័យ ។
បើតាមសមត្ថកិច្ចអោយដឹងថា មុននឹងអាជ្ញាធរមានសមត្ថកិច្ច ចុះបិទទីតាំងនេះ គឺកម្លាំងគណៈបញ្ជាការឯកភាពខណ្ឌមានជ័យ ដែលដឹកនាំដោយលោក មា សុភាព អភិបាលរង បានដឹកនាំកម្លាំងចំរុះចុះល្បាត ត្រួតពិនិត្យ និងណែនាំបងប្អូនប្រជាពលរដ្ឋដែលប្រកបរបរលក់ដូរផ្សេងៗ ជាពិសេសភោជនីយដ្ឋាន សូមផ្អាកជាបណ្ដោះអាសន្នរយៈពេល១៤ថ្ងៃ តាមសេចក្ដីសម្រេចរបស់រដ្ឋបាលរាជធានីភ្នំពេញ ក្នុងការចូលរួមទប់ស្កាត់ នៃការឆ្លងរាលដាលនៃជំងឺកូវីដ១៩ ។
សមត្ថកិច្ចបន្តថា លុះកម្លាំងមកដល់ទីតាំងខាងលើ ក៏ឃើញមានការប្រមូលផ្ដុំក្នុងហាង «សម្រស់បុប្ផា ២៧១» ពេលនោះកម្លាំងបានចុះត្រួតពិនិត្យ ក៏ឃើញមានបើកបន្ទប់ខារ៉ាអូខេ ដោយមានមនុស្សចំនួន៧ ក្នុងនោះមានប្រុស៤ និងស្រី៣នាក់ ។ ដោយឃើញបែបនេះ កម្លាំងសមត្ថកិច្ចបានអោយភ្ញៀវគិតលុយឲ្យម្ចាស់ហាង ហើយធ្វើការអប់រំណែនាំ ស្តីពី ការទប់ស្កាត់ការឆ្លងរាលដាលនៃជំងឺកូវីដ១៩ ទើបអោយត្រឡប់ទៅផ្ទះវិញ ។
ចំណែកទីតាំងខាងលើវិញ ត្រូវបានសមត្ថកិច្ចពិនិត្យឃើញថា អត់មានលិខិតអនុញ្ញាតត្រឹមត្រូវនោះទេ ទើបអាជ្ញាធរសំរេចបិទទីតាំងនេះជាបណ្តោះអាសន្ន ដើម្បីរង់ចាំការសម្រេចពីអភិបាលខណ្ឌមានជ័យ ទើបអនុញ្ញាតអោយបើកអាជីវកម្មវិញ ៕
ចែករំលែកព័តមាននេះ