នៅវេលាម៉ោង១២អធ្រាត្រ នៅថ្ងៃទី២៩ ខែកក្កដា ឆ្នាំ២០២១នេះ កម្លាំងគណៈបញ្ជាការឯកភាពខណ្ឌទួលគោក បានដឹកនាំ និងបញ្ជាផ្ទាល់ដោយលោក ឯក ឃុនដឿន អភិបាលនៃគណៈអភិបាលខណ្ឌទួលគោក ចុះធ្វើការណែនាំអាជីវករ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា នៅវេលាម៉ោង១២អធ្រាត្រ នៅថ្ងៃទី២៩ ខែកក្កដា ឆ្នាំ២០២១នេះ កម្លាំងគណៈបញ្ជាការឯកភាពខណ្ឌទួលគោក បានដឹកនាំ និងបញ្ជាផ្ទាល់ដោយលោក ឯក ឃុនដឿន អភិបាលនៃគណៈអភិបាលខណ្ឌទួលគោក ចុះធ្វើការណែនាំអាជីវករលក់ដូរបន្លែ ផ្លែឈើនៅផ្សារដើមគ និងអាជីវករដែលដាក់លក់នៅតាមដងផ្លូវសាធារណៈ មានដូចជា ផ្លូវម៉ៅសេទុង, ផ្លូវព្រះមុន្នីរ៉េត, ផ្លូវ២៣០ និងផ្លូវមួយចំនួនទៀតនៅក្នុងបរិវេណផ្សារដើមគ។
សេចក្តីរាយការណ៍បន្តថា ការអនុវត្តនេះ គឺតាមសេចក្ដីសម្រេចលេខ ២៤៩/២១ សសរ ស្ដីពីការដាក់ចេញនូវវិធានការរដ្ឋបាល នៅក្នុងភូមិសាស្ត្ររាជធានីភ្នំពេញ សម្រាប់រយៈពេល១៤ថ្ងៃ គិតចាប់ពីម៉ោង ២៣និង៥៩នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ដើម្បីប្រយុទ្ធ ប្រឆាំង និងទប់ស្កាត់ការឆ្លងរាលដាលនៃជំងឺកូវីដ១៩។
ហើយការចុះណែនាំខាងលើនេះ គឺតម្រូវឲ្យអាជីវករទាំងអស់ត្រូវផ្អាកបណ្តោះអាសន្ននូវការលក់បន្លែផ្លែឈើនៅលើតាមដងផ្លូវសាធារណៈដែលមិនមានរបៀបរៀបរយ។ ដោយអនុញ្ញាតឲ្យអាជីវករធ្វើការលក់នៅតាមផ្ទះ ឬតូបរបស់ខ្លួន និងត្រូវអនុវត្តវិធានការសុវត្ថិភាពផ្នែកសុខាភិបាលឲ្យបានម៉ឺងម៉ាត់ ជាពិសេសត្រូវប្រកាន់ខ្ជាប់ជានិច្ចនូវវិធានការ «៣កុំ និង៣ការពារ» របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕
ចែករំលែកព័តមាននេះ