រាជធានីភ្នំពេញ ៖ នៅលើសង្វៀនទូរទស្សន៍អាស៊ីអាគ្នេយ៍កាលពីល្ងាចថ្ងៃសៅរ៍ទី២៦ ធ្នូ នៅក្នុងព្រឹត្តិការណ៍ប្រដាល់K-Cementកីឡាករឯម ខ្លឹមខ្មៅ បានទទួលបរាជ័យជាថ្មីទៀតហើយនៅក្រោមកណ្ដាប់ដៃកីឡាករថៃ
រាជធានីភ្នំពេញ ៖ នៅលើសង្វៀនទូរទស្សន៍អាស៊ីអាគ្នេយ៍កាលពីល្ងាចថ្ងៃសៅរ៍ទី២៦ ធ្នូ នៅក្នុងព្រឹត្តិការណ៍ប្រដាល់K-Cementកីឡាករឯម ខ្លឹមខ្មៅ បានទទួលបរាជ័យជាថ្មីទៀតហើយនៅក្រោមកណ្ដាប់ដៃកីឡាករថៃនៅក្នុងជំនួបប៉ះគ្នានោះ ។ លទ្ធផលដែលបានស្ដែងឡើង បានធ្វើឲ្យមានព្យុះភ្លៀងកាន់តែអាក្រក់ទៅលើកីឡាកររូបនេះ បន្ទាប់ពីពេលកន្លងមកមានការរិះគន់រួចទៅហើយ ។
គ្មានអ្នកណាមិនបង្ហាញទស្សនៈរិះគន់នោះទេ បន្ទាប់ពីអតីតម្ចាស់ខ្សែក្រវាត់ឯម ខ្លឹមខ្មៅ មកពីក្លិបឫទ្ធីពោធិសែនជ័យ ត្រូវកីឡាករថៃឈ្មោះSuper Chhai វាយឲ្យសន្លប់ក្នុងទឹកទី៣។ បើទោះជាវីដេអូសាចុះសាឡើងបានបង្ហាញច្បាស់ថា កីឡាករថៃជាជើងខ្លាំងមានសមត្ថភាពវាយត្រូវគោលដៅក្នុងពេលភាគីកម្ពុជាភ្លាត់ស្នៀត ក៏ក្រុមអ្នកទស្សនានៅតែយល់ថានោះជាលទ្ធផលដែលបានកើតឡើងពីបញ្ហាធ្លាក់ដៃរបស់ឯម ខ្លឹមខ្មៅដោយផ្ទាល់ ។ នៅបរិវេណនៃច្រកចេញរបស់ស្ថានីយទូរទស្សន៍អាស៊ីអាគ្នេយ៍ អ្នកគាំទ្របានបន្លឺសំឡេងឡើងខ្ទររេញថា កីឡាករឯម ខ្លឹមខ្មៅ ប្រកួតលែងកើត និងបានវាយតម្លៃថាហេតុផលនៃការភ្លាត់ស្នៀតអាចបណ្ដាលមកពីគេមិនបានហ្វឹកហាត់ទៀងទាត់ ឬអាចមានចេតនាចង់ឲ្យមានរឿងភ្លាត់ស្នៀតនៅលើសង្វៀន ។
ចំពោះការវិភាគរបស់អ្នកគាំទ្រដែលបានបន្លឺឡើងនេះ នៅមិនទាន់មានការអះអាងថាមានចំណុចត្រឹមត្រូវត្រង់ណានោះទេ ។ ប៉ុន្តែយោងតាមសមត្ថភាពជាក់ស្ដែងរបស់កីឡាកររូបនេះ គឺឯម ខ្លឹមខ្មៅ ពិតជាមិនដូចមុនមែន ។ នៅទឹកទី១ និងទឹកទី២ គេឃើញកីឡាកររូបនេះ នៅប្រើពេលស្ទាបស្ទង់គូប្រកួតដោយញញើតញញើមនៅឡើយមិនដូចពេលគេឡើងកូដនោះឡើយ។ នៅទឹកទី៣គេចាប់ផ្ដើមស្ទុះមួយដង្ហើម ក៏ត្រូវកីឡាករថៃ Super Chhai វាយកែងត្រូវគុម្ពថ្គាម និងចំណុចសំខាន់ធ្វើឲ្យប្រកាច់លើរេញងើបលែងរួចតែម្ដង ។
ក្រុមអ្នកវិភាគបានដាក់ការសង្ស័យថា ឯម ខ្លឹមខ្មៅ មានចេតនាធ្វើឲ្យភ្លាត់ស្នៀតដោយសារតែការវាយត្រូវនៅពេលនោះ គឺគេមិនបានគេច និងចូលធ្លោទៅរងកណ្ដាប់ដៃរបស់គូប្រកួតតែម្ដង ។ ប៉ុន្តែក្រុមអ្នកហែហមកីឡាកររូបនេះបានសម្ដែងប្រតិកម្មថា ភាពរហ័សរបស់ Super Chhai គឺជាហេតុផលមិនអាចឲ្យឯម ខ្លឹមខ្មៅ គេចទាន់ និងជាហេតុផលធ្វើឲ្យគេសន្លប់ដោយមិនមែនលក់ខ្លួននោះទេ ។ ឯការលើកឡើងថាគេមិនបានហ្វឹកហាត់ដិតដល់នោះ ក្រុមនោះហាក់ឆ្លើយមិនរួចទេ ។
ផ្អែកតាមលទ្ធផលនោះ ទោះជាឯម ខ្លឹមខ្មៅ អាចគេចរួចពីការចោទប្រកាន់ថាមានចេតនាធ្វើឲ្យភ្លាត់ ប៉ុន្តែសម្រាប់ការវិភាគថាគេប្រកួតមិនបានល្អព្រោះតែគ្មានការទទួលខុសត្រូវលើការហ្វឹកហាត់នោះ ហាក់ពិបាកដោះសារបន្តិចហើយ ។ មិនថាអ្នកទស្សនា និងអ្នករៀបចំការប្រកួតនោះទេ សុទ្ធតែបានលើកឡើងថា ការប្រកួតរបស់គេកាលពីថ្ងៃសៅរ៍ម្សិលម្ង៉ៃ គឺស្ដែងយ៉ាងច្បាស់ថាមិនល្អដូចពេលកន្លងមក ។ ទោះបីយ៉ាងណាលោកញាន សុធី អ្នករៀបចំការប្រកួតបានអះអាងថា កីឡាករឯម ខ្លឹមខ្មៅ មិនត្រូវបានបិទឈប់ឱ្យប្រកួតអន្តរជាតិនៅលើសង្វៀនរបស់ខ្លួននោះទេ បើទោះជាដាក់ឲ្យឡើងប្រកួតប៉ុន្មានលើកកន្លងមក គឺចាញ់ច្រើនជាងឈ្នះ ធ្វើឲ្យអ្នកទស្សនាមិនសូវពេញចិត្តក្ដី ។
នៅក្នុងព្រឹត្តិការណ៍នោះដែរ កីឡាករ ពេជ្រ ម្ទេសខ្មាំង មកពីក្លិបអារុណរះកីឡា នៅតែធ្វើឲ្យអ្នកទស្សនាកោតសរសើរបន្ទាប់ពីវាយជើងខ្លាំង Deth Div ឲ្យសន្លប់ក្នុងទឹកទី២ ។ យ៉ាងហោចអ្នកគាំទ្រជាងពាក់កណ្ដាលបានបង្ហាញការចាប់អារម្មណ៍ចំពោះកីឡាកររូបនេះ និងបានប្រដូចថាវាយល្អគួរឱ្យទាក់ទាញដូចគេទើបសមជាអ្នកប្រដាល់ដែលមិនធ្វើឲ្យអ្នកគាំទ្រខកចិត្ត ។ ការលើកសរសើរលើពេជ្រ ម្ទេសខ្មាំង ហាក់បានទាញទម្លាក់ឯម ខ្លឹមខ្មៅ ឲ្យរងការរិះគន់ ដោយសារតែគេមានឈ្មោះដល់ទៅជាម្ចាស់ខ្សែក្រវាត់ប៉ុន្តែការប្រកួតកាន់តែចុះខ្សោយដែលស្ដែងយ៉ាងច្បាស់ពីការហ្វឹកហាត់របស់គេលែងជាការទទួលខុសត្រូវចំពោះគេដូចមុន ទើបធ្វើឲ្យកម្លាំង និងភាពរហ័សប្រែប្រួល ៕
ចែករំលែកព័តមាននេះ