លោកឃួង ស្រេង ៖ មិនលើកលែងទោសមន្ត្រី និងអ្នកពាក់ព័ន្ធចែកប័ណ្ណចាក់វ៉ាក់សាំងជូនកុមារជាថ្នូរយកលុយ
- ភ្នំពេញ
រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានធ្វើការ ព្រមានទៅអាជ្ញាធរខណ្ឌ សង្កាត់…
រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានធ្វើការ ព្រមានទៅអាជ្ញាធរខណ្ឌ សង្កាត់ ភូមិ ទាំងអស់ ដែលមានសិទ្ធក្នុងការចែកប័ណ្ណចាក់ វ៉ាក់សាំងការពារកូវីដ-១៩ ជូនកុមារ ចាប់ពីអាយុ១២ឆ្នាំ ដល់១៧ឆ្នាំ គឺមិនអនុញ្ញាតឱ្យមានជាដាច់ខាត ចំពោះការយកលុយជាថ្នូរនឹងការផ្តល់ប័ណ្ណចាក់វ៉ាក់សាំងជូនកុមារ បើមានករណីបែបនេះនឹងមានបញ្ហាប្រឈមជាមួយនឹងអាជ្ញាធររាជធានីភ្នំពេញ ពោលគឺរដ្ឋបាលរាជធានីភ្នំពេញ មិនមានការយោគយល់ជាដាច់ខាត ។
ការព្រមានបែបនេះ របស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានធ្វើឡើងនៅព្រឹកថ្ងៃទី២៨ កក្កដា ឆ្នាំ២០២១នេះ ក្នុងកិច្ចប្រជុំ ជាមួយអាជ្ញាធរខណ្ឌទាំង១៤ នៅសាលារាជធានីភ្នំពេញ ដើម្បីពិភាក្សា លើការត្រៀមបើកយុទ្ធនាការចាក់វ៉ាក់សាំងកូវីដ-១៩ ដល់កុមារ និងយុវវ័យ អាយុចាប់ពី ១២ ដល់អាយុក្រោម១៨ ឆ្នាំ នៅរាជធានីភ្នំពេញ ។
លោក ឃួង ស្រេង បានមានលើកឡើងថា ការចាក់វ៉ាក់សាំងជូនកុមារ ដែលមានអាយុ១២ឆ្នាំ ដល់ក្រោម១៨ឆ្នាំនេះ អាជ្ញាធររបស់យើង ត្រូវតែរៀបចំ និងធ្វើឡើងឲ្យបាន ហ្មត់ចត់ បំផុត ដើម្បីឱ្យដំណើរការ នៃការចាក់វ៉ាក់សាំងនេះ ទទួលបានជោគជ័យនិងទទួលបានការគាំទ្រយ៉ាងពេញទំហឹង ពីសំណាក់បងប្អូនប្រជាពលរដ្ឋ ហើយអ្វីដែលសំខាន់ គឺដាច់ខាតមិនឲ្យមាននរណាម្នាក់យកលុយជាថ្នូរ នៃការចេញប័ណ្ណចាក់វ៉ាក់សាំងជូនកុមារ ជាថ្នូរនៃការយកលុយនោះទេ ។ បើនៅតែមានសកម្មភាពបែបនេះ អាជ្ញាធររាជធានីភ្នំពេញមិនយោគយល់ជាដាច់ខាត ។ ដូច្នេះលោកស្នើសុំឲ្យអាជ្ញាធរខណ្ឌ សង្កាត់ត្រូវតែយកចិត្តទុកដាក់ឲ្យបានហ្មត់ចត់ បំផុតចំពោះការងារនេះ គឺមិនអនុញ្ញាតជាដាច់ខាត ចំពោះការចេញប័ណ្ណជាថ្នូរ នៃការយកប្រាក់ជាដាច់ខាត អាជ្ញាធរខណ្ឌ សង្កាត់ត្រូវតែទទួលខុសត្រូវដោយខ្លួនឯង ។
បន្ថែមលើនេះទៀត លោក ឃួង ស្រេង ក៏បានស្នើដល់អាជ្ញាធរខណ្ឌទាំង១៤ ត្រូវពង្រឹងឲ្យបាន ហ្មត់ចត់ ចំពោះវិធានការ ការពារជំងឺកូវីដ-១៩ ពិសេស វីរុសបំប្លែងថ្មី (ដែលតា) ដែលបាននឹងកំពុង វាយលុកនៅពេញពិភពលោក ហើយកម្ពុជា ក៏ជាប្រទេសមួយ កំពុងប្រឈមនឹងវីរុសថ្មីនេះផងដែរ ។ ជាងនេះទៀត ត្រូវបន្តពង្រឹងអោយបានល្អប្រសើរបំផុត ចំពោះការផ្ដល់សេវា ការសម្រួលទៅដល់បងប្អូនប្រជាពលរដ្ឋដែលមានជំងឺកូវីដ-១៩ ហើយពួកគាត់បានស្ម័គ្រចិត្ត ព្យាបាលនៅតាមផ្ទះ ៕
ចែករំលែកព័តមាននេះ