រាជធានីភ្នំពេញ ៖ នៅថ្ងៃសៅរ៍ និងថ្ងៃអាទិត្យចុងសប្ដាហ៍នេះ នៅលើសង្វៀនទូរទស្សន៍អាស៊ីអាគ្នេយ៍ នឹងមានការប្រកួតអន្តរជាតិចំនួន៤គូរវាងកីឡាករជើងខ្លាំងកម្ពុជា៤រូបប៉ះថៃ៤រូបដើម្បីប្រជែងយកភាពខ្លាំងរៀងខ្លួន ។ នៅមិនទាន់ដឹងថា ភាគីខាងណាមានប្រៀបជាងខាងណានៅឡើយទេ ក្នុងជំនួបប៉ះគ្នាគួរឱ្យចាប់អារម្មណ៍នេះ ។
នៅក្នុងព្រឹត្តិការណ៍ប្រដាល់លើសង្វៀនទូរទស្សន៍អាស៊ីអាគ្នេយ៍របស់ស្រាបៀរកម្ពុជានារសៀលថ្ងៃអាទិត្យ ទី២៧ ធ្នូ ខានស្អែក កីឡាករ យុគ យក្សផ្លែ មកពីក្លិបអប់រំកាយកីឡា នឹងប៉ះប្រកួតជាមួយកីឡាករថៃដែលមានឈ្មោះថា ខេម ។ កីឡាករទាំង២រូបនេះមិនធ្លាប់ប៉ះគ្នានោះទេ ប៉ុន្តែកីឡាករថៃធ្លាប់បង្ហាញសមត្ថភាពនៅលើសង្វៀនស្ថានីយទូរទស្សន៍អាស៊ីអាគ្នេយ៍រួចមកហើយ ដោយបានទាំងធ្វើឱ្យអ្នកគាំទ្រជាជនជាតិខ្មែរទទួលស្គាល់ភាពខ្លាំងនោះផង។ ការប្រកួតរបស់ពួកគេមានការចាប់អារម្មណ៍មិន
ណយនោះទេ ដោយសារតែយុគ យក្សផ្លែ គឺជាកីឡាករល្បីឈ្មោះដែលបាត់មុខយូរគួរសមនាមួយរយៈចុងក្រោយ ហើយកីឡាករថៃក៏ជាជើងខ្លាំងដែលមិនអាចមើលស្រាលបាន ។
បើការប្រកួតចុងក្រោយកីឡាករកម្ពុជាគឺជាអ្នកវាយឈ្នះ នោះយុគ យក្សផ្លែ នឹងឈានដល់ចំណុចកាន់តែមានទំនុកចិត្តពីក្រុមអ្នកស្នេហាការប្រដាល់ ប៉ុន្តែបើបែរជាចាញ់ទៅវិញក៏ពិតជារងការអាម៉ាស់ ហើយកីឡាករថៃក៏នឹងឡើងកូដមិនណយដែរ ។ កីឡាករកម្ពុជារូបនេះធ្លាប់ប្រកួតបាន១៣៧លើក ឈ្នះ១២០លើក ចាញ់១២លើក ស្មើ៥លើក ខណៈកីឡាករថៃខេម ធ្លាប់ប្រកួតបាន៧៥លើក ឈ្នះ៦៥លើក ចាញ់៨លើក និងស្មើ២លើក ។
នៅក្នុងព្រឹត្តិការណ៍នេះដែរ កីឡាករជើងខ្លាំង អាំង សំអាត ក៏ត្រូវគេឲ្យប៉ះប្រកួតជាមួយកីឡាករថៃឈ្មោះផុន សាវ៉ាត់ ដើម្បីរំលេចការប្រកួតអន្តរជាតិនោះផងដែរ ។ ការប្រកួតរបស់គូនេះ ក៏មានអ្នកផ្ដោតការតាមដានណាស់ដែរ ដោយសារតែកីឡាករកម្ពុជា និងថៃ សុទ្ធតែមានសមត្ថភាពរៀងខ្លួន ហើយក៏មានក្រេឌីតនៅក្នុងក្រសែភ្នែករបស់មហាជនទាំងនៅភ្នំពេញ និងនៅទីក្រុងបាងកក ។ លោកថៃ អ៊ូ ជាអ្នកដឹកនាំកីឡាករថៃឱ្យមកប្រកួត បានអះអាងថា កីឡាករថៃ ផុន សាវ៉ាត់ គឺជាជើងខ្លាំងម្នាក់ដែលមានប្រវត្តិវាយផ្ដួលគូប្រកួតរាប់មិនអស់រួចមកហើយ មុនពេលផ្គូផ្គងឲ្យឡើងប្រកួតជាមួយកីឡាករអាំង សំអាត ។ កីឡាករផុន សាវ៉ាត់ ធ្លាប់ប្រកួតបាន៦៩លើក ឈ្នះ៦៥លើក និងចាញ់៤លើក ហើយការប្រកួតប៉ុន្មានលើកចុងក្រោយក៏មានជ័យជម្នះជាងបរាជ័យផងដែរ ។ តួលេខដែលបានបង្ហាញនេះ បានបញ្ជាក់យ៉ាងច្បាស់ថា កីឡាករថៃមានការប្រកួតតិចជាងកីឡាករកម្ពុជានៅឡើយ ដ្បិតកីឡាករអាំង សំអាង ធ្លាប់ប្រកួតបាន៧៥លើក ឈ្នះ៦៣លើក និងចាញ់១២លើក ។
យ៉ាងណាក៏ដោយ លទ្ធផលដែលបានបង្ហាញឡើងគឺកីឡាកររូបនេះហាក់មានលទ្ធផលមិនសូវនឹងនរនោះឡើយ បន្ទាប់ពីការប្រកួតភាគច្រើន គឺចាញ់ហាក់ច្រើនជាងឈ្នះនៅលើសង្វៀន ។ អ្នកគាំទ្រភាគច្រើន បានប៉ាន់ស្មានថា កីឡាករថៃទំនងជាឈ្នះក្នុងភាគរយច្រើនជាង បើទោះជាការប្រកួតនៅលើសង្វៀនគឺមានតួលេខតិចជាងកីឡាករអាំង សំអាត នោះក្ដី ។ ម្យ៉ាងកីឡាករផុន សាវ៉ាត់ នៅក្មេងជាងរស់រវើកជាង និងជាកីឡាករឡើងកូដនោះផង ទើបកីឡាករជើងចាស់ដែលត្រូវគេកត់សម្គាល់ថាហាក់ប្រែប្រួលកម្លាំងរូចទៅហើយ អាចនឹងពិបាកស៊ីផុយ ។ ប៉ុន្តែអាំង សំអាត ក៏ទំនងជាឈ្នះផងដែរ បើផ្អែកលើប្រវត្តិ និងបទពិសោធន៍ប្រកួតច្រើនជាង ។
ដោយឡែកនៅក្នុងព្រឹត្តិការណ៍ប្រដាល់លើសង្វៀនទូរទស្សន៍អាស៊ីអាគ្នេយ៍របស់ក្រុមហ៊ុនK-Cementវេលាម៉ោង២រសៀលថ្ងៃសៅរ៍ទី២៦ ធ្នូ នេះ ក៏មានការប្រកួតអន្តរជាតិចំនួនពីរគូដែរ។ កីឡាករ ឯម ខ្លឹមខ្មៅ មកពីក្លិបឫទ្ធីពោធិសែនជ័យ ត្រូវប្រកួតជាមួយកីឡាករថៃឈ្មោះSuper Chhaiក្នុងប្រភេទទម្ងន់៦៨គីឡូក្រាម ។ ផ្អែកតាមតួលេខកីឡាករថៃរូបនេះ ក៏មានសមត្ថភាពមិនណយនោះដែរ ដោយសារតែការបង្ហាញខ្លួននៅលើសង្វៀនរបស់ប្រទេសកម្ពុជាកន្លងមក គឺមានកម្រិតល្អប្រសើរ ។ ឆ្លងកាត់ការប្រកួត១១៥ដង ឈ្នះ៩៩ដង ចាញ់១៥ដង និងស្មើ១ដង កីឡាករឯម ខ្លឹមខ្មៅ ទំនងមិនងាយស៊ីនោះទេ ក្នុងពេលកីឡាករកម្ពុជារូបនេះ ក៏បានស្ដែងឡើងនូវលទ្ធផលមិនសូវល្អនាមួយរយៈចុងក្រោយផងដែរ ។ កីឡាករឯម ខ្លឹមខ្មៅ ធ្លាប់ប្រកួត៩៨ដង ឈ្នះ៨២ដង ចាញ់១៤ដង និងស្មើ២ដង ប៉ុន្តែដ្បិតថាមានតួលេខប្រហែលថៃ ក៏លទ្ធផលប៉ុន្មានប្រកួតចុងក្រោយដូចជាចាញ់ប្រៀបកីឡាករថៃ។ មុននេះបន្តិច ឯម ខ្លឹមខ្មៅ វាយចាញ់កីឡាករថៃ យ៉ត សាយ៉ាម សុផាសុខ ក្នុងទឹកទី៣ ។
មួយគូទៀតកីឡាករពេជ្រ ម្ទេសខ្មាំង មកពីក្លិបអារុណរះកីឡា ក៏ត្រូវគេផ្គូផ្គងឱ្យឡើងប្រកួតជាមួយកីឡាករថៃDethDivក្នុងប្រភេទទម្ងន់៥៤គីឡូក្រាមផងដែរ ។ នេះជាការប៉ះគ្នាក្នុងជំនួបសងសឹករបស់អ្នកទាំងពីរ ដោយសារតែការប្រកួតកាលពីដើមខែវិច្ឆិកា កន្លងទៅ គឺលទ្ធផលចុងក្រោយស្មើគ្នា ។ អ៊ីចឹងហើយទើបការប្រកួតនេះ មានការចាប់អារម្មណ៍សឹងខ្លាំងជាងការប្រកួតអន្តរជាតិ៣គូខាងលើនោះទៅទៀត ដោយសារតែអ្នកគាំទ្រភាគច្រើនចង់ដឹងថារវាងកីឡាករពេជ្រ ម្ទេសខ្មាំង និងកីឡាករថៃ តើអ្នកណាឈ្នះលើកនេះបន្ទាប់ពីស្មើគ្នាទាំងវេទនា ។ កីឡាករ DethDivធ្លាប់ប្រកួត៦២លើក ឈ្នះ៥៦លើក ចាញ់៥លើក និងស្មើ១លើក ដោយការប្រកួតលើកចុងក្រោយរបស់គេគឺស្មើពេជ្រ ម្ទេសខ្មាំងនេះឯង ។ កីឡាករពេជ្រ ម្ទេសខ្មាំងវិញ ធ្លាប់ប្រកួតបាន៧៤លើក ឈ្នះ៦៨លើក ចាញ់៥លើក និងស្មើ១លើក ។
សម្រាប់គូនេះ គេនៅតែជឿលើកីឡាករកម្ពុជាច្រើនជាង បើទោះជាកីឡាករថៃគឺមិនធម្មតានាពេលកន្លងមក ។ យ៉ាងណាក៏ដោយគឺមានតែការប្រកួតជាក់ស្ដែងនៅរសៀលនេះ និងស្អែកប៉ុណ្ណោះ ដែលអាចកាត់ក្ដីសម្រាប់ការប្រកួតទាំង៤គូខាងលើ ៕
ចែករំលែកព័តមាននេះ