ខេត្តព្រះសីហនុ៖ ស្នងការនគរបាលខេត្តព្រះសីហនុ បានឲ្យដឹងនៅថ្ងៃទី២៧ ខែកក្កដានេះថា សមត្ថកិច្ចបានឃាត់ខ្លួនជនសង្ស័យ ៣នាក់ ក្នុងករណីចោរកម្ម លួចត្រង់ហ្វូអគ្គិសនីរដ្ឋ ក្នុងក្រុងព្រះសីហនុ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានបញ្ជាក់ថា កាលពីនៅយប់ថ្ងៃទី២៦ ខែកក្កដា ឆ្នាំ២០២១ វេលាម៉ោង ២៣ និង០០នាទី កម្លាំងជំនាញអធិការដ្ឋាននគរបាលក្រុងព្រះសីហនុ សហការជាមួយកម្លាំងជំនាញប៉ុស្តិ៍នគរបាលសង្កាត់លេខ៣ បានបង្ក្រាបមុខសញ្ញាលួចត្រង់ហ្វូអគ្គិសនី នៅចំណុចមុខបូរីគុជអាស៊ី ស្ថិតនៅក្រុមទី១៤ ភូមិ១ សង្កាត់លេខ៣ ក្រុង-ខេត្តព្រះសីហនុ។
ជនសង្ស័យ ចំនួន ០៣នាក់ រួមមាន៖ ១-ឈ្មោះ ពេជ្យ រាជ្យ ភេទប្រុស អាយុ ២៧ឆ្នាំ មុខរបរកម្មករសំណង់ បច្ចុប្បន្នរស់នៅភូមិអូត្រេះ ឃុំស្ទឹងហាវ ស្រុកស្ទឹងហាវ ខេត្តព្រះសីហនុ។ ២-ឈ្មោះ ពេជ្រ ចាន់ ភេទប្រុស អាយុ ២៤ឆ្នាំ មុខរបរជាងភ្លើង បច្ចុប្បន្នរស់នៅភូមិអូត្រេះ ឃុំស្ទឹងហាវ ស្រុកស្ទឹងហាវ ខេត្តព្រះសីហនុ ជាអ្នកដោះត្រង់ហ្វូ និង៣-ឈ្មោះ ង៉ែត ណារិត ភេទប្រុស អាយុ ៣៤ឆ្នាំ មុខរបរមិនពិតប្រាកដ បច្ចុប្បន្នស្នាក់នៅ ក្នុងភូមិ២ សង្កាត់លេខ២ ក្រុង-ខេត្តព្រះសីហនុ។ រីឯបក្ខពួក ២នាក់ទៀត ឈ្មោះ ប្រាក់ និងឈ្មោះ ទាញ ដែលកម្លាំងជំនាញ កំពុងស្រាវជ្រាវ ស្វែងរកចាប់ខ្លួន។
សមត្ថកិច្ច ដកហូតវត្ថុតាង រួមមាន៖ ដែកដង្កាប់១ សោរលេខ១៩ សោរលេខ២៤ ចំនួន ២ដើម ក្បាលលេខ ១៧ ចំនួន ១ដើម កន្ត្រៃកាត់ខ្សែភ្លើង ចំនួន ២ ម៉ូតូ ១គ្រឿង ម៉ាក HONDA C១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ព្រះសីហនុ 1D-3909 និងត្រង់ហ្វូម៉ាក FYJi ELECTRiC មួយគ្រឿង។
ជនសង្ស័យខាងលើ ត្រូវបានកម្លាំងជំនាញ ឃាត់ខ្លួននៅអធិការដ្ឋាននគរបាលក្រុងព្រះសីហនុ ដើម្បីបន្តនីតិវិធីតាមច្បាប់៕
ចែករំលែកព័តមាននេះ