រាជធានីភ្នំពេញ ៖ កម្មវិធីប្រកួតប្រដាល់ជាលក្ខណៈមិត្តភាពប្រចាំសប្ដាហ៍នៅលើសង្វៀនស៊ីធីអិន ថ្ងៃអាទិត្យ ទី២៧ ធ្នូ ប្រជុំដោយអ្នកប្រដាល់ទាំងជើងចាស់និងជើងថ្មីចំនួន៦គូ ឡើងមកសាកកណ្ដាប់ដៃគ្នាជូនទស្សនិកជនបានទស្សនានាថ្ងៃសម្រាកចុងសប្ដាហ៍ ។ ក្នុងចំណោមបេក្ខភាពទាំង៦គូនេះ គេចាប់អារម្មណ៍ជាងគេទៅលើគូផាន់ សារ៉ែម មកពីក្លិបគជសារកីឡា ប្រកួតជាមួយសេង កំសត់ មកពីក្លិបគីសែមានរិទ្ធិដែលសុទ្ធតែជាអ្នកប្រដាល់ជើងចាស់ដូចគ្នាហើយកម្របានជួបគ្នាទៀតផង ។
ផាន់ សារ៉ែម ថ្វីដៃប្រកួតនៅលើសង្វៀនរបស់គេល្អគ្រាន់បើ ទាំងផ្លែកែង និងជង្គង់សុទ្ធតែអាចប្រើការបានយ៉ាងស្ទាត់ជំនាញបំផុត រីឯចិត្តក៏សឿងណាស់ដែរ គ្រាន់តែចលនាវាយចេញរាងយឺតយ៉ាវបន្តិចប៉ុណ្ណោះ ។ កីឡាកររូបនេះមានប្រវត្តិប្រកួត៦៣ដង ឈ្នះ៤០ដង ចាញ់២០ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១៥ដង ។
ចំណែកសេង កំសត់ ទោះបីគេមានចិត្តតូចបន្តិចមែន ប៉ុន្តែកុំមើលស្រាលឱ្យសោះ បើនិយាយពីស្នៀតប្រយុទ្ធ និងកម្លាំងស៊ុហ្វវិញនោះ មិនចាញ់ ផាន់ សារ៉ែម ប៉ុន្មានឡើយ ។ ស្នៀតកែងនិងជង្គង់របស់គេពេលវាយចេញម្ដងៗបង្កគ្រោះថ្នាក់ខ្លាំងណាស់ ។ កីឡាកររូបនេះមានប្រវត្តិធ្លាប់ឡើងសង្វៀនប្រកួតបាន៦៥ដង ឈ្នះ៤៥ដង ចាញ់១០ដង និងធ្លាប់ផ្ដួលគូប្រកួតឱ្យសន្លប់បាន១២ដង ។ ចាំមើលរវាងផាន់ សារ៉ែម និងសេង កំសត់ នរណាមានសំណាងសម្រេចគោលដៅរបស់ខ្លួន ។
ក្រៅពីគូចាប់អារម្មណ៍នេះទៅ សមាសភាពកីឡាករ៥គូទៀតក៏រំពឹងថាធ្វើឱ្យសង្វៀនស៊ីធីអិនកក្រើកផងដែរដូចជាកីឡាកររិទ្ធ ប្រាក់ប៊ិន មកពីក្លិបកងពលតូចលេខ៧០ ប្រកួតជាមួយកីឡាករថាន រ៉ាឌី មកពីក្លិបតាព្រហ្មមានជ័យ ។ កីឡាករជួង ទីតា មកពីក្លិបខ្លារខិនមានរិទ្ធ ប្រកួតជាមួយកីឡាករយ៉ាម ខេមរ៉ា មកពីក្លិបរស្មីកុមារកំព្រា ។ កីឡាកររៀវ ចំណាប់ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ហេង ពន្លឺ មកពីក្លិបព្រៃទទឹងមានរិទ្ធ ខេត្តបាត់ដំបង ។ កីឡាករឃិន សុវណ្ណនិល មកពីក្លិបឃ្លាំងមឿងកីឡាខេត្តពោធិ៍សាត់ ប្រកួតជាមួយកីឡាករច្រិច កុសល មកពីក្លិបក្រុងប៉ោយប៉ែត និងគូចុងក្រោយកីឡាករចាន់ សច្ចា មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយកីឡាករឡុង ខេម មកពីក្លិបអេភូថងកីឡា ៕
ចែករំលែកព័តមាននេះ