ប្រទេសថៃ ៖ រដ្ឋាភិបាលបានកំណត់ទិសដៅកំណើននៃការនាំចេញឲ្យបាន៥%នៅឆ្នាំក្រោយ ដោយផ្អែកលើការរើបឡើងវិញនៃធនាគារពិភពលោក ក៏ដូចជាវិធានការលើកទឹកចិត្តរបស់រដ្ឋ និងការអភិវឌ្ឍតំបន់សេដ្ឋកិច្ចពិសេសជាដើម ។
យោងតាមលោកស្រី Malee Choklumlerd អគ្គនាយកនៃអគ្គនាយកដ្ឋានផ្សព្វផ្សាយពាណិជ្ជកម្មអន្តរជាតិ មានប្រសាសន៍ថា ៖ « ការនាំចេញនឹងមានទំហំទឹកប្រាក់តាមការព្យាករទុកប្រមាណជា២២៥ប៊ីលានដុល្លារក្នុងឆ្នាំ២០១៦ ដោយបានជំរុញតាមរយៈទស្សនវិស័យ ដែលអាចទទួលបានជោគជ័យចំពោះរថយន្តនិងគ្រឿងបន្លាស់ ត្បូងនិងគ្រឿងអលង្ការ សាច់មាន់ក្លាសេ និងកែច្នៃរួច គ្រឿងអេឡិចត្រូនិក ប្រដាប់ប្រដាប្រើប្រាស់ សម្ភារអគ្គិសនី និងគ្រឿងសំណង់ ជាដើម » ។
ចំណែកកត្តាដទៃទៀតដូចជា សេវាថែទាំសុខភាព មជ្ឈមណ្ឌលកម្សាន្ត ដឹកជញ្ជូន អប់រំ មន្ទីរពេទ្យ និងសំណង់ ត្រូវបានគេរំពឹងថា នឹងជួយជំរុញកំណើននៃការនាំចេញនាឆ្នាំខាងមុខនេះ ។
ក្រសួងពាណិជ្ជកម្មមានសុទិដ្ឋិនិយមក្នុងការនាំចេញទៅកាន់ប្រទេសមួយចំនួនដូចជា កម្ពុជា ឡាវ មីយ៉ាន់ម៉ា វៀតណាម អូស្ត្រាលី ឥណ្ឌា ចិន សហរដ្ឋអាមេរិក និងអឺរ៉ុប ។
ទោះជាយ៉ាងណា ការនាំចេញដែលមានកម្រិតទាបជាងមុន ត្រូវបានគេរំពឹងថា នឹងកើតមានចំពោះការបញ្ជូនទំនិញទៅកាន់ទីផ្សារជប៉ុន មជ្ឈិមបូព៌ា និងអាហ្វ្រិក ។
លោកស្រី Malee Choklumlerd ថ្លែងថា ៖ « ទិសដៅក្នុងការសម្រេចកំណើន៥%នេះ គឺផ្អែកទៅលើការព្យាករទុកដោយអង្គការមូលនិធិរូបិយវត្ថុអន្តរជាតិ ដែលសេដ្ឋកិច្ចពិភពលោកនឹងកើនឡើង៣,៦%នៅឆ្នាំ២០១៦ បន្ទាប់ពីបានវាយតម្លៃនូវកំណើន៣,១% នៃឆ្នាំនេះ » ។
ការជំរុញបន្ថែមនេះ នឹងត្រូវបានផ្តល់ឲ្យតាមរយៈវិធានការលើកទឹកចិត្តដែលណែនាំដោយរដ្ឋាភិបាលក្នុងអំឡុងឆ្នាំ២០១៥ ក៏ដូចជាចង្កោមឧស្សាហកម្ម តំបន់សេដ្ឋកិច្ចពិសេស និងការគាំទ្រលើការវិនិយោគក្នុងឧស្សាហកម្មកំណត់គោលដៅចំនួន១០ ។
គណៈរដ្ឋមន្ត្រីបានធ្វើបដ្ឋិលេខលើគម្រោងមួយកាលពីខែមុន ក្នុងការទាក់ទាញការវិនិយោគសម្រាប់ឧស្សាហកម្មចំនួន១០ បន្ទាប់ពីក្រសួងហិរញ្ញវត្ថុសិក្សាឃើញថា ការវិនិយោគឯកជនបានដើរថយក្រោយជាបន្តបន្ទាប់ក្នុងរយៈពេលជាងមួយទសវត្សរ៍មុននេះ ។
ឧស្សាហកម្មទាំង១០នោះរួមមាន រថយន្តជំនាន់ថ្មី គ្រឿងអេឡិចត្រូនិកដ៏ឆ្លាតវៃ ទំនិញនិងសម្ភារដ៏សម្បូរបែប ឱសថនិងទេសចរណ៍សុខភាព កសិកម្មនិងជីវបច្ចេកវិទ្យា អាហារ មនុស្សយន្តសម្រាប់ឧស្សាហកម្ម ដឹកជញ្ជូននិងអាកាសចរណ៍ ជីវប្រេងឥន្ធនៈនិងជីវគីមី ឌីជីថលនិងសេវាឱសថ ជាដើម ។
កាលពីខែមុន គណៈរដ្ឋមន្ត្រី ក៏បានអនុម័តនូវគោលការណ៍សំណើមួយរបស់ក្រសួងហិរញ្ញវត្ថុក្នុងការបង្កើតមូលនិធិ១០ប៊ីលានបាត ដើម្បីគាំទ្រដល់ការវិនិយោគក្នុងចង្កោមឧស្សាហកម្មទាំង១០ ។ មូលនិធិនេះនឹងជួយដល់បណ្តាវិនិយោគិនអាចបង្កើនការប្រតិបត្តិការកាន់តែងាយដើម្បីគាំទ្រផ្នែកហិរញ្ញវត្ថុ និងពន្លឿនការវិនិយោគក្នុងគម្រោងចង្កោមឧស្សាហកម្មទាំងនោះ ។
ដើម្បីសម្រេចបានទិសដៅនេះ ក្រសួងពាណិជ្ជកម្មនឹងលើកទឹកចិត្តដល់ការនាំចេញរបស់ថៃ តាមរយៈយុទ្ធសាស្ត្រគន្លឹះដូចជា ដំណើរការទីផ្សារប្រសើរជាងមុន និងកិច្ចសហប្រតិបត្តិការសេដ្ឋកិច្ច តម្រូវការជំរុញការខិតចូលទៅជិតនៃទីផ្សារ ការពង្រីកពាណិជ្ជកម្មតាមព្រំដែន ការជួយគាំទ្រ និងជួយសម្រួលការវិនិយោគនៅក្រៅប្រទេស ការអភិវឌ្ឍនូវការបញ្ចូលរបៀបថ្មី និងពាណិជ្ជកម្មខ្នាតតូច ក៏ដូចជាតម្លៃបន្ថែមនៃផលិតផលឧស្សាហកម្ម ជាដើម ។
ដោយឡែក កត្តាអវិជ្ជមានដែលអាចទប់ស្កាត់ការនាំចេញរួមមាន តម្លៃប្រេងទាបជាងមុន ការបង្អន់ល្បឿនសេដ្ឋកិច្ចរបស់ចិន និងការផាកពិន័យរបស់អឺរ៉ុបចំពោះអំពើខុសច្បាប់ជាដើម ៕
ចែករំលែកព័តមាននេះ