រាជធានីភ្នំពេញ ៖ ជនសង្ស័យចំនួន២នាក់ ក្នុងចំណោមបក្សពួក១០នាក់ ត្រូវបានកម្លាំងអន្តរាគមន៍ខណ្ឌជ្រោយចង្វារ ចាប់ឃាត់ខ្លួន បន្ទាប់ពីធ្វើសកម្មភាពជិះម៉ូតូដើរទាក់សត្វឆ្កែតាមផ្លូវសាធារណៈ បង្កឲ្យមានកាលភ្ញាក់ផ្អើលឡើងកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី២៧ ខែកក្កដា ឆ្នាំ២០២១ ត្រង់ចំណុចក្បែរផ្ទះសំណាក់ «មហាលាភ» តាមបណ្ដោយផ្លូវជាតិលេខ៦ ស្ថិតក្នុងសង្កាត់ព្រែកលាភ ខណ្ឌជ្រោយចង្វារ។
ជនសង្ស័យខាងលើ ទី១- មានឈ្មោះ រិន ភេទប្រុស អាយុ២៥ឆ្នាំ មុខរបរ និងស្នាក់នៅមិនពិតប្រាកដ និងទី២- មានឈ្មោះ អ៊ឿន ហ្សា ភេទប្រុស អាយុ១៤ឆ្នាំ មុខរបរនិងស្នាក់នៅមិនពិតប្រាកដ។
តាមប្រភពព័ត៌មានពីកម្លាំងសមត្ថកិច្ចអន្តរាគមន៍នៃអធិការដ្ឋាននគរបាលខណ្ឌជ្រោយចង្វាបានរៀបរាប់ប្រាប់ឲ្យដឹងថា នៅមុនពេលកើតហេតុ កម្លាំងសមត្ថកិច្ចបានធ្វើការជិះម៉ូតូល្បាតក្នុងភូមិសាស្ត្រនៃខណ្ឌជ្រោយ ដើម្បីកាត់បន្ថយ និងទប់ស្កាត់បទល្មើសផ្សេងៗនៅអាចកើតឡើងដោយប្រការណាមួយ។
សមត្ថកិច្ចខាងលើបន្តថា លុះពេលដែលជិះល្បាតដល់ចំណុចផ្លូវលីយ៉ុងផាត់ ស្រាប់តែប្រទះឃើញជនសង្ស័យទាំងពីរនាក់ខាងលើ ជិះម៉ូតូមួយគ្រឿងម៉ាកហុងដាវ៉េវ អអេះអ៊ិច ពណ៌ខៀវ គ្មានស្លាកលេខ រួមជាមួយនឹងបក្សពួកចំនួន៨នាក់ទៀត ជិះម៉ូតូ៤គ្រឿងមិនចាំម៉ាក ដែលបានជិះបណ្តើរគ្នាតាមបណ្ដោយផ្លូវលីយ៉ុងផាត់ ទិសដៅពីលិចទៅកើត និងមានដឹកសត្វឆ្កែដែលលួចទាក់បានមួយបាវធំជាប់ជាមួយផងដែរ។
សមត្ថកិច្ចបន្តទៀតថា បន្ទាប់ពីឃើញក្រុមជនសង្ស័យដែលជាមុខសញ្ញាលួចទាក់សត្វឆ្កែយ៉ាងសកម្មនៅភូមិសាស្ត្រខណ្ឌជ្រោយចង្វារនោះ កម្លាំងសមត្ថកិច្ចបានធ្វើការជិះប្រដេញតាមក្រុមជនសង្ស័យ ហើយត្រូវបានក្រុមជនសង្ស័យដឹងខ្លួនក៏បន្ថែមល្បឿនជិះគេចខ្លួន និងបានប្រើប្រាស់ចាំពាមកៅស៊ូបាញ់ទៅលើកម្លាំងសមត្ថកិច្ច បណ្ដាលឲ្យសមត្ថកិច្ចម្នាក់របួសស្ទើរពេញដងខ្លួនតែម្តង ប៉ុន្តែសមត្ថកិច្ចនៅតែបន្តដេញតាមរហូតដល់ចំណុចកើតហេតុ ទើបអាចធ្វើការស្ទាក់ចាប់ឃាត់ខ្លួនជនសង្ស័យបានចំនួន២នាក់ ដោយដកហូតបានឧបករណ៍សម្រាប់ទាក់សត្វឆ្កែចំនួន៣ខ្សែ និងឆ្កែដែលទាក់បានជិត១០ក្បាលសុទ្ធតែងា.ប់អស់ហើយ ។ ចំណែកឯបក្សពួកចំនួន៨នាក់ទៀត បាននាំគ្នាជិះរត់គេចខ្លួនបាត់ស្រមោលតែម្តង។
បច្ចុប្បន្នជនសង្ស័យទាំង២នាក់ខាងលើ រួមទាំងវត្ថុតាំង ត្រូវបានសមត្ថកិច្ចនាំខ្លួនយកទៅធ្វើការសាកសួរ និងកសាងសំណុំរឿងនៅអធិការដ្ឋាននគរបាលខណ្ឌជ្រោយចង្វារ ដើម្បីរង់ចាំចាត់ការទៅតាមនីតិវិធីជាបន្តទៀត៕
ចែករំលែកព័តមាននេះ