រាជធានីភ្នំពេញ ៖ តារាចម្រៀងបែបមនោសញ្ចេតនាកញ្ញាសុន ស្រីពេជ្រ បានភ្ជាប់ពាក្យជាមួយមន្ត្រីវ័យជាង៣០ឆ្នាំ កាលពីពេល ថ្មីៗកន្លងមក ហើយគ្រោងចូលរោងការនាអំឡុងឆ្នាំ២០១៧ ប៉ុន្តែគម្រោងនោះប្រែប្រួលមកពាក់កណ្តាលឆ្នាំ២០១៦វិញ ។
តារាចម្រៀងមនោសញ្ចេតនាស្រគត់ស្រគំសុន ស្រីពេជ្រ បញ្ជាក់ថា កាលពីនាងភ្ជាប់ពាក្យបាននិយាយថា គ្រោងចូលរោងការនៅអំឡុងឆ្នាំ២០១៧ដើម្បីទុកពេលយូរបន្តិចរកស៊ីឲ្យសល់លុយកាក់ជាងនេះ ។ ពីមុនគឺគិតបែបនេះមែនប៉ុន្តែមើលទៅប្រហែលជាអាចរំកិលមកអំឡុងពាក់កណ្តាលឆ្នាំ២០១៦វិញ ។ មូលហេតុដែលសាច់ញាតិសងខាងប្រែប្រួលថ្ងៃមង្គលការនេះមកពីមិនចង់ទុកយូរចង់ឲ្យរៀបការ ឆាប់ៗ ព្រោះទោះជាយ៉ាងណាទាំងសងខាងគង់តែក្លាយជាប្តីប្រពន្ធ និងសាច់ញាតិនឹងគ្នាដដែល ។ ចំពោះអារម្មណ៍ស្រីពេជ្រកាន់តែឆាប់កាន់តែល្អ ។
នៅព្រឹកថ្ងៃទី១១ ខែធ្នូ ២០១៥ តារាចម្រៀងស្រគត់ស្រគំកញ្ញា សុន ស្រីពេជ្រ បានភ្ជាប់ពាក្យជាមួយមន្ត្រីវ័យជាង៣០ឆ្នាំ នៅក្រសួងសង្គមកិច្ច និងយុវនីតិសម្បទា ។
កញ្ញាសុន ស្រីពេជ្រ និយាយថា ហេតុផលដែលនាងសម្រេចចិត្តរៀបការរហូតដល់ដើមឆ្នាំ២០១៧ ឬពាក់កណ្ដាលឆ្នាំនោះ គឺដោយសារតែចង់ឲ្យបងប្អូនរបស់គូដណ្តឹងនាងដែលរស់នៅសហរដ្ឋអាមេរិកបានមកចូលរួម ។ ពួកគេមិនអាចសុំច្បាប់មកចូលរួមបានទេនៅមុនឆ្នាំ២០១៧ ។ ម្យ៉ាងទៀតស្រីពេជ្រនិងគ្រួសារចង់សន្សំលុយកាក់ឲ្យបានច្រើន ដើម្បីចាត់ចែងពិធីនោះផង ទើបសម្រេចទុកពេលឱ្យយូរបន្តិច ។
គ្រួសារខាងប្រុសជូនបណ្ណាការមិនឲ្យខ្វះខាត ក្នុងការចាត់ចែងមង្គលការទេ ប៉ុន្តែមកពីស្រីពេជ្រចង់ឲ្យកាន់តែគ្រប់គ្រាន់សម្រាប់មង្គលការខ្លួនឯង ទើបចង់ទុកពេលរកលុយមួយរយៈសិនចាំរៀបការ ។
កញ្ញាសុន ស្រីពេជ្រ និងគូដណ្ដឹងស្គាល់គ្នាមិនយូរប៉ុន្មានទេ ហើយហេតុផលដែលនាំឲ្យភ្ជាប់ពាក្យ គឺដោយសារតែមានការណែនាំពីអ្នកជិតដិត ហើយបានសិក្សាឈ្វេងយល់ចិត្តគ្នាក្នុងរយៈពេលខ្លីបំផុត ។ គ្រួសារខាងប្រុសត្រកូលខ្ពង់ខ្ពស់ និងជាមន្ត្រីរាជការដែលមានតំណែងនៅក្នុងសង្គម ប៉ុន្តែទឹកចិត្តរបស់គ្រួសារលោក ព្រមទាំងសាមីខ្លួនផ្ទាល់គឺមិនប្រកាន់វណ្ណៈចំពោះជីវិតសិល្បៈដ៏សាមញ្ញរបស់គ្រួសារស្រីពេជ្រឡើយ ។ ដូច្នេះហើយទើបសម្រេចចិត្តភ្ជាប់ពាក្យនៅថ្ងៃទី១១ ខែធ្នូ ឆ្នាំ២០១៥ នៅគេហដ្ឋានរបស់នាងម្ដុំចម្ការព្រីងក្បែរបុរីពិភពថ្មី បឹងឈូក។
លោកទៀវ វិសាល ជាគូដណ្ដឹងរបស់សុន ស្រីពេជ្រនិយាយថា រវាងលោកនិងនាង គឺស្រឡាញ់ពេញចិត្តគ្នាដោយចិត្តនិងចិត្ត បើទោះជាក្រោមការណែនាំរបស់ចាស់ទុំក្តី ។
លោកទៀវ វិសាល គឺជាកូនប្រុសពៅនៅក្នុងគ្រួសារមន្ត្រីជាន់ខ្ពស់មួយរូប ហើយលោកក៏ជាមន្ត្រីដែលមានតំណែងធំមួយប្រចាំនៅក្រសួងសង្គមកិច្ច និងយុវនីតិសម្បទា ។ លោកវិសាលអះអាងថា ហេតុផលដែលនាំឲ្យលោកស្រឡាញ់ពេញចិត្តកញ្ញា សុន ស្រីពេជ្រ គឺដោយសារតែនាងគឺជាតារាចម្រៀងស្រគត់ស្រគំមានចរិតថ្លៃថ្នូរ ហើយរួសរាយរាក់ទាក់ខុសពីតារាសិល្បៈស៊ីវិល័យមួយចំនួន ៕
ចែករំលែកព័តមាននេះ