ខេត្តសៀមរាប៖ រដ្ឋបាលខេត្ត បានប្រកាសពីការរកឃើញអ្នកវិជ្ជមានជំងឺកូវីដ-១៩ ថ្មីចំនួន ៩៩នាក់ ជាសះស្បើយ ចំនួន ៤៩នាក់ និងស្លាប់ម្នាក់ នៅថ្ងៃទី២៥…
ខេត្តសៀមរាប៖ រដ្ឋបាលខេត្ត បានប្រកាសពីការរកឃើញអ្នកវិជ្ជមានជំងឺកូវីដ-១៩ ថ្មីចំនួន ៩៩នាក់ ជាសះស្បើយ ចំនួន ៤៩នាក់ និងស្លាប់ម្នាក់ នៅថ្ងៃទី២៥ ខែកក្កដា ឆ្នាំ២០២១។ មកទល់ពេលនេះ រដ្ឋបាលខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន ៣៨២២ នាក់ បានព្យាបាលជាសះស្បើយ ចំនួន ១៩៧៨នាក់ អ្នកស្លាប់កើនឡើងដល់ ៤០នាក់ និង ១៨០៤នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត វិទ្យាល័យអង្គរ និងវិទ្យាល័យដំដែក។
រដ្ឋបាលខេត្តសៀមរាប បានប្រកាសថា ក្នុងព្រឹត្តិការណ៍ នៃការឆ្លងរាលដាលជំងឺកូវីដ-១៩ រដ្ឋបាលខេត្ត បានរកឃើញអ្នកវិជ្ជមានជំងឺកូវីដ-១៩ ថ្មី ចំនួន ៩៩នាក់ ជាសះស្បើយអ្នកវិជ្ជមានជំងឺកូវីដ-១៩ ចំនួន ៤៩នាក់ និងស្លាប់ម្នាក់ នៅថ្ងៃទី២៥ ខែកក្កដា ឆ្នាំ២០២១។
តាមសេចក្តីប្រកាស ករណីទី១ ដល់ទី៨ គឺជាករណីមានប្រភពចម្លងចេញពីផ្សារលើធំថ្មី និងករណីទី០៩ ដល់ទី១១ ជាករណីឆ្លងមានប្រភពចម្លងចេញពីការដ្ឋាន Rose Apple Square។ ក្នុងនោះ ករណីទី១២ ដល់ទី១៤ ជាករណីមានប្រភពចម្លងចេញពីអ្នកដំណើរមកពីរាជធានីភ្នំពេញ និងខេត្តពោធិ៍សាត់។ ករណីទី១៥ ដល់ទី២៧ គឺជាករណីឆ្លងបន្តពីអ្នកដំណើរមកពីរាជធានីភ្នំពេញ និងខេត្តព្រះសីហនុ និងករណីទី២៨ ដល់ទី៣៣ ជាករណីឆ្លងបន្តពីអ្នកដំណើរឈ្មោះ ថាំង វណ្ណា។
ជាមួយគ្នានេះ ករណីទី៣៤ ដល់ទី៧៤ គឺជាករណីពុំទាន់អាចសន្និដ្ឋានពីប្រភពចម្លងច្បាស់លាស់នៅឡើយ។ ចំពោះ ករណីទី៧៦ ដល់ទី៩៩ គឺជាប្រជាពលរដ្ឋត្រឡប់ពីប្រទេសថៃ មកដល់ខេត្តសៀមរាប ហើយជាករណីសង្ស័យ ត្រូវបានក្រុមគ្រូពេទ្យដាក់ឱ្យធ្វើចត្តាឡីស័ក នៅវិទ្យាល័យសម្តេចឪ។
ចំណែកអ្នកជាសះស្បើយទាំង ៤៩នាក់ ត្រូវបានក្រុមគ្រូពេទ្យ អនុញ្ញាតឱ្យចេញពីមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត វិទ្យាល័យអង្គរ និងវិទ្យាល័យដំដែក ត្រឡប់ទៅលំនៅឋានវិញ ដោយត្រូវបន្តការធ្វើចត្តាឡីស័ករយៈពេល ១៤ថ្ងៃ។
រដ្ឋបាលខេត្តសៀមរាប ក៏បានប្រកាសថា មានករណីស្លាប់ចំនួន ១ករណី ឈ្មោះ ជា ឈាង ភេទស្រី អាយុ ៦៨ឆ្នាំ មានអាសយដ្ឋាននៅភូមិខ្នារ សង្កាត់ជ្រាវ ក្រុងសៀមរាប ដែលវិជ្ជមានជំងឺកូវីដ-១៩ កាលពីថ្ងៃទី២១ ខែមិថុនា ឆ្នាំ២០២១ វេលាម៉ោង ១២ និង១០នាទី និងបានស្លាប់ នៅថ្ងៃទី២៤ ខែកក្កដា ឆ្នាំ២០២១ វេលាម៉ោង ២០ និង២៣នាទី ដោយជំងឺរលាកសួត បង្កដោយមេរោគកូវីដ-១៩។
រដ្ឋបាលខេត្តសៀមរាប ក៏បានប្រកាសជូនបងប្អូនប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោល ជាមួយអ្នកវិជ្ជមានខាងលើ សូមរួសរាន់ធ្វើចត្តាឡីស័កតាមផ្ទះ ក្នុងក្រុមគ្រួសាររៀងៗខ្លួនឱ្យបានគ្រប់ ១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត ក្នុងករណីមិនអនុវត្តកាតព្វកិច្ចចត្តាឡីស័ក រដ្ឋបាលខេត្តនឹងចាត់វិធានការផ្លូវច្បាប់ចំពោះបុគ្គលទាំងឡាយណាដែលលើ្មសនឹងវិធានសុខាភិបាលនេះ។ ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការ ក្នុងការយកសំណាកធ្វើតេស្តស្រាវជ្រាវ៕ ច័ន្ទ រស្មី
ចែករំលែកព័តមាននេះ