ខេត្តកែប ៖ លោកកែន សត្ថា អភិបាលខេត្តកែបបានអះអាងថា ដើម្បីចូលរួមអបអរបុណ្យចូលឆ្នាំសាកល និងទិវាជ័យជម្នះ៧មករា ខេត្តកែប បានត្រៀមរៀបចំកម្មវិធីសិល្បៈ និងកម្មវិធីកម្សាន្តមួយចំនួនទៀត
ខេត្តកែប ៖ លោកកែន សត្ថា អភិបាលខេត្តកែបបានអះអាងថា ដើម្បីចូលរួមអបអរបុណ្យចូលឆ្នាំសាកល និងទិវាជ័យជម្នះ៧មករា ខេត្តកែប បានត្រៀមរៀបចំកម្មវិធីសិល្បៈ និងកម្មវិធីកម្សាន្តមួយចំនួនទៀត សម្រាប់ភ្ញៀវជាតិ និងអន្តរជាតិដែលទៅកម្សាន្តខេត្តកែប ។
លោកកែន សត្ថា បញ្ជាក់កាលពីពេល ថ្មីៗកន្លងមកថា បច្ចុប្បន្នបណ្តាខេត្តជាប់មាត់សមុទ្រកម្ពុជាមានភ្ញៀវកើនឡើងជាលំដាប់ ក្នុងនោះសម្រាប់ភ្ញៀវជាតិ និងអន្តរជាតិដែលទៅលេងខេត្តកែបកើនឡើងជាង១លាននាក់ហើយ។ ឆ្លើយតបទៅនឹងភ្ញៀវទេសចរចេះតែកើនឡើងជារៀងរាល់ឆ្នាំនេះ ទើបសហការជាមួយផ្នែកពាក់ព័ន្ធរៀបចំកម្មវិធីសិល្បៈ និងទស្សនីយភាពមួយចំនួនក្នុងរយៈពេល៣ថ្ងៃ គឺថ្ងៃទី២៩ដល់៣១ ខែធ្នូ ។ មានការតាំងពិព័រណ៍ ផ្សារណាត់ ការបង្ហោះខ្លែង បង្ហោះគោម បាញ់កាំជ្រួចពីលើទឹក និងអុំទូកប៉ុកចាយ ដែលជាប្រពៃណីរបស់អ្នកនេសាទរស់នៅតាមបណ្តាខេត្តជាប់មាត់សមុទ្រ ។ សម្រាប់ការប្រគំតន្ត្រី គឺនឹងមានសិល្បករ សិល្បការិនី ល្បីៗពីភ្នំពេញចូលរួមសម្តែង ខណៈឆ្នាំនេះបានត្រៀមរៀបចំពិធីបង្ហោះខ្លែង ដើម្បីរំឭកដល់វប្បធម៌ និងប្រពៃណីរបស់បុព្វបុរសខ្មែរយើងឲ្យ ក្មេងៗជំនាន់ក្រោយបានស្គាល់ ។
បើតាមលោកកែន សត្ថា ការប្រារព្ធពិធីរយៈពេល៣ថ្ងៃនេះលោករំពឹងថា នឹងមានភ្ញៀវជាតិ និងអន្តរជាតិចូលរួមកម្សាន្តប្រមាណជាង២០ម៉ឺននាក់ ដោយសារតែកាលពីឆ្នាំកន្លងទៅប្រារព្ធពីធីនេះត្រឹមតែរយៈពេល១យប់១ថ្ងៃប៉ុណ្ណោះទទួលភ្ញៀវចូលរួមប្រហែលគ្នានោះ ។
ស្របពេលកំណើនភ្ញៀវទៅលេងនៅថ្ងៃបុណ្យ និងព្រឹត្តិការណ៍ ផ្សេងៗនោះ គឺខេត្តកែបនៅពុំទាន់អាចមានបន្ទប់ស្នាក់នៅសម្រាប់ភ្ញៀវគ្រប់គ្រាន់នៅឡើយទេ ។ ខេត្តកែបនាពេលនេះទាំងផ្ទះសំណាក់ និងសណ្ឋាគារសរុបមានតែជាង១ពាន់បន្ទប់ប៉ុណ្ណោះ ។ ទោះជាយ៉ាងណាក្តី បើភ្ញៀវទៅលេង គឺអាចទៅស្នាក់នៅខេត្តកំពត បូកគោ និងខេត្តព្រះសីហនុ ឬខេត្ត ជាប់ៗនេះក៏បាន ជាពិសេសភ្ញៀវអាចទៅលេងហើយវិលត្រឡប់ទៅភ្នំពេញវិញពេលរសៀលក៏បាន ។
លោកកែន សត្ថា ឲ្យដឹងថា បច្ចុប្បន្នខេត្តកែបខិតខំកសាងរាល់ហេដ្ឋារចនាសម្ព័ន្ធ ផ្សេងៗ រហូតដល់ខេត្តមួយនេះទទួលបានផ្ការំដួល៣ទងពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ ជាងនេះទៅទៀតខេត្តកែបកំពុងទទួលបានការវិនិយោគសណ្ឋាគារ និងផ្ទះសំណាក់បន្ថែម ។ អ្វីដែលពិសេសនោះប្រជាពលរដ្ឋនៅខេត្តកែបបានរៀបចំផ្ទះរបស់ខ្លួនឲ្យទៅជាបន្ទាប់ស្នាក់នៅ២ឬ៣បន្ទប់សម្រាប់ភ្ញៀវសម្រាកបាន ហើយមានតម្លៃសមរម្យ ។ ការខិតខំប្រឹងប្រែងនេះធ្វើឲ្យប្រជាពលរដ្ឋមានការងារធ្វើ បង្កើនមុខរបរ និងមានប្រាក់ចំណូលគួរសម ខណៈពេលដែលអាត្រាប្រជាពលរដ្ឋក្រីក្រនៅក្នុងខេត្តកែបធ្លាក់មកត្រឹម១៤,៣៧%ប៉ុណ្ណោះនៅក្នុងឆ្នាំ ២០១៥ ៕
ចែករំលែកព័តមាននេះ