រាជធានីភ្នំពេញ៖ កម្លាំងសមត្ថកិច្ចនគរបាលខណ្ឌមានជ័យ កាលពីព្រឹកថ្ងៃទី២៦ ខែកក្កដា ឆ្នាំ២០២១ បានចាប់បញ្ជូនមេការម៉ៅការសំណង់ជនជាតិចិនតៃវ៉ាន់ម្នាក់ ទៅកាន់សាលាដំបូងរាជធានីភ្នំពេញ ពាក់ព័ន្ធពីបទ.ឆបោក និងរំលោភលើសេចក្តីទុកចិត្ត។ ពោលគឺស៊ីដាច់ប្រាក់ខែបុគ្គលិក និងកម្មករជនជាតិចិន និងខ្មែរ ប្រមាណជិត ១លានដុល្លារអាមេរិក។
ជនសង្ស័យឈ្មោះ លីន គ័ងទីន (LIN, KUAN-TIAN) ភេទប្រុស អាយុ ៤១ឆ្នាំ ជាជនជាតិចិនតៃវ៉ាន់ មុខរបរ មេការម៉ៅការសំណង់ ទីលំនៅផ្ទះជួល ក្នុងសង្កាត់ព្រៃស ខណ្ឌដង្កោ រាជធានីភ្នំពេញ។
ខណៈពេលសមត្ថកិច្ចបានបញ្ជូនជនសង្ស័យទៅកាន់សាលាដំបូងរាជធានីភ្នំពេញ នាព្រឹកថ្ងៃទី២៦កក្កដានេះ គេបានសង្កេតឃើញបុគ្គលិក កម្មករ ចិន និងខ្មែរប្រមាណជិត ១០០នាក់ នាំគ្នាកាន់ផ្ទាំងបដាតូចៗ ដោយមានសរសេរជាអក្សរថា «ភាពអត់ឃ្លាន អ្នករាល់ថ្ងៃ យុត្តិធម៌» ទៅឈរនៅមុខអគារសាលាដំបូង ដែលនោះ មានន័យថា ក្នុងគោលបំណងពួកគេ ចង់ឲ្យតុលាការជួយរកយុត្តិធម៌ ចំពោះមេការចិនតៃវ៉ាន់ម្នាក់នេះ ស៊ីដាច់ប្រាក់ខែពួកគាត់ទាំងអស់គ្នា សរុបជិត ១លានដុល្លារអាមេរិក។
ពាក្យបណ្តឹងរបស់ជនរងគ្រោះ បានឲ្យដឹងថា នៅក្នុងអំឡុងខែមិថុនា ឆ្នាំ២០២០ ជនសង្ស័យ ឈ្មោះ លីន គ័ងទីន (LIN, KUAN-TIAN) បានទទួលម៉ៅការធ្វើសំណង់ផ្ទះវីឡា វូតលែន រ៉េស៊ីឌែន នៅចំណុចផ្លូវបេតុង ក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ហើយក៏បានម៉ៅការសំណង់បន្តឲ្យជនរងគ្រោះ ចំនួន ៦នាក់ ធ្វើការងារបន្ត តាមជំនាញផ្សេងៗ រួមមាន ៖ ទី១-ឈ្មោះ ចូវ សាំង ភេទប្រុស អាយុ ៤៦ ឆ្នាំ (ផ្នែកលាបជញ្ជាំងអាគារ) ទី២-ឈ្មោះ វ៉ូង ស៊ន ភេទប្រុស អាយុ ២៧ ឆ្នាំ (ផ្នែករៀបឥដ្ឋការ៉ូ) ទី៣-ឈ្មោះ យ៉ាង ជីន ភេទប្រុស អាយុ ៣៦ ឆ្នាំ (ផ្នែកធ្វើពិដាន) ទី៤-ឈ្មោះ លីវ ឆេង ភេទប្រុស អាយុ ៤៧ ឆ្នាំ (ជាមេការសំណង់ក្នុងការដ្ឋាន) ទី៥-ឈ្មោះ ជិន ចុងឃុន ភេទប្រុស អាយុ៦០ ឆ្នាំ (ជាមេការការដ្ឋានសំណង់) និងទី៦-ឈ្មោះ លី គុយស៊ាង ភេទប្រុស អាយុ៣១ ឆ្នាំ (ផ្នែកធ្វើពិដាន)។
ជនសង្ស័យឈ្មោះ លីន គ័ងទីន បានទូទាត់ថ្លៃម៉ៅការសំណង់ និងពលកម្មការងារឲ្យទៅឈ្មោះ ចូវ សុំាង ជាទឹកប្រាក់សរុបចំនួន ៦៤០ ៨៥២ ដុល្លារអាមេរិក។ ប៉ុន្តែឲ្យបានចំនួន ២៦០ ៤៤០ ដុល្លារអាមេរិកទេ នៅខ្វះទឹកប្រាក់ចំនួន ៣៨០ ៤១២ដុល្លារអាមេរិកទៀត។ ឈ្មោះ វ៉ូង ស៊ន ទឹកប្រាក់ម៉ៅការសំណង់សរុប ចំនួន ១១៥ ៦៣៦ដុល្លារ តែទើបឲ្យបានចំនួន ៧៨ ៣១០ដុល្លារ នៅខ្វះទឹកប្រាក់ចំនួន ៣៧ ៣២៦ដុល្លារទៀត ឈ្មោះ យ៉ាង ជីន ទឹកប្រាក់ម៉ៅការសំណង់សរុបទឹកប្រាក់ចំនួន ១៦៥ ៨៣៧ដុល្លារ ទើបឲ្យបានចំនួន ៩៥ ៥៨៤ដុល្លារ នៅខ្វះទឹកប្រាក់ចំនួន ៧០ ២៥៣ដុល្លារទៀត ឈ្មោះ លីវ ឆេង ទឹកប្រាក់ម៉ៅការសំណង់សរុបចំនួន ១០០ ៥០០ដុល្លារអាមេរិក តែឲ្យបានចំនួន ៨ ០០០ដុល្លារអាមេរិកទេ នៅខ្វះទឹកប្រាក់ចំនួន ៩២ ៥០០ដុល្លារទៀត ឈ្មោះ ជិន ចុងឃុន ទឹកប្រាក់ម៉ៅការសំណង់សរុបចំនួន ១៥ ៧០០ដុល្លារអេមរិក ឲ្យបានតែចំនួន ៧ ៥០០ដុល្លារអាមេរិកទេ នៅខ្វះចំនួន ៨ ២០០ដុល្លារ និងឈ្មោះ លី គុយស៊ាង ទឹកប្រាក់ម៉ៅការសំណង់សរុបចំនួន ៤៨ ៩៨៤ដុល្លារអាមេរិក ទូទាត់ឲ្យបានចំនួន ២៤ ៧៥០ដុល្លារអាមេរិកទេ នៅខ្វះចំនួន ២៤ ២៣២ដុល្លារអាមេរិកទៀត។
ចំពោះប្រាក់ដែលជំពាក់នោះ ជនសង្ស័យបានសន្យាថា ទូទាត់ឲ្យជាបន្តបន្ទាប់ នៅពេលក្រោយ តែមកដល់ក្នុងអំឡុងខែមេសា ឆ្នាំ២០២១ ជនសង្ស័យ បានគេចវេះ មិនព្រមជួបជាមួយជនរងគ្រោះ ហើយរត់គេចខ្លួនបាត់ រហូតដល់ថ្ងៃទី២៣ ខែកក្កដា ឆ្នាំ២០២១ វេលាម៉ោង ៤ និង៣០នាទីរសៀល ជនរងគ្រោះទាំង ៦នាក់ខាងលើ បានតាមរកឃើញជនសង្ស័យ នៅសង្កាត់ព្រៃស ខណ្ឌដង្កោ រាជធានីភ្នំពេញ ក៏ឃាត់ខ្លួន យកមកប្រគល់ឲ្យសមត្ថកិច្ចនគរបាលប៉ុស្តិ៍ចាក់អង្រែក្រោម សាកសួរ និងបានពឹងពាក់មេធាវី ឲ្យជួយការពារក្តីក្នុងរឿងក្តីនេះ ដើម្បីដាក់ពាក្យបណ្ដឹង ឲ្យសមត្តកិច្ចចាត់ការតាមផ្លូវច្បាប់។
សូមបញ្ជាក់ថា ជនជាតិចិន ៦នាក់ដូចមានឈ្មោះខាងលើនេះ គឺជាអ្នកទទួលម៉ៅការពីមេការ តាមមុខជំនាញ ពីជនសង្ស័យ។ ដូច្នេះក្នុងនោះ ជនរងគ្រោះជាច្រើននាក់ទៀត គឺជាបុគ្គលិក និងកម្មករ មានចិន និងមានខ្មែរ។ ជនសង្ស័យ មានភារកិច្ចប្រគល់ប្រាក់ឲ្យទៅមេការផ្នែកជំនាញទាំង ៦នាក់នោះ ដើម្បីបើកឲ្យបុគ្គលិក និងកម្មករ តែដល់ពេលមេការម៉ៅការផ្ទាល់ពីម្ចាស់សំណង់ ស៊ីដាច់ប្រាក់ទាំងនោះហើយ ទើបជ្រួលច្របល់ ដាច់បាយទាំងអស់គ្នានេះ៕ ឃឹម ប៊ុនណាក់
ចែករំលែកព័តមាននេះ