រាជធានីភ្នំពេញ ៖ ការប្រកួតប្រដាល់វគ្គសន្សំពិន្ទុជុំចុងក្រោយឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាម នៅលើសង្វៀនស៊ីធីអិន ថ្ងៃសៅរ៍ទី២៦ ធ្នូ ខាងមុខនេះបានដល់ទីបញ្ចប់ហើយ ។ សម្រាប់សមាសភាពគូប្រកួតវគ្គសន្សំពិន្ទុតាមពូលលើកនេះ តម្រូវទៅលើកីឡាករមិន សិលា មកពីសមាគមកីឡាប្រដាល់ក្រសួងការពារជាតិ ជួបប្រកួតជាមួយកីឡាករថៃឈ្មោះម៉ាម៉ៃ ស៊ីតយ៉តឈាន និងកីឡាករជា សំនៀង មកពីក្លិបទ័ពពិសេសឆត្រយោង៩១១ ប្រកួតជាមួយកីឡាករថៃឈ្មោះណាត់តាផុន គៀតអាវ៉ន ។
រវាងមិន សិលា និងម៉ាម៉ៃ ស៊ីតយ៉តឈាន ប្រកួតលើកនេះ ដើម្បីបង្គ្រប់កិច្ចប៉ុណ្ណោះ ព្រោះពួកគេទាំងពីរនាក់ប្រកួត៣លើកកន្លងមកសុទ្ធតែបរាជ័យដូចគ្នា បានន័យថា លើកនេះទោះនរណាឈ្នះក៏ត្រូវធ្លាក់ដែរ ។
ចំណែកជា សំនៀង និងណាត់តាផុន គៀតអាវ៉ន វិញមិនដូចគ្នាទេដោយសារជា សំនៀង ប្រកួតលើកនេះគឺដើម្បីបង្គ្រប់កិច្ចព្រោះ៣ប្រកួតកន្លងមកមិនធ្លាប់ស្គាល់ឈ្នះទាល់តែសោះ ។ ឯណាត់តាផុន គៀតអាវ៉ន មានឱកាសបានឡើងទៅប្រកួតនៅវគ្គបន្តដោយស្វ័យប្រវតិ្តដោយសារ៣ប្រកួតកន្លងមកឈ្នះ២ចាញ់១ ហើយមានតម្រុយឈ្នះលើកនេះទៀតព្រោះល្បិចប្រយុទ្ធរបស់ជា សំនៀង អន់ជាងគេឆ្ងាយណាស់រាប់តាំងពីផ្លែកែងនិងជង្គង់ឡើងទៅ ។
គួររំលឹកថា ក្នុងចំណោមកីឡាករកម្ពុជាទាំង៤រូបមានតែអ៊ុំ ចំរើន មកពីក្លិបតាឡីដំរីមានរិទ្ធប៉ុណ្ណោះដែលមានសំណាងជាងគេបានឡើងទៅប្រកួតនៅវគ្គបន្តទៀត ខណៈចាន់ គឹមលាភ មកពីក្លិបនិរោធន៍មានជ័យ ក៏ត្រូវហាលខោដែរ ។
ដោយឡែកសមាសភាពគូប្រកួតមិត្តភាពរវាងកីឡាករកម្ពុជា និងកម្ពុជាវិញមាន កីឡាករហេង វិឆ័យ មកពីក្លិបកងពលតូចលេខ៧០ ប្រកួតជាមួយកីឡាករសរ រាជសីហ៍ មកពីក្លិបមោងឬស្សីមរតកគុនខ្មែរ និងកីឡាករសុខ វាសនា មកពីក្លិបឃ្លាំងមឿងកីឡា ប្រកួតជាមួយកីឡាករឡុង សំណាង មកពីក្លិបសាលវ័ន្តកីឡា ៕
ចែករំលែកព័តមាននេះ