ក្រោយពីចោរប្រដាប់អាវុធធ្វើសកម្មភាពប្លន់យ៉ាងសាហាវ កក្រើករញ្ជួយរាជធានី និងបណ្តាខេត្តខ្លះមក មិនត្រឹមតែធ្វើឱ្យមហាជន ប្រជារាស្ត្រភ័យខ្លាចប៉ុណ្ណោះទេ វាថែមទាំងធ្វើឱ្យអាជ្ញាធរមានសមត្ថកិច្ចក្រហមមុខគ្រប់ស្ថាប័នធំៗ ។
វិធានការក្តៅបានដាក់ចេញភ្លាមៗ… គឺបង្ក្រាប… បង្ក្រាប… ។ មិនត្រឹមតែបង្ក្រាបមុខសញ្ញាប្លន់នៅក្រៅគុកទេ… បង្ក្រាបទាំងមុខសញ្ញាប្លន់ដែលកំពុងនៅក្នុងគុកទៀតផង… នោះគឺហាមដោះលែងផ្តេសផ្តាស… ហាមសម្រាលទោស… ចោរប្លន់ដែលដោះលែងផុតទៅហើយ នៅទីណាខ្លះ… តាមដានឱ្យជាប់… ។ល។
ចូលដល់សប្តាហ៍កន្លងនេះ សកម្មភាពខ្លាំងរបស់ក្រុមចោរប្លន់នៅរាជធានី និងខេត្ត… បានស្ងប់ស្ងាត់ហើយ… ជាពិសេសប្លន់យកម៉ូតូនៅពេលរាត្រីក្នុងរាជធានី ដូចជាស្ងប់ស្ងាត់ដែរ… ។ ប្រសិនឃ្លានហ៊ានប្លន់ទៀត ប្រាកដជាដល់ថ្ងៃអង្សាមិនខាន… សមត្ថកិច្ចក្រហមមុខយ៉ាងនេះ បើមិនជឿទេ… លោកចោរទាំងឡាយសាកល្បងប្លន់មើល… កុំភ្លេចថា ចោរក៏ខ្លាចអស់ជីវិតដែរ…
តាមការកត់សម្គាល់ បើសមត្ថកិច្ចធ្វើខ្លាំង… ចោរប្លន់ទាំងឡាយក៏សម្រាកប្លន់ដែរ…
ខ្លាចជាងគេ… ខ្លាចធ្វើខ្លាំងតែមួយដង្ហើមចង្រិតហើយឈប់ទៅវិញ… ។ រឿងធ្វើខ្លាំង… អ្វីក៏ខ្លោចដែរ គឺសុំឱ្យខ្លាំងបានយូរ… ខ្លាំងជារៀងរហូត… ខ្លាំងឱ្យដូចភ្លៀងរលឹម…
ប្រសិនខ្លាំងគ្រាន់តែអួត… ខ្លាំងហើយដកថយវិញ… មិនយូរទេ… ចោរប្លន់ទាំងឡាយ ច្បាស់ជាស្រង់ដើមមិនខានឡើយ ។
ភ័យខ្លាចជាងគេ ចោរប្លន់ស្រង់ដើម… អ្នកលក់មាស… អ្នកវេរប្រាក់ទាំងឡាយ… ប្រយ័ត្នដោយខ្លួនឯងផង… ប្រយ័ត្នចោរឆ្លៀតឱកាសស្រង់ដើម…
អាឡេវ
ចែករំលែកព័តមាននេះ