ប្រទេសវៀតណាម ៖ ការនាំចេញសម្លៀកបំពាក់ និងវាយនភ័ណ្ឌសរុបរបស់វៀតណាមទៅកាន់ទីផ្សារសហរដ្ឋអាមេរិក បានកើនឡើងពីមួយឆ្នាំទៅមួយឆ្នាំចំនួន១១,៧% ឬស្មើនឹង៩,៨៨ប៊ីលានដុល្លារក្នុងអំឡុងពេល១១ខែដើមឆ្នាំ២០១៥នេះ ។
យោងតាមសមាគមសម្លៀកបំពាក់ និងវាយនភ័ណ្ឌវៀតណាម (Vitas) ឱ្យដឹងថា ក្នុងអំឡុងពេល១១ខែដំបូងនៃឆ្នាំ២០១៥ ទំហំទឹកប្រាក់នាំចេញទៅកាន់ទីផ្សារធំៗដទៃទៀតនៃផលិតផលសម្លៀកបំពាក់ និងវាយនភ័ណ្ឌរបស់វៀតណាមក៏មានសុទិដ្ឋិនិយមដែរ ក្នុងនោះការនាំចេញទៅកាន់អឺរ៉ុបមានចំនួន៣,០៩ប៊ីលានដុល្លារ នាំចេញទៅជប៉ុន២,៥៣ប៊ីលានដុល្លារ និងនាំចេញទៅកូរ៉េខាងត្បូង១,៩៨ប៊ីលានដុល្លារ ។
គេរំពឹងថា ការនាំចេញក្នុងវិស័យកាត់ដេរ និងវាយនភ័ណ្ឌរបស់វៀតណាមទៅកាន់សហរដ្ឋអាមេរិក នឹងមានការកើនឡើងក្នុងកម្រិតខ្ពស់ជាងមុននៅពេលកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) ចូលជាធរមាន ។
លោក Luong Hoang Thai ប្រធាននាយកដ្ឋានគោលនយោបាយពាណិជ្ជពហុភាគីរបស់ក្រសួងឧស្សាហកម្ម និងជាអនុប្រធានអ្នកចរចាលើកិច្ចព្រមព្រៀង TPP របស់វៀតណាមថ្លែងថា ៖ « តម្លៃពន្ធនាំចេញផលិតផលស្បែក ស្បែកជើង សម្លៀកបំពាក់ និងវាយនភ័ណ្ឌរបស់វៀតណាម ថ្មីៗនេះអ្នកនាំចេញចាំបាច់ត្រូវបង់ ឬទូទាត់ឲ្យសហរដ្ឋអាមេរិកក្នុងតម្លៃមួយខ្ពស់ជាងបណ្តាប្រទេសសមាជិករបស់ TPP ផ្សេងទៀត។ នេះបើតាមរបាយការណ៍របស់សារព័ត៌មានពាណិជ្ជកម្ម www.cafef.vn » ។
ចំណែកសហគ្រាសក្នុងស្រុកទាំងឡាយត្រូវតែបង់ពន្ធសរុប១,១៧ប៊ីលានដុល្លារលើការនាំចេញផលិតផលសម្លៀកបំពាក់ និងវាយនភ័ណ្ឌទៅកាន់ទីផ្សារសហរដ្ឋអាមេរិក ហើយត្រូវបង់ចំនួន៣០០លានដុល្លារសម្រាប់ការនាំចេញផលិតផលស្បែកជើង ។
លោក Luong Hoang Thai បានលើកឡើងថា ៖ « ហេតុនេះហើយទើបវៀតណាមទទួលជោគជ័យក្នុងការចរចាជាមួយសហរដ្ឋអាមេរិក ដើម្បីកាត់បន្ថយតារាងពន្ធសម្រាប់ផលិតផលស្បែកជើង និងសម្លៀកបំពាក់ ក៏ដូចជាវាយនភ័ណ្ឌ ចាប់ពីអត្រាជាមធ្យម១៧% មកនៅសូន្យភាគរយក្រោមការប្តេជ្ញាចិត្តរបស់ TPP » ។
ដើម្បីចូលរួមក្នុងតារាងលើកលែងពន្ធរហូតដល់សូន្យភាគរយនោះ បណ្តាអ្នកនាំចេញក្នុងស្រុកត្រូវតែសម្រេចនូវការធ្វើនិយ័តកម្មតាមប្រភពពីវត្ថុធាតុដើមសម្រាប់ផលិតកម្ម ក្រោមកិច្ចព្រមព្រៀង TPP ដើម្បីការពារបណ្តាប្រទេសជិតខាងពីការនាំចេញផលិតផលរបស់ពួកគេទៅវៀតណាម បន្ទាប់មកទើបនាំចេញទៅកាន់បណ្តាប្រទេសដទៃទៀត ។ ម្យ៉ាងទៀត កិច្ចព្រមព្រៀង TPP ក៏មានយន្តការអាចបត់បែនបានសម្រាប់វៀតណាមផងដែរ ក្នុងការផ្គត់ផ្គង់វត្ថុធាតុដើមពេលដែលការផ្គត់ផ្គង់ក្នុងស្រុករបស់ខ្លួនមិនទាន់គ្រប់គ្រាន់ ។
តាមរបាយការណ៍ពីកាសែត Tuoi tre ឱ្យដឹងថា នាយកដ្ឋានពន្ធដារបានបង្ហាញពីទំហំទឹកប្រាក់នាំចេញសម្លៀកបំពាក់ និងវាយនភ័ណ្ឌរបស់វៀតណាម ដោយសម្រេចបាន២០,៦ប៊ីលានដុល្លារក្នុងរយៈពេល១១ខែដំបូង ។
ឧស្សាហកម្មកាត់ដេរ និងវាយនភ័ណ្ឌក្នុងស្រុក ត្រូវការទំហំនាំចេញសរុបចំនួន២,៤ប៊ីលានដុល្លារក្នុងខែធ្នូ ដើម្បីសម្រេចតាមទិសដៅប្រចាំឆ្នាំក្នុងផ្នែកវាយនភ័ណ្ឌ និងកាត់ដេរសម្រាប់ឆ្នាំនេះក្នុងកម្រិត២៣ប៊ីលានដុល្លារ ។
ចំណែកក្រុមហ៊ុនកាត់ដេរ និងវាយនភ័ណ្ឌជាតិរបស់វៀតណាម (Vinatex) ដែលជាអ្នកផលិតសម្លៀកបំពាក់ និងវាយនភ័ណ្ឌធំជាងគេបំផុតក្នុងប្រទេស ត្រូវបានគេព្យាករថា នឹងសម្រេចបាននូវទំហំទឹកប្រាក់នាំចេញពីមួយឆ្នាំទៅមួយឆ្នាំចំនួន១០% ស្មើនឹង៣,៤ប៊ីលានដុល្លារក្នុងរយៈពេលពេញមួយឆ្នាំ ។
ប្រធាននាយកដ្ឋានកិច្ចការទូទៅ និងនីតិកម្មរបស់ Vinatex លោក Tran Viet បានថ្លែងក្នុងសន្និសីទកាសែតមួយស្តីពីផលិតកម្ម និងពាណិជ្ជកម្មរបស់ក្រុមហ៊ុនប្រចាំឆ្នាំនេះដែលប្រារព្ធធ្វើឡើងនៅទីក្រុងហាណូយ ។
ទោះជាយ៉ាងណា ប្រាក់ចំណេញមុនកាត់ពន្ធរបស់ក្រុមហ៊ុនត្រូវបានគេព្យាករទុកថា នឹងសម្រេចបានក្នុងរង្វង់៦០លានដុល្លារសម្រាប់ឆ្នាំនេះ គឺប្រហាក់ប្រហែលគ្នានឹងអត្រាសម្រេចបានក្នុងឆ្នាំ២០១៤ដែរ ដោយសារការទម្លាក់ថ្លៃរូបិយប័ណ្ណរបស់បណ្តាប្រទេសនាំចេញផលិតផលដូចជា ចិន ឥណ្ឌា និងឥណ្ឌូណេស៊ី ដែលធ្វើឱ្យប៉ះពាល់ដល់ផលិតកម្ម និងលទ្ធផលជំនួញក្នុងឆ្នាំ២០១៥ របស់ក្រុមហ៊ុន Vinatex ។
គេរំពឹងថា ការនាំចេញរបស់ក្រុមហ៊ុនទៅកាន់ទីផ្សារធំៗក្នុងឆ្នាំនេះនឹងកើនឡើងដូចជា ស្មើនឹង១២,៩៥% ទៅសហរដ្ឋអាមេរិក, ៥,៩៦% ទៅអឺរ៉ុប, ៧,៩៥% ទៅជប៉ុន និង៨,៧៧% ទៅកាន់កូរ៉េខាងត្បូង បើធៀបនឹងឆ្នាំ២០១៤ ។
ការកើនឡើងនេះដោយសារតែភាពវិជ្ជមាននៃផលិតកម្ម និងពាណិជ្ជកម្មពីបណ្តាក្រុមហ៊ុនសមាជិកធំៗរបស់ Vinatex រាប់បញ្ចូលទាំងក្រុមហ៊ុនរួមភាគហ៊ុនដូចជា Phong Phu, Hoa Tho Textile and Garment, Viet Tien Garment Corporation, Duc Giang Corporation រួមទាំងក្រុមហ៊ុនសាជីវកម្មកាត់ដេរ១០ទៀត ។
ជាមួយនឹងភាពវិជ្ជមាននៃការប៉ាន់ប្រមាណការនាំចេញសម្លៀកបំពាក់ក្នុងស្រុក Vinatex រំពឹងថា កំណើនឆ្នាំក្រោយនឹងសម្រេចបាន៨% នៃចំណូលសរុបរបស់ខ្លួន និង១០% នៃទំហំទឹកប្រាក់នាំចេញសរុបទាំងអស់ បើធៀបនឹងឆ្នាំ២០១៥ ។
លោក Hoang Ve Dung អគ្គនាយករងរបស់ក្រុមហ៊ុន Vinatex មានប្រសាសន៍ថា ៖ « សញ្ញានៃកិច្ចព្រមព្រៀងពាណិជ្ជកម្មសេរីមួយចំនួនក្នុងឆ្នាំនេះ នឹងបង្កើតបាននូវរលកដ៏ធំសម្រាប់ការវិនិយោគ ជាពិសេស ការវិនិយោគពីបរទេសមកកាន់វៀតណាម និងការវិនិយោគក្នុងឧស្សាហកម្មវាយនភ័ណ្ឌ និងកាត់ដេរក្នុងស្រុកនាថ្ងៃអនាគត » ។
ដើម្បីទទួលនូវរលកវិនិយោគនេះ ក្រុមហ៊ុនបានបញ្ចប់គម្រោងធំៗលើផលិតកម្មសរសៃអំបោះរួមមាន រោងចក្រ Phu Hung Fiber Factory, Phu Cuong Fiber Factory, Nam Dinh Fiber Factory និង Que Son Textile and Garment ៕
ចែករំលែកព័តមាននេះ