ប្រទេសថៃ ៖ ក្រុមហ៊ុនស៊ីម៉ង់ត៍ (SCG) ដែលបានចុះបញ្ជីក្នុងផ្សារមូលបត្រថៃ នឹងចំណាយប្រាក់ចំនួន២០០លានដុល្លារដើម្បីពង្រីកការវិនិយោគនៅប្រទេសកម្ពុជា ចាប់ពីឆ្នាំ២០១៦ ដល់ឆ្នាំ២០២០ ។
លោក Kan Trakulhoon ប្រធាន និងជានាយកប្រតិបត្តិនៃក្រុមហ៊ុនឧស្សាហកម្មធំជាងគេបំផុតរបស់ថៃ លើកឡើងថា ៖ « ការយកចិត្តទុកដាក់របស់យើងនឹងផ្តោតលើវិស័យគ្រឿងសំណង់ និងស៊ីម៉ង់ត៍ ដែលមានសក្តានុពលខ្លាំងក្លាលើការរីកចម្រើនក្នុងចំណោមគោលនយោបាយបង្កើនគម្រោងហេដ្ឋារចនាសម្ព័ន្ធរបស់រាជរដ្ឋាភិបាលកម្ពុជា» ។
លោកបន្តថា ៖ « SCG បានចំណាយប្រាក់ចំនួន២៧៧លានដុល្លាររួចមកហើយនៅទីនោះ ក្នុងអំឡុងពេលប៉ុន្មានឆ្នាំថ្មីៗនេះ ។ ពេលសមាគមសេដ្ឋកិច្ចអាស៊ានមកដល់នៅឆ្នាំក្រោយនេះ គេរំពឹងថា នឹងក្លាយជាគន្លឹះនៃតម្រូវការខ្ពស់សម្រាប់ស៊ីម៉ង់ត៍ និងគ្រឿងសំណង់ ។ ក្រុមហ៊ុនស៊ីម៉ង់ត៍ SCG បានសម្លឹងឃើញកម្ពុជាស្ថិតក្នុងចំណោមសមាជិកអាស៊ាន ដែលគួរឲ្យចាប់អារម្មណ៍ជាងគេ ជាមួយនឹងអត្រាកំណើនសេដ្ឋកិច្ចខ្ពស់ » ។
លោកបន្តទៀតថា ៖ « សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានជួបជាមួយថ្នាក់ដឹកនាំពាណិជ្ជកម្មកម្ពុជា និងថៃ រាប់បញ្ចូលទាំងក្រុមហ៊ុន SCG នៅក្រុងបាងកក កាលពីថ្ងៃសុក្រនេះ បានកម្រិតនូវអត្រាកំណើនប្រចាំឆ្នាំជាមធ្យមរបស់កម្ពុជា ក្នុងអត្រា៧% » ។
កម្ពុជា ជាប្រទេសជាប់លំដាប់ជាដៃគូពាណិជ្ជកម្មអាស៊ានធំបំផុតទី៨ របស់ថៃ ជាមួយនឹងទំហំពាណិជ្ជកម្មប្រចាំឆ្នាំជាមធ្យមក្នុងអត្រា៣,៨៤ប៊ីលានដុល្លារ ។
តាមទិន្នន័យពីក្រសួងពាណិជ្ជកម្មថៃបង្ហាញថា ផលិតផលសំខាន់ជាងគេដែលថៃបាននាំចេញទៅកាន់ទីផ្សារកម្ពុជា រួមមាន ប្រេងចម្រាញ់រួច អាហារ ភេសជ្ជៈ ស៊ីម៉ង់ត៍ គ្រឿងសំណង់ រថយន្ត និងគ្រឿងបន្លាស់ ។
លោក Kan Trakulhoon មានប្រសាសន៍ថា ៖ « កម្ពុជា គឺជាប្រទេសតែមួយគត់ដែលផ្តោតការយកចិត្តទុកដាក់លើក្រុមហ៊ុន SCG ក្នុងតំបន់អាស៊ីអាគ្នេយ៍ ស្របពេលដែលក្រុមហ៊ុននេះតាំងចិត្តបន្តគម្រោងវិនិយោគដោយពេញលេញក្នុងឧស្សាហកម្មគីមីឥន្ធនៈរបស់វៀតណាម» ។
ថ្មីៗនេះ ក្រុមហ៊ុនសាខា SCG Chemicals Co ឱ្យដឹងថា ខ្លួននឹងប្រតិបត្តិការបន្តជាមួយការសាងសង់រោងចក្រគីមីឥន្ធនៈ ដែលមានទំហំទឹកប្រាក់៤,៥ប៊ីលានដុល្លារនៅប្រទេសនេះ បើទុកជាមានការដកខ្លួនពីដៃគូរបស់ខ្លួន គឺក្រុមហ៊ុន Qatar Petroleum ក៏ដោយ ។
លោក Kan Trakulhoon បញ្ជាក់ថា ៖ « ចំពោះទស្សនវិស័យនៃការវិនិយោគទាំងមូលនៅកម្ពុជា អាហារកែច្នៃមានភាពវិជ្ជមានជាមួយការស្វាគមន៍វិនិយោគិនបរទេសពីសំណាក់រដ្ឋាភិបាលកម្ពុជា រាប់ទាំងប្រទេសថៃផងដែរ។ ការបើកច្រកទ្វារក្នុងតំបន់ដែលជ្រកក្រោមស្លាកសមាគមសេដ្ឋកិច្ចអាស៊ាន ផ្នែកទេសចរណ៍ និងអចលនទ្រព្យ គឺជាវិស័យដែលគួរឲ្យចាប់អារម្មណ៍ពីរផ្សេងទៀត ដែលវិនិយោគិនថៃគួរបោះជំហានចូលកាន់តែជិត » ។
ចំណែកប្រធានក្រុមហ៊ុន TK Group លោក Thaveekij Jaturajarernkul ដែលបានចូលរួមនៅក្នុងជំនួបនោះដែរ មានប្រសាសន៍ថា ៖ « ក្រុមហ៊ុនរបស់លោកកំពុងតែវិនិយោគនៅប្រទេសកម្ពុជាអស់រយៈពេល២៥ឆ្នាំមកហើយ។ ម្យ៉ាងទៀត ក្រុមហ៊ុនកំពុងតែស្វែងរកឱកាសវិនិយោគបន្ថែមទៀតផងដែរ ។ ក្រុមហ៊ុនរបស់លោកបានវិនិយោគក្នុងមុខជំនួញសណ្ឋាគារ និងទេសចរណ៍ អចលនទ្រព្យ និងឧទ្យានឧស្សាហកម្មនៅខេត្តបន្ទាយមានជ័យ ដែលជាប់ព្រំប្រទល់ជាមួយខេត្តស្រះកែវរបស់ថៃ » ។
លោក Thaveekij Jaturajarernkul បន្តថា ៖ « អចលនទ្រព្យឧស្សាហកម្ម (ឧទ្យានឧស្សាហកម្ម) បានគ្របដណ្តប់លើផ្ទៃដី៥០០រ៉ៃជាមួយនឹងផលិតកម្មសំខាន់ៗដូចជា សម្លៀកបំពាក់ វាយនភ័ណ្ឌ និងគ្រឿងបន្លាស់រថយន្ត។ បណ្តាវិនិយោគិនបរទេសជាច្រើនបានចាប់អារម្មណ៍ប្រទេសកម្ពុជា ដែលផ្តល់នូវឯកសិទ្ធិវិនិយោគផ្សេងៗក្នុងការទាក់ទាញពួកគេ » ។
លោកបញ្ជាក់ថា ៖ « វិនិយោគិនចិនធំៗ ក៏កំពុងចរចាជាមួយលោកអំពីការវិនិយោគក្នុងសួនឧស្សាហកម្មរបស់លោកនៅខេត្តបន្ទាយមានជ័យផងដែរ ។ វិនិយោគិនចិនទាំងនោះថែមចាប់អារម្មណ៍លើការផលិតគ្រឿងបន្លាស់រថយន្តទៀតផង ។ ចំណែកវិស័យផ្សេងទៀតដូចជា វិស័យកាត់ដេរ និងអាហារកែច្នៃ ក៏គេសម្លឹងឃើញប្រទេសកម្ពុជាដែរ ដោយសារគេរាប់ថា ជាច្រកទ្វារដ៏ល្អឥតខ្ចោះទៅកាន់អាស៊ីប៉ាស៊ីហ្វិក ដែលតភ្ជាប់មហាសមុទ្រប៉ាស៊ីហ្វិកតាមវៀតណាម និងកំពង់ផែផ្ទាល់ខ្លួនរបស់កម្ពុជា » ។
ជាងនេះទៀត សូម្បីតែវិនិយោគិនដែលធ្លាប់តែរីករាយជាមួយកម្លាំងពលកម្មធូរថ្លៃ ឬមានតម្លៃឈ្នួលទាបក្នុងស្រុករបស់ខ្លួន បច្ចុប្បន្នក៏កំពុងសម្លឹងមិនដាក់ភ្នែកមកលើកម្ពុជាដែរ ដែលជាទីតាំងផ្តល់ប្រាក់ឈ្នួលអប្បបរមាទាបជាងប្រទេសចិន ។
គួររំឭកថា ផ្សារហ៊ុនរបស់ Siam Cement បានបិទការជួញដូរកាលពីថ្ងៃសុក្រ នៅលើផ្សារមូលបត្រថៃក្នុងអត្រា៤៣៨បាត ធ្លាក់ចុះ១៤បាតក្នុងការជួញដូរដែលមានតម្លៃទឹកប្រាក់៧៥៨បាត ៕
ចែករំលែកព័តមាននេះ