ជំទាវទីមួយ Grace Mugabe នៅប្រទេសស៊ីមបាវ៉េខាងទ្វីបអាហ្វ្រិក បានបង្កឱ្យប្រជាជនរបស់ខ្លួនមានកំហឹងជាថ្មី បន្ទាប់ពីនិយាយថា «នាងៗដែលស្លៀកពាក់ខ្លីពេលចេញទៅលេងខាងក្រៅ ហើយត្រូវគេចាប់រំលោភ គឺជាកំហុសរបស់ខ្លួន បន្ទោសអ្នកណាកើត» ។ សម្តីនេះផ្ទុយពីសម្តីប្រធានាធិបតី Robert Mugabe ស្វាមីរបស់គាត់ ដែលធ្លាប់និយាយរឿងចាប់រំលោភនារីភេទកាលពីមុនថា រដ្ឋាភិបាលកំពុងពិចារណាចាប់ ប្រុសៗកំហូចក្រៀវចោលដើម្បីកុំឱ្យ ស្រីៗរងគ្រោះទៅទៀត ។
អាយុតិចជាងស្វាមី៤១ឆ្នាំ ប៉ុន្តែចាប់តាំងពីរៀបអាពាហ៍ពិពាហ៍ជាមួយប្រធានាធិបតី Robert Mugabe នាឆ្នាំ១៩៩៦ រហូតដល់សព្វថ្ងៃ ជំទាវ Grace Mugabe (ស្ត្រីមេម៉ាយកូនមួយ)រូបនេះ មានរឿងអាស្រូវធ្វើឱ្យមហាជនទើសភ្នែកទើសត្រចៀកជានិច្ច មានតាំងពីរឿងសហាយស្មន្ធ រឿងចាយលុយរដ្ឋតាមចិត្តយ៉ាងខ្ជះខ្ជាយ។ ជំទាវ Grace Mugabe ចូលចិត្តដើរលេងទិញអីវ៉ាន់នៅទីក្រុងប៉ារីស ទីក្រុងទ្បុងដ៍ សិង្ហបុរី ហុងកុង ទិញ ម្តងៗចំណាយប្រាក់យ៉ាងតិចក៏១លានដុល្លារអាមេរិកដែរ ។ តាមការចុះផ្សាយរបស់កាសែត Daily Mail ឃើញថា ជំទាវទី១រូបនេះចំណាយប្រាក់៣,១លានដុល្លារអាមេរិក សម្រាប់ទិញអីវ៉ាន់ក្នុងឆ្នាំ២០១៤ ហើយក្នុងឆ្នាំដដែលនោះចំណាយប្រមាណ៣លានផោនអង់គ្លេស រៀបអាពាហ៍ពិពាហ៍កូនស្រីច្បងរបស់ខ្លួនទៀត ។
ប្រភពជាច្រើនអះអាងថា ជំទាវទីមួយ Grace Mugabe ដកប្រាក់ជាង១០លានដុល្លារអាមេរិកពីធនាគារកណ្តាលស៊ីមបាវ៉េ យកទៅទិញអចលនទ្រព្យ ទិញភូមិគ្រឹះមួយចំនួននៅទ្វីបអាស៊ី សម្រាប់ខ្លួននិងស្វាមីរស់នៅពេលស្វាមីចូលនិវត្តន៍ ហើយក៏ធ្លាប់ចំណាយ៦លានដុល្លារអាមេរិក ទិញភូមិគ្រឹះមួយនៅប្រទេសថៃ ពេលកូនស្រីរបស់ខ្លួនរៀននៅទីនោះ ។
តាមការលើកទ្បើងរបស់កាសែត The Sunday Times គេដឹងថា កាលពីខែមិថុនា២០០៨ ជំទាវទីមួយ Grace Mugabe ចំណាយប្រាក់ ស្ងាត់ៗទិញភូមិគ្រឹះស្កឹមស្កៃមួយនៅទីក្រុងហុងកុង តម្លៃ៥,៦លានដុល្លារអាមេរិក ហើយគេឃើញនាង Bona Mugabe កូនស្រីជំទាវទីមួយរូបនេះជាអ្នកនៅភូមិគ្រឹះនោះ ។ កាលពីថ្ងៃទី២៧ កុម្ភៈ ២០១៥ ជំទាវទីមួយ Grace Mugabe ចំណាយប្រាក់១លានដុល្លារអាមេរិករៀបចំបុណ្យខួបកំណើតទី៩១ របស់ប្រធានាធិបតី Robert Mugabe នៅតំបន់ទេសចរណ៍ Victoria Falls ក្បែរជ្រោះ Victoria ។ ក្នុងពិធីនោះប្រធានាធិបតី Robert Mugabe បញ្ជាឱ្យគេពន្លះសាច់ដំរីមួយក្បាលធ្វើម្ហូបជប់លៀងភ្ញៀវ ។
ក្រៅពីរឿងអាស្រូវចាយវាយខ្ជះខ្ជាយ ជំទាវទីមួយ Grace Mugabe នៅមានរឿងអាស្រូវដ៏ធំមួយទៀត គឺលួចមានសហាយស្មន្ធនៅខាងក្រៅជាមួយប្រុសដល់ទៅ៣នាក់ ។ តាមការលើកទ្បើងរបស់កាសែត Daily Mail គឺប្រុសសហាយទីមួយឈ្មោះ Gideon Gono ជាទេសាភិបាលធនាគារកណ្តាលស៊ីមបាវ៉េ ។ គេទាំង២នាក់ណាត់ជួបគ្នា១ខែ៣ដង គឺជួបគ្នានៅកសិដ្ឋានចិញ្ចឹមគោយកទឹកដោះរបស់ជំទាវទីមួយផ្ទាល់ ឬជួនកាលណាត់ជួបគ្នានៅសណ្ឋាគារលំដាប់ខ្ពស់ក្នុងប្រទេសអាហ្វ្រិកខាងត្បូង ។ រហូតដល់ខែកក្កដាឆ្នាំ២០១០ ទើបប្រធានាធិបតី Robert Mugabe ដឹងរឿងនេះ ពេលប្អូនស្រីគាត់មានជំងឺធ្ងន់ចូលដេកពេទ្យ ។ ប្រការដែលគួរនិយាយគឺអង្គរក្សឈ្មោះ Cain chademanw អ្នកមានស្វាមីភក្តិបំផុតចំពោះប្រធានាធិបតី Robert Mugabe ដែលដឹងរឿងនេះ បែរជាអត់ប្រាប់ប្រធានាធិបតី Robert Mugabe សោះ ។
សហាយទី២របស់ជំទាវទីមួយ Grace Mugabe គឺឈ្មោះ Peter Pamire អ្នកដែលក្រោយមកស្លាប់ក្នុងគ្រោះថ្នាក់ចរាចរណ៍ដ៏អាថ៌កំបាំងមួយ ។ រីឯសហាយទី៣ឈ្មោះ James Makamba ។ ជននេះលួចលាក់ទ្បើងគ្រែជាមួយភរិយាប្រធានាធិបតីបានពីរបីដង ក៏រត់គេចខ្លួនទៅបរទេសបាត់ស្រមោល ។
ទោះបីភរិយាមានរឿងអាស្រូវ ផ្ទួនៗដូច្នេះក្តី បច្ចុប្បន្នលេចឮព័ត៌មានថា ប្រធានាធិបតី Robert Mugabe មានផែនការត្រាយផ្លូវឱ្យភរិយារូបនេះបានជាប់ឆ្នោតជាប្រធានាធិបតីស៊ីមបាវ៉េបន្តវេនពីខ្លួនទៀតផង ។ ហេតុដែលមានព័ត៌មានដូច្នេះ ព្រោះកាលពីឆ្នាំ២០១៤ ជំទាវទីមួយ Grace Mugabe បានទទួលតែងតាំងជាប្រធានសមាគមនារី ZANU-PF ដែលមុខងារនេះធ្វើឱ្យលោកជំទាវមានឈ្មោះជាស្វ័យប្រវត្តិក្នុងគណៈកម្មាធិការកណ្តាលគណបក្សកាន់អំណាច ZANU-PF ងាយស្រួលចេញឈរឈ្មោះក្នុងការបោះឆ្នោតប្រធានាធិបតីនាពេលខាងមុខ ៕
ចែករំលែកព័តមាននេះ