រាជធានីភ្នំពេញ ៖ គណៈគ្រប់គ្រងនិងបុគ្គលិកគ្រប់ជាន់ថ្នាក់នៃគ្រឹះស្ថានមីក្រូហិរញ្ញវត្ថុប្រាសាក់ បានស្ម័គ្រចិត្តបរិច្ចាគឈាមដល់មជ្ឈមណ្ឌលជាតិផ្តល់ឈាម ដើម្បីយកទៅជួយសង្គ្រោះជីវិតជនរងគ្រោះដែលត្រូវការឈាមបន្ទាន់ ។
រាជធានីភ្នំពេញ ៖ គណៈគ្រប់គ្រងនិងបុគ្គលិកគ្រប់ជាន់ថ្នាក់នៃគ្រឹះស្ថានមីក្រូហិរញ្ញវត្ថុប្រាសាក់ បានស្ម័គ្រចិត្តបរិច្ចាគឈាមដល់មជ្ឈមណ្ឌលជាតិផ្តល់ឈាម ដើម្បីយកទៅជួយសង្គ្រោះជីវិតជនរងគ្រោះដែលត្រូវការឈាមបន្ទាន់ ។ ការបរិច្ចាគឈាមនេះ បានធ្វើឡើងនៅអគារការិយាល័យកណ្តាលនៃគ្រឹះស្ថានមីក្រូហិរញ្ញវត្ថុប្រាសាក់កាលពីថ្ងៃទី១៩ ខែធ្នូ ឆ្នាំ២០១៥ ។
លោក អ៊ុំ សមអឿន អនុប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុប្រាសាក់ បានមានប្រសាសន៍ថា យើងមានសេចក្តីរីករាយនិងមោទនភាពជាពន់ពេក ដែលបានឃើញបុគ្គលិកប្រាសាក់របស់យើងមានចិត្តសប្បុរសចូលរួមក្នុងការបរិច្ចាគនេះ ។ ការណ៍នេះបង្ហាញឱ្យឃើញកាន់តែច្បាស់ថា បុគ្គលិកប្រាសាក់មិនត្រឹមតែមានការប្តេជ្ញាចិត្តខ្ពស់ក្នុងការខិតខំប្រឹងប្រែងបំពេញការងារប្រចាំថ្ងៃនោះទេ ថែមទាំងជាពលរដ្ឋដែលមានទំនួលខុសត្រូវ និងចេះចែករំលែកក្តីស្រឡាញ់ទៅកាន់សង្គមដែលពួកគេកំពុងតែរស់នៅផងដែរ ។ យើងក៏សូមលើកទឹកចិត្តដល់សាធារណជនទាំងអស់ជាពិសេសយុវជន សូមចូលរួមបរិច្ចាគឈាមនិងផ្តល់នូវក្តីស្រឡាញ់ទៅកាន់ជនរួមជាតិរបស់យើងទាំងអស់គ្នា ដើម្បីបណ្តុះវប្បធម៌នៃការជួយយកអាសាដល់កូនចៅយើងជំនាន់ក្រោយៗផងដែរ ។
លោក ខៃ សុខហេង តំណាងមជ្ឈមណ្ឌលជាតិផ្តល់ឈាមបានថ្លែងថា ការផ្តល់ឈាមគឺជាសកម្មភាពមនុស្សធម៌មួយដែលបានចូលរួមជួយសង្គ្រោះជីវិតមនុស្ស ដែលជាធម្មតាមជ្ឈមណ្ឌលជាតិផ្តល់ឈាមប្រើប្រាស់ឈាមប្រមាណជា១៥០ទៅ១៧០ប្លោកក្នុងមួយថ្ងៃសម្រាប់ការសង្គ្រោះនានា ជាពិសេសជនរងគ្រោះដោយគ្រោះថ្នាក់ចរាចរណ៍ និងស្ត្រីសម្រាលកូនមិនប្រក្រតី ។ លោកបានសម្តែងនូវសេចក្តីត្រេកអរ និងអរគុណយ៉ាងជ្រាលជ្រៅដល់គណៈគ្រប់គ្រង និងបុគ្គលិកប្រាសាក់ ដែលមិនត្រឹមតែចូលរួមក្នុងការអភិវឌ្ឍសេដ្ឋកិច្ចជាតិតាមរយៈការផ្តល់សេវាហិរញ្ញវត្ថុច្រើនបែបច្រើនយ៉ាងជូនប្រជាជននោះទេ ប៉ុន្តែថែមទាំងបានចូលរួមក្នុងកិច្ចការសង្គមតាមរយៈការបរិច្ចាគឈាមនេះផងដែរ ។ លោកបញ្ជាក់ថា ក្នុងចំណោមប្រជាជន១ពាន់នាក់ មានតែ៤នាក់ប៉ុណ្ណោះដែលបានស្ម័គ្រចិត្តបរិច្ចាគឈាម ស្របពេលដែលអង្គការសុខភាពពិភពលោកលើកឡើងថា ប្រទេសកំពុងអភិវឌ្ឍន៍គួរមានអត្រាអំណោយឈាម១ភាគរយ ដើម្បីឆ្លើយតបទៅនឹងតម្រូវការឈាមឱ្យបានគ្រប់គ្រាន់ ។
គួរបញ្ជាក់ថា ប្រាសាក់គឺជាគ្រឹះស្ថានមីក្រូហិរញ្ញវត្ថុដែលមានការយកចិត្តទុកដាក់ខ្ពស់ក្នុងការចូលរួមដល់វឌ្ឍនភាពសង្គម និងបានកសាងនូវស្នាដៃជាច្រើនក្នុងកិច្ចការងារសង្គមរបស់ខ្លួនដូចជា ការសាងសង់បណ្ណាល័យការបរិច្ចាគទៅកាន់កម្មវិធីជំនួយមនុស្សធម៌របស់កាកបាទក្រហមកម្ពុជា ឧបត្ថម្ភដល់កម្មវិធីវះកាត់ព្យាបាលមាត់ឆែប ឧបត្ថម្ភដល់កម្មវិធីចម្រៀង សម្រាប់កុមារ ឧបត្ថម្ភដល់កម្មវិធីថ្ងៃរីករាយនៃកុមារ ជំនួយមនុស្សធម៌ដល់អតិថិជនរងផលប៉ះពាល់ពីអគ្គិភ័យ ទឹកជំនន់ និងសកម្មភាពផ្សេងៗជាច្រើនទៀត ៕
ចែករំលែកព័តមាននេះ