រាជធានីភ្នំពេញ ៖ ធៀបនឹងប្រមាណ៣ឆ្នាំមុន គេចាប់អារម្មណ៍ថាមហាជនកាន់តែច្រើនស្គាល់ច្បាស់ពីក្បាច់គុន និងកីឡាយុទ្ធក្រមខមដែលជាក្បាច់ប្រយុទ្ធដ៏ចំណាស់របស់បុព្វបុរសខ្មែរ។ មនុស្សភាគច្រើនបានទាំងស្គាល់ថាក្បាច់គុន និងកីឡាប្រយុទ្ធប្រភេទនេះ មិនមែនជាល្បុក្កតោដែលផ្ទុយពីក្នុងគ្រាចម្រូងចម្រាសនាមួយរយៈមុននោះផង ។ ទោះបីយ៉ាងណាគេនៅតែមិនទាន់ឃើញកីឡានេះមានសង្វៀនប្រកួតយកជើងខ្លាំងដូចគ្នានឹងកីឡាប្រដាល់ក្បាច់គុនបុរាណខ្មែរនៅឡើយទេ។
លោក យូ ជឿននរៈសិង្ហ ប្រធានសមាគមយុទ្ធក្រមខម បានអះអាងថា ក្រោយការពង្រីកខ្លួនចុះបង្ហាត់តាមវិទ្យាល័យ និងសាកលវិទ្យាល័យ កីឡាប្រភេទនេះត្រូវបានទទួលស្គាល់យ៉ាងខ្លាំងថា ជាក្បាច់គុនរបស់ខ្មែរ និងមានលក្ខណៈពិសេសដាច់ឆ្ងាយពីក្បាច់គុនល្បុក្កតោ ដែលក្នុងឯកសារគ្រាន់តែជាឈ្មោះអាវុធសម្រាប់ប្រើក្នុងពេលប្រយុទ្ធ តែក្រោយមកក៏ត្រូវគេយកមកបំបែកជាក្បាច់គុនហើយហ្វឹកហាត់តគ្នានោះ។ លោកនៅតែអះអាងថា ចាស់បុរាណដែលចេះល្បុក្កតោ គឺសំដៅលើអ្នកចេះប្រើអាវុធល្បុក្កតោ ដោយពាក្យថាល្បុក្កតោនេះ មិនមែនសំដៅលើក្បាច់គុនដូចគ្នានឹងយុទ្ធក្រមខមនោះឡើយ ។ យ៉ាងណាក៏ដោយលោកបានសម្ដែងអារម្មណ៍សប្បាយរីករាយ បន្ទាប់ពីកីឡាប្រភេទនេះត្រូវបានទទួលស្គាល់ទូលំទូលាយជាងមុន ដោយអាចនិយាយបានថាគ្រាន់តែប្រាប់គេពីឈ្មោះ ក៏មានអ្នកស្គាល់។ លោកនិយាយថា៖ «ពីមុនគេស្គាល់តែល្បុក្កតោទេ ប៉ុន្តែឥឡូវគេស្គាល់យុទ្ធក្រមខមច្បាស់ដូចថ្ងៃអញ្ចឹង ។
ជាក់ស្ដែងតាំងពីក្រសួងអប់រំអនុញ្ញាតឲ្យយើងចុះបង្ហាត់ក្បាច់គុននៅតាមសាលាទូទាំងរាជធានីភ្នំពេញ គឺថាកន្លែងបង្ហាត់របស់យើងមួយណាក៏មានសិស្សរៀនច្រើនដែរ ខ្ញុំអាចនិយាយបានថាកីឡាយើងឥឡូវនេះ លោតខ្លាំងក្នុងស្រទាប់យុវវ័យ!» ។ លោកថា បើកីឡាយុទ្ធក្រមខមអាចមានសង្វៀនឡើងប្រកួតយកចាញ់ឈ្នះ ដើម្បីស្វែងរកជើងខ្លាំងដូចគ្នានឹងការប្រដាល់នាពេលបច្ចុប្បន្ននោះអ្នកចូលហ្វឹកហាត់គឺមិនខ្វះ និងអាចកើនឡើងរកកន្លែងហាត់គ្មានផងក៏មិនដឹង ដោយសារតែការចាប់អារម្មណ៍គឺមានកាន់តែច្រើន ។ លោកនិយាយ៖ «ឥឡូវហ្នឹងកន្លែងហ្វឹកហាត់នៅសាកលវិទ្យាល័យភូមិន្ទភ្នំពេញ គឺសឹងអត់មានកន្លែងទទួលសិស្សទៀតទៅហើយ ចំណែកនៅតាមវិទ្យាល័យគឺតាំងពីយើងបើកមក មានសិស្សមិនក្រោមពី៥០ទៅ៦០នាក់ទេមកហាត់!» ។
ជាមួយនឹងការអះអាងនេះគេកត់សម្គាល់ថា កីឡាយុទ្ធក្រមខមមានភាពលេចធ្លោយ៉ាងខ្លាំង បើធៀបនឹងកីឡាល្បុក្កតោ បើទោះជាកីឡាប្រភេទនេះ នៅមិនទាន់មានឱកាសបង្ហាញខ្លួននៅក្នុងកម្មវិធីធំៗដូចគ្នានឹងល្បុក្កតោនៅឡើយក្ដី។ ជាមួយនឹងភាពលេចធ្លោតាមរយៈបរិមាណសិស្សចូលហ្វឹកហាត់នេះ យុទ្ធក្រមខមក៏ត្រូវគេឃើញទទួលបានការចាប់អារម្មណ៍ក្នុងការសម្ដែងភាពយន្តជំនួសឱ្យតួនាទីរបស់កីឡាករផ្នែកល្បុក្កតោនៅក្នុងវិស័យភាពយន្តផងដែរ ។
ជាក់ស្ដែងគ្មានអ្នកណាមិនដឹងនោះទេថា ក្រុមគ្រូបង្វឹកនៅក្នុងសហព័ន្ធនេះ បានសហការជាមួយផលិតកម្មចក្រវាទ្បពេជ្រភាពយន្តហើយផលិតរឿងមួយជាមួយគ្នាក្រោមចំណងជើងថា «វិស្សមកាលមរណៈ» ។ នេះជារឿងដែលនិយាយពីឈុតឆាកវាយតប់ និង ហក់លោតស្ទើរទាំងស្រុងដែលកំពុងដំណើរការចុះថត និងគ្រោងដាក់បញ្ចាំងក្នុងពេលដ៏ខ្លីនោះផង។ យោងតាមការអះអាងថា ខ្សែរឿង «វិស្សមកាលមរណៈ» នឹងក្លាយជាភាពយន្តខ្មែរដែលបង្ហាញពីភាពរស់រវើករបស់យុទ្ធក្រមខមតែមួយគត់ ដែលចូលវាយលុកទីផ្សារភាពយន្តនៅដើមឆ្នាំ២០១៦ ដោយសមាសភាពតារាសម្ដែងគឺចម្រុះដោយតារាភាពយន្តល្បីៗនៅក្នុងវិស័យភាពយន្ត ហើយប្រមូលផ្ដុំដោយគ្រូបង្វឹកខ្លាំងៗរបស់យុទ្ធក្រមខមទាំងមូល។
នៅក្នុងរឿងនេះ មានការសម្ដែងដោយតារាល្បីៗដូចជា កញ្ញា នី មុន្នីនាថ លោកសាយ សៀរ៉ា ឆៃលី ដាឡែន តារាកំប្លែងនាងខ្ញុង និងលោកថៃ ប៊ុននាងជាដើម ដោយឈុតឆាកសំខាន់គឺគម្រោងរំលេចឲ្យឃើញនូវភាពខ្លាំងក្លារបស់កីឡាករយុទ្ធក្រមខមទាំងអស់ដើម្បីឱ្យទស្សនិកជនបានស្គាល់ និងដឹងពីភាពអស្ចារ្យរបស់ក្បាច់គុននេះជាសាធារណៈ ។
លោកយូ ជឿននរៈសិង្ហ បានអះអាងថា ការបញ្ជ្រាបកីឡាយុទ្ធក្រមខមនៅក្នុងភាពយន្តនឹងកាន់តែជួយឲ្យកីឡាប្រភេទនេះទទួលស្គាល់កាន់តែទូលាយទាំងក្នុង និងក្រៅប្រទេស នៅក្នុងកាលៈទេសៈដែលសហព័ន្ធមិនទាន់មានសិទ្ធិ និងខ្វះលទ្ធភាពរៀបចំការប្រកួតប្រជែងឱ្យបានដូចគ្នានឹងកីឡាផ្សេងៗដែលមានវ័យចំណាស់ជាងខ្លួននៅក្នុងប្រទេសកម្ពុជាដែលបានរៀបចំជាសហព័ន្ធតាំងពីច្រើនឆ្នាំមកហើយ។ យ៉ាងណាក៏ដោយលោកអះអាងថា អ្វីដែលបានលេចធ្លោនាពេលចុងក្រោយនោះ មិនមែនជាទីបញ្ចប់ដែលខាងសហព័ន្ធបញ្ឈប់ការគិតគូរនោះទេ ដ្បិតក្នុងពេលដ៏ខ្លីលោកក៏មានគម្រោងផ្សព្វផ្សាយកីឡាមួយនេះ តាមរយៈសកម្មភាពផ្សេងៗ ឲ្យកាន់តែមានប្រជាប្រិយភាពនៅក្រៅសង្វៀនប្រកួតបន្ថែមទៀតនោះផងដែរ។
អ្នកស្រីថុង ស៊ីវទៀង ចាងហ្វាងផលិតកម្មចក្រវាទ្បពេជ្រភាពយន្តបានអះអាងថា ក្រោយការបញ្ចប់រឿង «វិស្សមកាលមរណៈ» កីឡាយុទ្ធក្រមខម ពិតជាមានទីផ្សារកានតែខ្លាំងនៅក្នុងវិស័យភាពយន្ត ដោយសារតែក្នុងមួយរឿងនេះ ឈុតឆាកវាយតប់មានសភាពរស់រវើក ហើយពិតជាធ្វើឱ្យមហាជនចាប់អារម្មណ៍ និងរួមគ្នាគាំទ្រកីឡានេះឱ្យមានសន្ទុះខ្លាំងក្លាមិនខាន ៕
ចែករំលែកព័តមាននេះ