រាជធានីភ្នំពេញ ៖ ម៉ម ភារម្យ មកពីក្លិបការិយាល័យទី៥ កងទ័ពជើងគោក ត្រូវបានគណៈកម្មការប្រដាល់ផ្គូផ្គងឱ្យជួបប្រកួតជាមួយកីឡាករថៃឈ្មោះ វីហ្គោ ស.ដានឆ័យ ចំណែកង៉ែត្រ រដ្ឋា មកពីក្លិបតាព្រហ្មមានជ័យបង្ក្រាបគ្រឿងញៀន ជួបប្រកួតជាមួយកីឡាករថៃឈ្មោះ ភិតណយ ពៀកខាឃែរ៍ នៅលើសង្វៀនស៊ីធីអិនថ្ងៃសៅរ៍ ទី២៦ ធ្នូ ។
នេះគឺជាលើកទី១ហើយដែលម៉ន ភារម្យ ត្រូវបានផ្ដល់ឱកាសឱ្យជួបប្រកួតជាមួយកីឡាករថៃ ដែលមិនធ្លាប់មកប្រកួតនៅស្រុកខ្មែរម្ដងណាឡើយ ។ កីឡាករថៃរូបនេះ ធ្លាប់ប្រកួតបាន៦៥ដង ឈ្នះ៥៣ដង និងចាញ់១២ដង ចំណែក ម៉ន ភារម្យ ធ្លាប់ប្រកួតបាន៧០ដង ឈ្នះ៦០ដង ចាញ់១០ដង និងធ្លាប់ផ្ដួលគូប្រកួតឱ្យសន្លប់បាន១៥ដង ។ ទោះបីយ៉ាងណា ម៉ន ភារម្យ មិនត្រូវមើលស្រាលលើការប្រកួតលើកនេះទេ ដោយសារកីឡាករថៃរូបនេះមិនធ្លាប់មកប្រកួតនៅស្រុកខ្មែរ ទើបអត់មានអ្នកណាដឹងថា គេមានល្បិចប្រកួតនៅលើសង្វៀនខ្លាំងប៉ុនណា ។
ចំណែក ម៉ន ភារម្យ មានចរិតឆេវឆាវបន្តិច មិនតែប៉ុណ្ណោះគេមិនសូវពូកែក្នុងការប្រើស្នៀតកែង និងជង្គង់ឡើយ ។ ស្នៀតកណ្ដាប់ដៃ និងស្នៀតជើងរបស់គេអាចវាយ និងទាត់ចេញបានត្រង់ល្អនិងមានទម្ងន់ធ្ងន់ទៀតផង ។
ចំណែក ង៉ែត្រ រដ្ឋា ជួបប្រកួតជាមួយកីឡាករថៃលើកនេះ ក៏ជាលើកទី១ សម្រាប់រូបគេដែរ ។ ទោះបីកីឡាករថៃជាគូប្រកួតធ្លាប់មានប្រវត្តិឡើងសង្វៀនយ៉ាងជោកជាំ ជាពិសេសសង្វៀនស្រុកខ្មែរ ក៏ង៉ែត្រ រដ្ឋា មិនញញើតសោះឡើយ ដោយសារគេមានសមត្ថភាពគ្រប់គ្រាន់កំដរដៃគូមិនឱ្យទស្សនិកជនខកចិត្តទេ ។ ង៉ែត្រ រដ្ឋា ធ្លាប់ប្រកួតបាន៧២ដង ឈ្នះ៦០ដង ចាញ់១២ដង និងធ្លាប់ផ្ដួលគូប្រកួតឱ្យសន្លប់បាន១៨ដង រីឯកីឡាករថៃភិតណាយ ពៀកខាឃែរ៍ ធ្លាប់ប្រកួតបាន៧០ដង ឈ្នះ៥៧ដង ចាញ់១១ដង និងស្មើ២ដង ។ ចាំមើលគូនេះនរណាជាអ្នកសម្រេចគោលដៅ ?
ដោយឡែកគូប្រកួតមិត្តភាពធម្មតាវិញ មានកីឡាករនេន វណ្ណា មកពីក្លិបខ្លារខិនមានរិទ្ធជួបប្រកួតជាមួយកីឡាករវ៉ាន់ ចាន់វ៉េត មកពីក្លិបគីសែមានរិទ្ធ ។ កីឡាករលីន ចំរើន មកពីក្លិបបុរីរាជសីហ៍ ជួបប្រកួតជាមួយកីឡាករខួច វណ្ណា មកពីក្លិបអេភូថងកីឡា និងកីឡាករគង់ វិចិត្រ មកពីក្លិបកងពលតូចលេខ៧០ ជួបប្រកួតជាមួយកីឡាករ ខួច វណ្ណា មកពីក្លិបអេភូថងកីឡា ៕
ចែករំលែកព័តមាននេះ