ខេត្តស្វាយរៀង៖ នៅថ្ងៃទី២៣ ខែកក្កដា ឆ្នាំ២០២១ រដ្ឋបាលខេត្តស្វាយរៀង បានប្រកាសនូវអត្តសញ្ញាណអ្នកវិជ្ជមានកូវីដ១៩ ថ្មី ចំនួន ១០៤នាក់ ស្រី ៦៨នាក់។ ក្នុងនោះ មានកម្មករ កម្មការិនីរោងចក្រ ចំនួន ១១នាក់ ករណីឆ្លងលើអ្នកប៉ះពាល់ផ្ទាល់ជាមួយអ្នកកូវីដ១៩ ចំនួន ៨នាក់ លើអ្នកមានការសង្ស័យ ១១នាក់ និងឆ្លងលើអាជីវករផ្សារកំពង់ត្រាច ៧១នាក់។
ចំពោះអ្នកវិជ្ជមានកូវីដ១៩ មានចំនួន ១០៤នាក់ បានបញ្ជូនទៅសម្រាកព្យាបាល នៅមន្ទីរពេទ្យស្រុកស្វាយជ្រំ ចំនួន ៦នាក់ បញ្ជូនទៅមន្ទីរពេទ្យបង្អែកសាមគ្គីរំដួល ១៥នាក់ និងបញ្ជូនទៅមជ្ឈមណ្ឌលព្យាបាលកូវីដ១៩ ក្រុងបាវិត ចំនួន ៨២នាក់។
រដ្ឋបាលខេត្តស្វាយរៀង ក៏បានប្រកាសពីករណីស្លាប់ថ្មី ២នាក់។ គឺស្ត្រី ឈ្មោះ ញឹម សុផល អាយុ ៨៤ឆ្នាំ ជាប្រជាពលរដ្ឋ នៅភូមិតាកឹង ឃុំព្រៃធំ ស្រុកកំពង់រោទិ៍។ លោកយាយ ជាចាស់ជរា មានជំងឺរ៉ាំរ៉ៃ ប្រចាំកាយ និងជាប់ពាក់ព័ន្ធអ្នកវិជ្ជមានកូវីដ១៩ ត្រូវធ្វើចត្តាឡីស័កនៅផ្ទះ រយៈពេល ៣ថ្ងៃ មានអាការៈក្តៅខ្លាំង ហត់ ពិបាកដកដង្ហើម។ ក្រុមការងារ បានយកសំណាក ធ្វើតេស្តរហ័ស ដល់ផ្ទះ ហើយលទ្ធផលវិជ្ជមានកូវីដ១៩ នៅថ្ងៃទី១៦ ខែកក្កដា ឆ្នាំ២០២១។ ដោយសារមានជំងឺប្រចាំកាយ លើសសម្ពាធឈាម ទឹកនោមផ្អែម និងរលាកផ្លូវដង្ហើមធ្ងន់ធ្ងរ ក្រុមគ្រួសារ បញ្ជូនទៅព្យាបាលនៅមន្ទីរពេទ្យស្រុកស្វាយជ្រំ ដោយសង្គ្រោះបន្ទាន់ជាច្រើនថ្ងៃ ហើយបានស្លាប់បាត់បង់ជីវិត នៅថ្ងៃទី២២ ខែកក្កដា ឆ្នាំ២០២១ វេលាម៉ោង ១១ព្រឹក ដោយជំងឺកូវីដ១៩។
ចំណែកអ្នកស្លាប់ម្នាក់ទៀត ជាបុរស ឈ្មោះ ម៉ិញ យ៉ាក អាយុ ៦៩ឆ្នាំ ជាប្រជាពលរដ្ឋ នៅភូមិបឹងរ៉ៃ ឃុំក្រោលគោ ស្រុកស្វាយជ្រំ។ អ្នកជំងឺ ក៏ជាចាស់ជរា មានជំងឺប្រចាំកាយ។ ដោយមានអាការៈ ក្តៅ ហត់ ពិបាកដកដង្ហើម នោមទាស់ ឈឺ ក៏ត្រូវក្រុមគ្រួសារ បញ្ជូនទៅព្យាបាលនៅមន្ទីរពេទ្យខេត្ត។ ក្រុមការងារយកសំណាកធ្វើតេស្តរហ័ស ក៏រកឃើញលទ្ធផលវិជ្ជមានកូវីដ១៩ នាថ្ងៃទី២២ ខែកក្កដា ឆ្នាំ២០២១ ក៏បានស្លាប់ បាត់បង់ជីវិត នៅថ្ងៃទី២២ ខែកក្កដា ឆ្នាំ២០២១ វេលាម៉ាង ៩ព្រឹក ដោយជំងឺកូវីដ១៩។
គិតត្រឹមថ្ងៃទី២២ ខែកក្កដា ឆ្នាំ២០២១ ខេត្តស្វាយរៀង មានអ្នកវិជ្ជមានកូវីដ១៩ សរុប ៤,៣២២នាក់ ស្រី ២,៤០៦នាក់ ជាសះស្បើយសរុប ៣,៥០៥នាក់ ស្រី ១,៩៦៩នាក់ និងកំពុងសម្រាកព្យាបាល ចំនួន ៧៤៥នាក់ ស្រី ៣៩០នាក់។ ករណីស្លាប់កើនឡើង ៦៩នាក់ ស្រី ៤៦នាក់៕
ចែករំលែកព័តមាននេះ