ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញទទួលដោយផ្ទាល់នូវការមកដល់ វ៉ាក់សាំងប្រឆាំងកូវីដ១៩ (AstraZeneca) ចំនួន ១លានដូស…
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញទទួលដោយផ្ទាល់នូវការមកដល់ វ៉ាក់សាំងប្រឆាំងកូវីដ១៩ (AstraZeneca) ចំនួន ១លានដូស ដែលជាជំនួយរបស់រដ្ឋាភិបាល និងប្រជាជនជប៉ុន នៅអាកាសយានដ្ឋានអន្តរជាតិភ្នំពេញ នាម៉ោងជាង ១០យប់ថ្ងៃទី២៣ ខែកក្កដា ឆ្នាំ២០២១ នេះ។ ក្នុងពិធីទទួលវ៉ាក់សាំងនេះ សម្តេចតេជោ ហ៊ុន សែន បានប្រកាសអំពាវនាវដល់មាតាបិតាទាំងអស់ នាំកូនអាយុចាប់ពី ១២ឆ្នាំ ដល់ ១៧ឆ្នាំ ទៅចាក់វ៉ាក់សាំងឲ្យបានគ្រប់ៗគ្នា ចាប់ពីថ្ងៃអាទិត្យ ទី១ ខែសីហា ឆ្នាំ២០២១ តទៅ។
សម្តេចតេជោ ហ៊ុន សែន លើកឡើងថា យុទ្ធនាការនៃការចាក់វ៉ាក់សាំងដល់កុមារ និងយុវវ័យ ចាប់ពីអាយុ ១២ឆ្នាំ ដល់ ១៧ឆ្នាំ នឹងចាប់ផ្តើមពីព្រឹកថ្ងៃអាទិត្យ ទី១ ខែសីហា ឆ្នាំ២០២១ សម្តេចនឹងអញ្ជើញទៅធ្វើជាអធិបតីនៃការចាក់វ៉ាក់សាំងនេះ នៅមន្ទីរពេទ្យកាល់ម៉ែត បន្ទាប់ទៅ សម្តេចនឹងធ្វើសន្និសីទកាសែត នៅទីនោះ។ សម្តេចក៏នឹងនាំចៅៗរបស់សម្តេច ដែលមានអាយុលើសពី ១២ឆ្នាំ ទៅកាន់ទីនោះ អាចនឹងមានរួមជាមួយសម្តេចឯកឧត្តមលោកជំទាវ ដែលមានកូនចៅ អាយុចាប់ពី ១២ឆ្នាំឡើងទៅ ទៅចាក់នៅទីនោះ ដោយចាប់ផ្តើមនៅថ្ងៃទី១សីហា ចេញពីទីក្រុងភ្នំពេញ ហើយនៅពេលយើងមានវ៉ាក់សាំងគ្រប់គ្រាន់ នឹងចាក់ដំណាលគ្នា ទាំងមនុស្សពេញវ័យ និងទាំងកុមារតែម្តង។
សម្តេចបន្តថា បើយើងចាក់លើកូនក្មេងអាយុចាប់ពីអាយុ ១២ឆ្នាំ ដល់ ១៧ឆ្នាំ ដែលយើងប៉ាន់ស្មានថា មាន ២លាននាក់ នោះយើងនឹងចាក់បាន គិតទាំងមនុស្សពេញវ័យ ១០លាននាក់នោះ យើងនឹងចាក់សរុបដល់ជាង ៨០% នៃប្រជាជនសរុប ១៦លាននាក់។ សម្តេចតេជោ ក៏បានប្រកាស កុំឲ្យអាណាព្យាបាលឪពុកម្តាយ ព្រួយបារម្ភពីសុវត្ថិភាពកូនចៅ ដែលត្រូវចាកវ៉ាក់សាំងនោះទេ ព្រោះសម្តេចថា ចៅសម្តេចម្នាក់ អាយុ ១៧ឆ្នាំ ក៏ទើបតែចាក់វ៉ាក់សាំងកូវីដរួចដែរ ព្រោះគេត្រូវចេញទៅរៀននៅក្រៅប្រទេស។ ដូច្នេះមិនមានហានិភ័យណាមួយ កើតឡើង សម្រាប់ការចាក់វ៉ាក់សាំងនោះទេ។
សម្តេចតេជោ ហ៊ុន សែន លើកឡើងថា យោងទៅលើស្ថិតិអ្នករស់នៅបច្ចុប្បន្ន នៅរាជធានីភ្នំពេញ កុមារ និងយុវវ័យ មានតែត្រឹមជាង ១៩ម៉ឺននាក់ប៉ុណ្ណោះ តែរាប់ទាំងអ្នកមកធ្វើការ នៅទីក្រុងភ្នំពេញ មានទាំងកូនមកជាមួយផង នាំឲ្យតួលេខ កើនឡើងរហូតដល់ ២៨ម៉ឺននាក់ ដែលយើងត្រូវតែចាក់ឲ្យទាំងអស់ដែរ។
សម្តេចតេជោ ហ៊ុន សែន បញ្ជាក់ថា «ទោះដោយតម្លៃណាក៏ដោយ រាជរដ្ឋាភិបាលកម្ពុជា ត្រូវតែចាក់វ៉ាក់សាំង ជូនប្រជាជនកម្ពុជា ដែលដល់អាយុត្រូវចាក់ ហើយដែលពេទ្យ អនុញ្ញាតឲ្យចាក់។ យើងនៅសង្ឃឹមតែលើករណីវ៉ាក់សាំងនេះតែប៉ុណ្ណោះ»។
សម្តេចតេជោ ហ៊ុន សែន លើកឡើងថា ដោយសារតែការចាក់វ៉ាក់សាំង ទើបកម្ពុជា ពេលនេះ មានសញ្ញាឆ្លងថមថយចុះ ពិសេសនៅតំបន់រោងចក្រ ហើយបើករណីមានការឆ្លង ក៏ស្ថានភាពវាមិនទៅរកសភាពធ្ងន់ធ្ងរ ឬដល់ការស្លាប់នោះទេ វាអាចកាត់បន្ថយ។ ករណីចាក់វ៉ាក់សាំង ២ដូសហើយ នៅតែឆ្លង មិនមែនតែនៅកម្ពុជាទេ សូម្បីតែនៅសហរដ្ឋអាមេរិក នៅអង់គ្លេស និងនៅប្រទេសក្នុងសហភាពអឺរ៉ុប គឺមានករណីនេះដែរ។
ដូច្នេះសម្តេចតេជោ ហ៊ុន សែន ប្រកាសថា «ទោះបីជាបានទទួលវ៉ាក់សាំងហើយក្តី មិនទាន់ទទួលវ៉ាក់សាំងក្តី ការការពារ ៣កុំ និង៣ការពារ នៅតែត្រូវបន្ត។ នេះជាវិធី ដែលល្អបំផុត។ សង្ឃឹមថា ប្រជាពលរដ្ឋរបស់យើង បន្ទាប់ពីឪពុកម្តាយ ដែលចាក់ គ្មានបញ្ហា នឹងនាំកូន ដែលមានអាយុចាប់ពី ១២ឆ្នាំឡើង ទៅចាក់វ៉ាក់សាំង ព្រោះបើនៅក្នុងផ្ទះ ចាក់បានតែប្តីប្រពន្ធ ឯកូន ៣នាក់ មិនបានចាក់នោះ មិនមានភាពស៊ាំនៅក្នុងផ្ទះទេ។ ដូច្នេះគោលដៅរបស់ខ្ញុំ ចង់ចាក់ឲ្យបានទៅដល់ជាង ៨០%។ អីចឹង យើងគិតក្នុងចំនួននេះ បើចាក់ដល់ ១២លាននាក់ យើងមាន ៧៥%។ បើចាក់ដល់ ១៣លាននាក់ យើងនឹងមានដល់ ៨១,២៥%។ ដូច្នេះពេលនោះ យើងនឹងមានភាពស៊ាំនៅក្នុងសហគមន៍។ នៅសល់តែក្មេងតូចៗ ហើយដែលក្មេងតូចៗនោះ ដែលសុទ្ធតែជាអ្នកដែលទទួលបានវ៉ាក់សាំង បង្ការការពារជំងឺ ៦មុខរួចស្រេចទៅហើយ»។
សម្តេចតេជោ ហ៊ុន សែន បន្ថែមថា «ទោះបីតម្លៃណាក៏ដោយ វ៉ាក់សាំង ត្រូវតែរក ដើម្បីចាក់ជូនប្រជាជនកម្ពុជា ហើយដែលមានអ្នកខ្លះធ្វើអត្ថាធិប្បាយថា ប្រហែលជាមរតកធំបំផុតរបស់ហ៊ុនសែន គឺវ៉ាក់សាំង។ ក៏ប៉ុន្តែខ្ញុំសូមបញ្ជាក់ត្រលប់ទៅវិញថា មរតកហ៊ុនសែន មិនមែនមានត្រឹមវ៉ាក់សាំងនោះទេ! មរតកហ៊ុនសែន បានយកប្រជាជន ចេញពីការស្លាប់ នៃថ្ងៃ៧មករា ឆ្នាំ១៩៧៩។ មរតកហ៊ុនសែន ក៏បានយកប្រជាជនកម្ពុជា ចេញផុតពីសង្គ្រាម នាំមកកាន់នូវសន្តិភាព រហូតមកដល់សព្វថ្ងៃ។ មរតកហ៊ុនសែន មានច្រើនទៀត!»។
ក៏ប៉ុន្តែសម្តេចតេជោ ហ៊ុន សែន បានរម្លឹកជាថ្មីថា «ខ្ញុំមិនចង់បានមរតក ឬមិនមរតកទេ អ្វីដែលខ្ញុំចង់បាន គឺសុខមាលភាពប្រជាជន ជីវិតរបស់ប្រជាជន ត្រូវបានធានា ហើយជីវិតធំបំផុត មិនមែនសិទ្ធិបញ្ចេញមតិ ឬប្រជាធិបតេយ្យទេ គឺសិទ្ធិរស់រានមានជីវិត ដែលត្រូវតែទទួលបានមុនគេ។ ដូច្នេះចង់នរណា ចង់និយាយពីអី ទិតៀនច្បាប់កម្ពុជា ក៏ទិតៀនទៅចុះ តែច្បាប់របស់កម្ពុជា ធ្វើដើម្បីការពារជីវិតមនុស្ស។ អ្វីដែលខ្ញុំខិតខំធ្វើ គឺដើម្បីការពារជីវិតមនុស្ស កុំឲ្យស្លាប់»៕
ចែករំលែកព័តមាននេះ