រាជធានីភ្នំពេញ៖ ជនសង្ស័យ លួចម៉ូតូ មិនបានសម្រេច ត្រូវប្រជាពលរដ្ឋ ឃើញ នាំគ្នាដេញស្ទាក់ ឃាត់បានវាយបណ្ដាលឲ្យបែកក្បាលហូរឈាម ប្រគល់ទៅសមត្ថកិច្ច យកទៅសួរនាំ នៅប៉ុស្តិ៍រដ្ឋបាលចោមចៅទី២ បង្កអោយមានការភ្ញាក់ផ្អើល កាលពីវេលាម៉ោង ១រំលងអាធ្រាត្រ ឈានចូលថ្ងៃទី២៣ ខែកក្កដា ឆ្នាំ២០២១ នៅភូមិថ្មគោលបី សង្កាត់ចោមចៅទី២ ខណ្ឌពោធិ៍សែនជ័យ។
ជនសង្ស័យឈ្មោះ វៀត ភេទប្រុស អាយុ ២៤ឆ្នាំ មុខរបរមិនពិតប្រាកដ ដើរហើរគ្រប់កន្លែងប៉ះអីយកនឹង អោយតែទុកប្រហែស។
ប្រភពប្រភពព័ត៌មានពីម្ចាស់ម៉ូតូ បាននិយាយថា នៅមុនពេលកើតហេតុ គាត់បានទុកម៉ូតូម៉ាកស្មាសវី ពណ៌ខ្មៅ នៅខាងក្រោមផ្ទះជួល ហើយឡើងទៅបន្ទប់ជួល ដែលនៅខាងលើមួយសន្ទុះ ក្រោយមក ក៏ចុះមកមើលម៉ូតូ ស្រាប់តែមិនឃើញពេលនោះ គាត់បានគេថា ចោរលួចម៉ូតូរបស់គាត់ យកទៅបាត់ហើយ បន្ទាប់មក ក៏នាំគ្នាផ្អើលអ្នកជិតខាង នាំគ្នា តាមរក ក៏ប្រទះឃើញជនសង្ស័យ កំពុងតែគាស់បណ្ដាច់ខ្សែភ្លើងឆ្នៃត ដើម្បីបញ្ឆេះ បំរុងជិះ ត្រូវបានប្រជាពលរដ្ឋ ចាប់បាន វាយម្នាក់មួយដៃៗ បណ្ដាលអោយបែកក្បាល ហូរឈាមជោក និងប្រគល់ទៅសមត្ថកិច្ចយកទៅសួរនាំនូវប៉ុស្តិ៍រដ្ឋាភិបាល ចោមចៅទី២ រួចម្ចាស់ម៉ូតូ បានទៅដាក់ពាក្យបណ្ដឹង អោយសមត្ថកិច្ចជួយដោះស្រាយ។
ក្រោយពីសមត្ថកិច្ចសួរនាំជនសង្ស័យរួចមក ជនសង្ស័យបានសារភាពថា ខ្លួនពិតជាបានលួចយកម៉ូតូរបស់ជនរងគ្រោះពិតប្រាកដមែន។ សមត្ថកិច្ច បានកសាងសំណុំរឿង បញ្ជូនជនសង្ស័យទៅផ្នែកជំនាញព្រហ្មទណ្ឌ ដើម្បីចាត់ការទៅតាមនីតិវិធីបន្ត។ ចំណែកម៉ូតូ សមត្ថកិច្ចប្រគល់ទៅជនរងគ្រោះវិញ៕
ចែករំលែកព័តមាននេះ