សារព័ត៌មានបរទេសកាលពីពេល ថ្មីៗកន្លងមកផ្សាយថា លោកគ្រីស្ទៀន អេកម៉ាន អ្នកជំនួញផ្នែកជួសជុលវត្ថុបុរាណជនជាតិអាល្លឺម៉ង់ បាននិយាយនៅសារមន្ទីរជាតិអេហ្ស៊ីប កាលពីថ្ងៃទី១៦ ធ្នូ ២០១៥
សារព័ត៌មានបរទេសកាលពីពេល ថ្មីៗកន្លងមកផ្សាយថា លោកគ្រីស្ទៀន អេកម៉ាន អ្នកជំនួញផ្នែកជួសជុលវត្ថុបុរាណជនជាតិអាល្លឺម៉ង់ បាននិយាយនៅសារមន្ទីរជាតិអេហ្ស៊ីប កាលពីថ្ងៃទី១៦ ធ្នូ ២០១៥ ស្តីពីការយកស្រោមមុខមាសរបស់សម្តេច «ហ្វារ៉ូទូតានកាមុន» ដាក់តាំងបង្ហាញជាផ្លូវការ ក្រោយពេលជួសជុលត្រង់បរិវេណពុកមាត់ កាលពីខែតុលា ។
ការជួសជុលនោះបានយកកាវទៅបិទបរិវេណដែលបាក់កាលពីខែសីហា ឆ្នាំ២០១៤ ហើយរងការរិះគន់ពីបណ្តាភាគីជាច្រើនថាជាយុទ្ធសាស្ត្រក្នុងការថែរក្សាមិនបានដិតដល់ ។ ស្រោមមុខរបស់សម្តេចហ្វារ៉ូទូតាន កាមុន ជាវត្ថុបុរាណដ៏ល្បីរបស់សារមន្ទីរអេហ្ស៊ីប ដែលរកឃើញរួមជាមួយម៉ាំមីរបស់ព្រះអង្គផ្ទាល់នៅភូមិមួយក្នុងទីក្រុងឡាក់ស៊័រ តាមបណ្តោយមាត់ទន្លេនីល ភាគកណ្តាលប្រទេសអេហ្ស៊ីបកាលពីឆ្នាំ១៩២២ ដោយលោកហូវាដ កាទ័រ អ្នកបុរាណវិទ្យាជនជាតិអង់គ្លេស ។ ស្ថានភាពរបស់ស្រោមមុខ ដែលប្រទះឃើញជាលើកដំបូងមានលក្ខណៈមិនពេញលេញល្អទេ ដូច្នោះហើយលោកកាទ័រ សម្រេចចិត្តទាញផ្នែកពុកមាត់ចេញដោយចំណាយពេលជួសជុលដល់ទៅ៣ឆ្នាំ ទើបជោគជ័យ កាលពីខែធ្នូ ឆ្នាំ១៩២៥ ។
ព្រះអង្គហ្វារ៉ូ ទូតានកាមុន បានសោយទិវង្គតនៅឆ្នាំ១៣២៤ មុនគ្រឹស្តសករាជ ខណៈពេលទ្រង់មានព្រះជន្ម១៩ព្រះវស្សា ។ ចំណែកស្រោមមុខរបស់ព្រះអង្គធ្វើពីមាសសុទ្ធ និងមានទម្ងន់១១គីឡូក្រាម ៕
ចែករំលែកព័តមាននេះ