មឈូសបុរាណជាច្រើនតម្កល់លើថ្មជញ្ជាំងភ្នំយ៉ាងខ្ពស់នៅពីលើទំនប់ «សាមត្រូក» ។ មឈូសអាថ៌កំបាំងទាំងនោះអ្នកខ្លះយល់ថា ជាវិធីរក្សាទុកសពរបស់ជនអំបូរភាគតិចតាំងពីអតីតកាល ឯខ្លះទៀតយល់ថារក្សាទុកមឈូសបែបនេះ ដើម្បីគេចពីសត្វសាហាវមិនឱ្យខាំស៊ីសព ។
«Three Gorges Business News» កាលពីថ្ងៃទី១៤ ធ្នូ ២០១៥ ផ្សាយថា មឈូសឈើទាំងនោះចំនួន១៣១ ដាក់នៅក្នុងឡតដែលចោះថ្ម ជាឡត៤ជ្រុងតម្រៀបគ្នាលើជញ្ជាំងភ្នំមានកម្ពស់១០០ម៉ែត្រ បែរមុខឆ្ពោះទៅទន្លេស្ថិតក្នុងខេត្តហ៊ូប៉ើយ ស្រុកជីគុយ ជាតំបន់ដាច់ស្រយាល ។
អ្នកបុរាណវិទ្យារៀបរាប់ថា មឈូសទាំងនោះតម្កល់ប្រមាណជា១២០០ឆ្នាំមុនក្នុងសម័យរាជវង្សថាំងអំឡុងពីឆ្នាំ៦១៨ដល់៩០៧ ហើយអាចជារបស់ពួក «ព័រ» ជាជនអំបូរភាគតិចក្នុងសម័យបុរាណ រស់នៅភាគខាងត្បូងប្រទេសចិន។ ទោះជាយា៉ងណាក្តី មិនទាន់មាននរណាម្នាក់អធិប្បាយបានថា មឈូសទាំងនោះត្រូវគេលើកទៅលើជញ្ជាំងថ្មភ្នំដ៏ចោតដោយរបៀបណាទេ ?
នៅក្នុងរបាយការណ៍មិនបានបញ្ជាក់ថា តើនរណាម្នាក់ជាអ្នកប្រទះឃើញមឈូសបុរាណទាំងនោះមុនគេ និងប្រទះឃើញនៅពេលណាទេ0x017d7 តាមទំនៀមទម្លាប់ការបញ្ចុះសពក្នុងលក្ខណៈចម្លែកបែបនេះ គឺមនុស្សក្នុងសម័យបុរាណធ្វើឡើងដើម្បីការពារមិនឱ្យសត្វព្រៃខាំស៊ីសព និងខ្លះទៀតថា ធ្វើឱ្យដួងវិញ្ញាណឆ្ពោះទៅកាន់សុគតិភព។
មានមឈូសខ្លះដាក់លើឈើ ដែលដោតភ្ជាប់ជញ្ជាំងភ្នំ ហើយលក្ខណៈបែបនេះធ្លាប់ប្រទះឃើញរួចមកហើយ នៅតាមបណ្តាខេត្តជាច្រើននាភាគខាងត្បូងប្រទេសចិន គឺខេត្តយុនណាន, ស៊ីឈួន, ជាំងស៊ី និងហ៊្វូជៀន ។
កន្លងមកទីភ្នាក់ងារព័ត៌មានរបស់ចិនផ្សាយថា គេធ្លាប់ប្រទះឃើញមន្ត្រីមួយចំនួនទៅសែនព្រេននៅទីតាំងបញ្ចុះសពនោះ ដោយរំលឹកពីពាក្យថា «មឈូសព្យួរ» ឬ «សួនគួន» ជាភាសាចិន មានន័យស្រដៀងនឹងពាក្យថា «សុំឡើងតំណែង» ។
ចំពោះទំនប់ «សាមត្រូក» គឺជាទំនប់វារីអគ្គិសនីដ៏ធំបំផុតនៅលើពិភពលោក ដោយសាងសង់កាត់ទន្លេយ៉ាំងសេ ចាប់ផ្តើមសាងសង់តាំងពីឆ្នាំ១៩៩៤ និងចំណាយប្រាក់ជាង២៤៨.០០០លានយាន់ ៕
ចែករំលែកព័តមាននេះ