រាជធានីភ្នំពេញ ៖ ក្នុងចំណោមការប្រកួតអន្តរជាតិ៥គូ កាលពីថ្ងៃអាទិត្យទី១៩ ធ្នូ ម្សិលម៉្ងៃ នៅលើសង្វៀនទូរទស្សន៍អាស៊ីអាគ្នេយ៍ មានតែកីឡាករកម្ពុជា២រូបប៉ុណ្ណោះ ដែលមានសំណាងឈ្នះកីឡាករថៃ ។
រាជធានីភ្នំពេញ ៖ ក្នុងចំណោមការប្រកួតអន្តរជាតិ៥គូ កាលពីថ្ងៃអាទិត្យទី១៩ ធ្នូ ម្សិលម៉្ងៃ នៅលើសង្វៀនទូរទស្សន៍អាស៊ីអាគ្នេយ៍ មានតែកីឡាករកម្ពុជា២រូបប៉ុណ្ណោះ ដែលមានសំណាងឈ្នះកីឡាករថៃ ។ ទោះបីយ៉ាងណាគេឃើញជ័យជម្នះរបស់ ផាន់ គ្រាន់ និងព្រំ សំណាង គឺបានកើតឡើងដោយទ្រមខ្លួនបំផុត ឯរឿង សោភ័ណ្ឌ បានបញ្ចេញសកម្មភាពឡាំប៉ាចង់ផ្អើលអ្នកទស្សនាបន្ទាប់ពីគណៈកម្មការប្រកាសឲ្យគេស្មើពិន្ទុជាមួយកីឡាករថៃ ខណៈរូបគេយល់ថាខ្លួនសមតែឈ្នះ ។
ការប្រកួតអន្តរជាតិដែលបានធ្វើឡើងពេញមួយថ្ងៃអាទិត្យនៅសង្វៀនទូរទស្សន៍អាស៊ីអាគ្នេយ៍នោះ គឺមានកីឡាករកម្ពុជា២រូបឈ្នះថៃ មួយរូបចាញ់ និងមួយរូបស្មើ ដោយកីឡាកររឿង សោភ័ណ្ឌ មកពីក្លិបមកុដរាជសីហ៍ត្រូវគេឃើញបង្ហាញសភាពឡាំប៉ាតែម្ដងមិនព្រមទទួលយកការលើកដៃឲ្យស្មើពិន្ទុជាមួយកីឡាករថៃ បន្ទាប់ពីការប្រកួតរបស់គេ និងកីឡាករ De Banchong ត្រូវបានបញ្ចប់នៅលើសង្វៀនប្លេកខេតនៅពេលរាត្រី ។ ក្នុងក្រសែភ្នែកមនុស្សរាប់ម៉ឺននាក់ទាំងអ្នកទស្សនាផ្ទាល់ និងតាមកញ្ចក់ទូរទស្សន៍ សុទ្ធតែឃើញសកម្មភាពរលាស់ដៃនៅពេលលោកអាជ្ញាកណ្ដាលលើកដៃឲ្យស្មើ និងមិនព្រមទទួលយកសកម្មភាពឱបលាគ្នារបស់កីឡាករថៃ ដោយរឿង សោភ័ណ្ឌ បានដើរក្រឡឹងមួយជុំរេញមិនទទួលយកការប្រកាសលទ្ធផល ហើយក៏ស្ទុះចុះតែម្ដង បង្ហាញពីអារម្មណ៍មិនយល់ស្រប ។
ការប្រកួតគូនេះ ដើមទឹកទី១កីឡាករថៃវាយឲ្យរឿង សោភ័ណ្ឌរាប់ដល់៨ លុះដល់ទឹកទី២ថៃត្រូវខាងកម្ពុជាវាយឲ្យរាប់២លើកវិញ ខណៈដែលទឹកទី៣ គឺលទ្ធផលឈ្នះប្រៀបនៅតែជារបស់រឿង សោភ័ណ្ឌ ។ទោះបីយ៉ាងណានៅ២ទឹកចុងក្រោយកីឡាករកម្ពុជាបាត់បង់ជំហរដោយសារហត់ទើបក្លាយជាឱកាសរបស់កីឡាករថៃវិញ ដែលនាំឲ្យលោកគណៈកម្មការសម្រេចឲ្យស្មើ ។
ក្រឡេកទៅកាន់កីឡាករ ផាន់ គ្រាន់ និងព្រំ សំណាង គេហាក់ទទួលបាននូវមោទនភាពខ្ពស់ជាងដោយសារតែបានឈ្នះថៃ ។ កីឡាករផាន់ គ្រាន់ មកពីក្លិបគជសារកីឡា ត្រូវគេឲ្យប្រកួតជាមួយកីឡាករ Pha Phayarbដែលជាជើងខ្លាំងម្នាក់មកពីទីក្រុងបាងកក ។ ការប្រកួតគូនេះ កីឡាករកម្ពុជាមានសន្ទុះល្អជាងក្នុងទឹកទី២ និងទី៣ ប៉ុន្តែឈានដល់ទឹកទី៤ កីឡាករថៃមានកម្រិតវាយបកល្អជាង ដោយបានទាំងធ្វើឲ្យការប្រកួតទាំងមូលទទួលសំឡេងស្រែកកងរំពងពីអ្នកទស្សនា ក្នុងពេលកីឡាករថៃវាយបកចំប្លង់ ហើយកីឡាករកម្ពុជាក៏បានសម្រុកតបវិញ ។ កីឡាករផាន់ គ្រាន់ ដ្បិតថាបានឈ្នះពិន្ទុក្រោយបញ្ចប់ទឹកទី៥ ប៉ុន្តែអ្នកណាក៏ឃើញដូចគ្នាថាជ័យជម្នះដែលគេទទួលបាន គឺស្ថិតក្នុងសភាពយ៉ាប់យ៉ឺនយ៉ាងខ្លាំង ។ អ៊ីចឹងហើយ ទើបអ្នកទស្សនាទះដៃផង និងខ្លះលោតកញ្ឆេងកញ្ជ្រោលផង ដែលកីឡាករផាន់ គ្រាន់ ប៉ះជើងខ្លាំង Pha Phayarb ប៉ុន្តែអាចយកឈ្នះបាន ។
មិនខុសគ្នាដែរ កីឡាករព្រំ សំណាងឯណោះវិញ ក៏ទទួលបានជោគជ័យលើកីឡាករថៃដូចគ្នាផងដែរ ។ កីឡាករ Kang Chak ដែលធ្លាប់យកឈ្នះលើកីឡាករកម្ពុជាក្នុងការបង្ហាញខ្លួនកន្លងទៅ បានក្លាយជាអ្នកបរាជ័យសម្រាប់ការប្រកួតលើកនេះ។ ប៉ុន្តែកីឡាករកម្ពុជាក៏ត្រូវទ្រមខ្លួនណាស់ដែរ ដោយសារគូប្រកួតរបស់គេ គឺរស់រវើកជាង Pha Phayarb ដែលចាញ់ផាន់ គ្រាន់ទៅទៀត ។ ក្នុងទឹកទី១ ទី២ និងទី៣ Kang Chak មានឱកាសវ័ធកែង និងម៉ាត់ល្អ ប៉ុន្តែបានចាញ់ដាច់លើកីឡាករកម្ពុជាក្នុងទឹកទី៤ និងទី៥ ទើបធ្វើឲ្យលទ្ធផលចុងក្រោយ គឺព្រំ សំណាងមានប្រៀប ។
យ៉ាងណាមិញ កីឡាករថៃក៏មិនបានបង្ហាញអារម្មណ៍ចម្រូងចម្រាសនោះទេ ដោយគេបានទាំងទះស្មា និងឱបរឹត ព្រំ សំណាង ក្រោយការប្រកាសឲ្យចាញ់នោះផង។ ២គូអន្តរជាតិទៀត កីឡាករផង់ សុភ័ស្ស មកពីក្លិបតាឡីដំរីមានឫទ្ធិ បានចាញ់ពិន្ទុកីឡាករថៃ A Noukvath បន្ទាប់ពីប្រឹងប្រែងប្រកួតអស់ពេញ៥ទឹក និងកីឡាករគង់ ហូវ វាយចាញ់កីឡាករ Pha Yanor ដោយពិន្ទុដូចគ្នា ៕
ចែករំលែកព័តមាននេះ