ខេត្តបាត់ដំបង៖ យ៉ាងហោចណាស់ មនុស្សចំនួន០៥នាក់បានរងរបួសធ្ងន់ធ្ងរ ខណៈដែលបុរសម្នាក់បានស្លាប់ នៅក្នុងឧប្បតិ្តហេតុគ្រោះថ្នាក់ចរាចរណ៍ចំនួន០៣ករណីផ្សេងៗគ្នា កាលពីថ្ងៃទី២១ កក្កដា នៅស្រុកថ្មគោល និងស្រុកភ្នំព្រឹក។ នេះបើតាមរបាយការណ៍បឋមដែលកោះសន្តិភាពទទូលបាន។
របាយការណ៍បានឲ្យដឹងថា ករណីទី១-បានកើតឡើងនៅរសៀលថ្ងៃទី២១ កក្កដា នៅលើផ្លូវជាតិលេខ៥ ចំណុចភូមិថ្មគោលជើង ឃុំតាម៉ឺន ស្រុកថ្មគោល រវាងរថយន្តដឹកទំនិញធុនធ្ងន់ ជាមួយអ្នកជិះម៉ូតូឌុបគ្នាចំនួន០៣នាក់។ សមត្ថកិច្ចបាននិយាយក្នុងរបាយការណ៏ថា ភាគិម៉ូតូបានព្យាយាមជិះចេញពីផ្លូវលំឡើងលើផ្លូវជាតិ រួចបត់ឆ្លងកាត់មុខរថយន្តធំ ក៏ត្រូវរថយន្តបុកតែម្ដង ដែលបណ្ដាលឲ្យអ្នកជិះម៉ូតូទាំង០៣នាក់នោះ រងរបួសធ្ងន់។ ជនរងគ្រោះ ១ឈ្មោះ លាង ហូវ ប្រុសអាយុ១៦ឆ្នាំ ២ឈ្មោះ សារឿង ប្រុសពេជ្រ ប្រុសអាយុ១៩ឆ្នាំ និង ៣ឈ្មោះ កែវ វិច្ឆិកា ស្រីអាយុ១៦ឆ្នាំ រស់នៅក្នុងស្រុកថ្មគោលជាមួយគ្នា រីឯអ្នកបើកបររថយន្តឈ្មោះ អៀង រ៉ាន់ អាយុ៣២ឆ្នាំ នៅស្រុកសូត្រនិគម ខេត្តសៀមរាប។
ករណីទី២-នៅរសៀលថ្ងៃទី២១ កក្កដា ដដែលនេះ បានកើឡើងនៅចំណុចភូមិអូរដា ឃុំបួរ ស្រុកភ្នំព្រឹក រវាងអ្នកជិះម៉ូតូជាមួយនឹងរថយន្ត បណ្ដាលឲ្យអ្នកជិះម៉ូតូ ឈ្មោះ គង់ គីម ប្រុសអាយុ៤៥ឆ្នាំ នៅភូមិ-ឃុំខាងលើ ស្លាប់នៅកន្លែងកើតហេតុ។ បើតាមសមត្ថកិច្ចថា រថយន្តនិងអ្នកជិះម៉ូតូ បានធ្វើដំណើរក្នុងគោលដៅផ្ទុយគ្នាពីកើតទៅលិច។ ប៉ុន្តែពេលទៅដល់ចំណុចកើតហេតុ ស្រាប់តែអ្នកជិះម៉ូតូ បានបត់ឆ្លងថ្នល់កាត់ពីមុខរថយន្ត ទើបត្រូវរថយន្តបុកពេញទំហឹងអូសធ្លាក់ផ្លូវទាំងរថយន្តទាំងម៉ូតូ បណ្ដាលឲ្យអ្នកជិះម៉ូតូស្លាប់ភ្លាមៗ ។
ដោយឡែក អ្នកបើកបររថយន្តឈ្មោះ ណង អុល អាយុ៥៣ឆ្នាំ គ្មានរលាត់ស្បែកទេ រីឯរថយន្តរបស់គាត់ម៉ាកស្ដារិច ពាក់ស្លាកលេខ ភ្នំពេញ2AB-9976 ខូចខាតបន្តិចបន្ទូច។ ដោយឡែកករណីទី៣ គឺវិលត្រឡប់មកកាន់ស្រុកថ្មគោលវិញ ឧប្បតិហេតុគ្រោះថ្នាក់ចរាចរណ៏ បានកើតឡើងនៅវេលាម៉ោងជាង១១យប់ ថ្ងៃទី២១ កក្កដា ដដែល នៅលើផ្លូវជាតិលេខ៥ ត្រង់ចំណុចភូមិតាសី ឃុំតាម៉ឺន ស្រុកថ្មគោលរវាងរថយន្តធុនធ្ងន់ ជាមួយអ្នកជិះម៉ូតូបណ្ដាលឲ្យអ្នកជិះម៉ូតូរបួសធ្ងន់ទាំង០២នាក់។
របាយការណ៍មិនបាននិយាយពីមូលហេតុ ដែលបណ្ដាលឲ្យអ្នកជិះម៉ូតូ និងរថយន្តជួបប៉ះទង្គិចគ្នានោះទេ តែនៅក្នុងរូបភាព គេឃើញជនរងគ្រោះភាគីម៉ូតូដេកស្ដូកខាងមុខរថយន្ត ដែលពាក់ស្លាកលេខ កំពង់ធំ 2A-4129 រីឯម៉ូតូបែកខ្ទេចដូលនៅក្បែរនោះដែរ។ ប៉ុន្តែយ៉ាងណាក៏ដោយ ពាក់ព័ន្ធនឹងករណីគ្រោះថ្នាក់ចរាចរណ៏ទាំង០៣ករណីខាងលើនេះ បើតាមមន្ត្រីចរាចរណ៏ បានឲ្យដឹងថា មន្ត្រីជំនាញនៅតាមបណ្ដាស្រុកនីមួយៗ បានចុះពិនិត្យនិងធ្វើការវាស់វែង រួចនាំយកមធ្យោបាយបង្កគ្រោះថ្នាក់ទាំងអស់ទៅរក្សាទុកនៅតាមអធិការស្រុក ដើម្បីរងចាំដោះស្រាយតាមនីតិវិធី។ ដោយឡែក ជនរងគ្រោះដែលស្លាប់ត្រូវបានក្រុមគ្រួសារយកទៅធ្វើបុណ្យតាមប្រពៃណី ខណៈអ្នករបួសត្រូវបានបញ្ជូនទៅព្យាបាលនៅមន្ទីរពេទ្យ៕
ចែករំលែកព័តមាននេះ