ខេត្តព្រះសីហនុ ៖ ការយកចិត្តទុកដាក់លើស្ត្រីមានវិបត្តិ ស្ត្រីជាទុគតជន ស្ត្រីក្រីក្រ គឺជាគោលការណ៍គន្លឹះ និងជាចក្ខុវិស័យចម្បងរបស់សមាគមន៍នារីកម្ពុជា ដើម្បីសន្តិភាព និងអភិវឌ្ឍន៍សាខាខេត្តព្រះសីហនុ ។
នេះយោងតាមការបញ្ជាក់របស់លោកជំទាវ ប្រាក់ ច័ន្ទសុខា ប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍សាខាខេត្តព្រះសីហនុ ថ្លែងឱ្យដឹងក្នុងឱកាសដែលលោកជំទាវចុះពិនិត្យស្ថានភាព ទារក និងស្ត្រីវិកលចារិក ដែលបានសំរាលកូនតាមផ្លូវ កាលពីព្រឹកថ្ងៃទី២០ ធ្នូ ២០១៥ ។
លោកជំទាវបានគូសបញ្ជាក់ថា ដោយមើលឃើញអំពីភាពសោកសង្រែងគួរឱ្យអាណិតអាសូរ និងក្តីបារម្ភអំពីសុខភាពរបស់ស្ត្រីវិកលចារិក និងទារកដែលទើបប្រសូត្រនេះ ក្រុមការងាររបស់មាគមន៍នារីកម្ពុជា ដើម្បីសន្តិភាព និងអភិវឌ្ឍន៍ ដឹកនាំដោយលោកជំទាវ ជ្រា ពៅ លូ គឺមឈន់ បានចុះដល់មន្ទីពេទ្យបង្អែកចំការចេក ក្រុងព្រះសីហនុ ក្រោយពីបានចុះជួបផ្ទាល់ឃើញថា សុខភាពម្តាយនិងទារក មានស្ថានភាពល្អប្រសើរ ក្រោមការយកចិត្តទុកពីក្រុមគ្រូពេទ្យនៃមន្ទីពេទ្យបង្អែកចំការ ។
ក្នុងឱកាសនោះដែរ ដោយសារម្តាយទារកជាជនវិកលចរិក មិនអាចថែទាំកូនបាន ក្រុមការងារសមាគមន៍ និងលោកជំទាវជ្រា ពៅ លូ គឺម ឈន់ រួមជាមួយអំណោយរបស់លោកឧកញ៉ា ទៀ វិចិត្រ បានឧបត្ថមថវិការមួយចំនួនដល់មន្ទីពេទ្យ ដើម្បីឧបត្ថមដល់ម្តាយចឹញ្ចឹមទារកជាបណ្តោះអាសន្ន ទំរាំស្ថាប័នពាក់ព័ន្ធប្រគល់ទារកនោះទៅឱ្យសប្បុរសជនយកទៅចឹញ្ចឹមបីបាច់ជាកូនចិញ្ចឹមស្របច្បាប់ឱ្យទារកកំសត់នេះ មានអនាគតដូចក្មេងដទៃ ។
គួរបញ្ជាក់ថា បន្ទាប់ពីប្រព័ន្ធផ្សព្វមួយចំនួនបានផ្សាយអំពីដំណឹងនេះ ក៏មានសប្បុរសជនជាច្រើនបានមកធ្វើការសុំទារកនោះយកទៅចឹញ្ចឹម ប៉ុន្តែខាងស្ថាប័នពាក់ព័ន្ធ និងខាងមន្ទីពេទ្យបង្អែកចំការចេក ពុំទាន់សម្រេចនៅឡើយទេ រង់ចាំពិភាក្សាសម្រេចនៅពេលក្រោយ ។
ចែករំលែកព័តមាននេះ